[منقاش]

رد: الاتريك رد: الاتريك رد: الاتريك رد: الاتريك رد: الاتريك

الأوله , تكفى يا مدهش أترجاك تطلب من المشرفين يشيلون درع المسابقه اللي تحت أسمك لأن لونه كحلي ولا يناسب , ولأنه يذكرني أنكم فشلتونا يوم دخلتم مسابقه وخليتم واحده من أخواتنا تفوز عليكم وانا كنت أتعشم أنكم يا طوال الشوارب ما تفوتكم الحيل حتى لو غشيتم واستعنتم بغيركم يكتب لكم مثل سواة المخاوي في مواضيعه اللي دايم ينزلها في المنتدى ومثلي في بعض الأحايين.
الثانيه , الأتريك (ونعومك بكل الأتاريك بدون تخصيص اللي منها على قاز والا غاز) اقول بخصوصه أن الأتاريك أعقبها اللنبات وسبقها الفوانيس , والفوانيس سبقها السرج , ولاحظ معي أن اللنبه وقبلها الأتريك وقبل الأتريك الفانوس كلها أسامي ماهي عربيه , وهذا يدلك أن العرب في عصورها عودوا في ذيل الأمم بعد كانوا في طلايعها .
أما السراج فهو الأسم العربي , وانا واحد من اللي أدركوا السراج اللي يسرج بالقاز , وكبار السن يوم كنا ورعان أدركوا في صغرهم السراج اللي يسرجونه على السمن واحيان على زيوت النبات , ويقول القواله أن بعض السرج اللي كانت على السمن مجرد حجر محفور بحجم الكف مفلوج من واحد من جوانبه حتى يمدون الفتيله مع الفلج ويكون طرف منها في السمن والطرف الثاني من الفتيله اللي فيه الشعله يكون على حافة ماعون السراج . ويذكر الذاكرين أنهم ما كانوا يستسرجون بالسراج الا نادر , واغلب ما كانوا يستسرجون عليه هو شبوب الضو (على الحطب) , وهذا الكلام ما هو بعيد عن زمانكم واجد , (يعني من المية عام وزود من أيامكم هذي) .....