[منقاش]

رد: تبطي عظم يالمخاوي..!! رد: تبطي عظم يالمخاوي..!! رد: تبطي عظم يالمخاوي..!! رد: تبطي عظم يالمخاوي..!! رد: تبطي عظم يالمخاوي..!!

شوف يا شيخ سهيل , أنا رجال تجاوزت التسعه والتسعين عام ولا عاد لأحد عليه ملامه , يجيه مني اللي يجيه , أن كان خير فليحمد الله وان كان غير ما معه ألا ياكل تبن ويسكت , يعني , القلم مرفوع عني وعندي صك صادر من المحكمه بهالكلام..
لكني للأمانه العلميه وللتاريخ أتذكر أن هذا المنتدى في أولاته كان كتابه يختارون عبارات ردودهم بتكلف ممجوج وتصنع في الثنا والمديح لبعضهم يذكرني بمدايح صحافة العالم العربي, وكل ما كتب كاتب سطر ما تفهم أوله من آخره ولا تدري عن معناه ولا كنه مبناه أنبرا ألأعضاء من كل حدب وصوب في كيل المدايح تلو المدايح للكاتب , لله درك , سلمت يمينك وسلمت شمالك , لا فض فوك , رحم الله أما وأبا أنجباك , وخذ من هالهقط اللي يدبل الكبد ويثير الغثيان.
وهاك اليوم , قلت والله مالها ألا واحد يفركشها ويفكنا من هالتكلفات ومن هالمتكلفين , ولا لها ألا أنت يبو نقشه , كنت أقوم واتصل بأبو عبدالرحمن وخبرته أني رايح أرمي قنبله في المياه الراكده والآسنه , وابغيه لا يحذف اللي يجي مني أو يجي عليه , ويخليني أنا وكتاب هالمنتدى على الله , وحذرته أنه لو تعرض وحذف من كلامي شي أني في اليوم الثاني رايح أنزل موضوع أتسبب فيه بغلق المنتدى.
وفعلا قمت ونزلت موضوع كله سب وشتايم مباشره وصريحه في المدرا والأعضاء والمشرفين , سب سحيت من سحيت ومتكلف ومبالغ في كلفته أكثر من المدايح اللي كانوا يتكلفونها ويكيلونها لبعضهم , سب كان مركب من الراس ولا له أساس في عالم الواقع ولا أستثنيت فيه ولا منه أحد لا عدو ولا صديق في هالمنتدى كائنا من كان ..
ثارت ثايرة الجميع وهم يردون عليه في السب والشتايم , وأنا ساكت وراضي لأن الظلم بالظلم والبادي أظلم والغرض النفسي اللي من أجله كتبت ما كتبت بدت بوادر نجاحه تطلع بجلاء , وبقيت ساكت أتفرج ولا أرد على أحد منهم مهما تطاول من ما زادهم كمدا على كمد وغما على غم ..
لكن الشعراء حقدوا عليه أكثر وجلسوا حول كامل وهم مالهم شغل في منتداهم ألا سب فيك يا منقاش وهجاء , ومن كثرة هجاهم ما كنت أقرا من حلمنتيشياتهم ألا أقل القليل , وخليتهم حتى خلصوا حسناتهم كلها وحملوا عني الكثير من سيآتي , وبعدها حمدت الله وشكرت اللي لقيت من يحمل عني ذنوبي ويعطيني من حسناته .
وبعد فتره أخذت الزوبعه تهدا شويه شويه حتى ركدت العاصفه واختفت أغلب مكايل الشتيمه لأبو نقشه وأختفى معها أغلب مكايل المديح اللي كان المداحين يكيلونها لبعضهم , ثم أبتدا ألأعضاء يقتربون في نفسهم من الوسطيه الفكريه والعقلانيه ويبعدون عن ألأسفاف في المديح ألا الشعراء .
ألا الشعراء ...
الشعراء في هالمنتدى عندهم كليشة جاهزه للمديح ما يتركونها لدرجة أني في يوم من ألأيام نزلت بأسم مستعار غير أسمي قصيده أسبهم فيها وأسب معهم المخاوي والشيهان , وكان ردهم , صح لسانك , هذا والله هو الشعر وهذا والله هو الشاعر والا بلاشي , لا فض الله فاك يا شاعر الشعراء..
وأنا من جانبي رافع العتب عنهم وغاض النظر عنهم لأنهم مغلوب على أمرهم ومختوم على أبصارهم وأسماعهم بختم أبدي ما يقدرون يتحلحلون عنه قيد أنمله وهو : (وَالشُّعَرَاء يَتَّبِعُهُمُ الْغَاوُونَ* أَلَمْ تَرَ أَنَّهُمْ فِي كُلِّ وَادٍ يَهِيمُونَ* وَأَنَّهُمْ يَقُولُونَ مَا لَا يَفْعَلُونَ).
بقي أني أقول أن ردي هذا يا صديقي ويا حليفي يا سهيل ما أردت به (والله وانتبه أنا أقول والله)الرد على مديحك لي وانما أسترسالا مع وصفك لكتاباتي بالقوه اللي قصدت بها الخشونه ولو كنت مكانك لقلت الجلافه ..
لا والف لا ما قصدت من ردي عليك مديحك للشيخ , لأن ابو نقشه رجال عجزت النساء أن يلدن مثله , ومهما مدح فيه المادحون ما يقدرون يوفونه حقه من المديح مثل ما أن المخاوي مهما سب وشتم فيه الشاتمون ما يقدرون يوفونه حقه من الشتيمه .
والمعذره على القصور , وشكرا ..