الســـــــــؤال الذي لم أطرحه ؟؟ ((الحلقه السادسه ))

[ابوسيفين]

الســـــــــؤال الذي لم أطرحه ؟؟ ((الحلقه السادسه )) الســـــــــؤال الذي لم أطرحه ؟؟ ((الحلقه السادسه )) الســـــــــؤال الذي لم أطرحه ؟؟ ((الحلقه السادسه )) الســـــــــؤال الذي لم أطرحه ؟؟ ((الحلقه السادسه )) الســـــــــؤال الذي لم أطرحه ؟؟ ((الحلقه السادسه ))

السلام عليكم ورحمه الله وبركاته ومسّاكم الله بالخير

أعود معكم لتكمله حلقاتنا عن رحلتي مع ذلك الشخص المجهول وقد اتيت في الحلقه السابقه على ذكر بعض المشاهدات من موقع المهرجان 0 أما أنا وصاحبي فقضينا عصريّه ممتعه في التجوال بين المخيّمات لم يشوبها سوى الوقت العصيب الذي مرّ بصاحبي عندما أراد الخلاء ــ أجلّكم الله ــ فالمنطقه مستويه مدّ النظر ومليانه ناس وطرق ولا تجلس في مكان مادريت الاّ طالع عليك سياره ولاّ راعي وبعد جهد جهيد لقينا لنا وغيفه صغيّره وينطلق لها خويّي وقبل مايقضي شانه الاّ وهو ويناديني تعال تعال صوّر ! قلت ياولد إستح على وجهك 0وبعدين طول الرّحله وانت مانعني من التصوير وش اللي تغيّر 0 قال صوّر وبعدين أعلّمك عوّدت نزلت بكمرتي وصوّرت هالصوره

^

^

^

^

^

^



وهذه صور له معززا مبجلا في مكتبي




قال ارفع هذا عندك تبي تلقى بكره من خويانا واحد مايسمع فيه ، من عقب الوسمي بشهر تلقاه مايخلي محل يجمّع فيه ويرمي فالفريزر وطول السنه ياكل منه0
قلت المهم خلّصنا ورجعت للسيّاره وهو قعد يقضي شانه ولا دريت الاّ وهو راجع لي ومعه شويّت علف قلت هذا وش هو ؟ قال ليا عرفت إسم الّلي صوّرت أعلّمك وش هذا 0 المهم إني خصرته وقلت مصيري أعرف ومشينا لخيمتنا وسوّينا ذاك المشوي الذي تستاهله هالّحى الغانمه وخويي ماشاء الله معه كافه متطلبات الشوي




عزّ الله انّ إحنا تعشينا وعيّنا خير في جو بارد لدرجه إن خويي ماقدر يشرب الما إلا بعد دخّله معه في الفراش من شدّه برودته 0 قال ارقد بكره مواعدين لنا خويا أهل مقناص والمشوار طويل 0
ويوم أذّن الصبح قمنا وصلّينا وشدينا عفشنا ويوم جاء الضحى وإحنا فالمنطقه اللي بين حفر الباطن ورفحا ولينه في طعوس على طرف مناقع ماء من بعد المطر وليا كل واحد ناصب صقره على وكره





قامو بعد كذه كل واحد يتعلم الثاني عن وش معه من علف وكتو كراتينهم ولين خويّ مجمّع معه كرتون وش كبره من الّلي لقيناه أمس العصر وصورناه ويقوم واحد منهم ويرمي عليّه واحد من كرتون خويي وقال لّي وش اسم هذا قلت هذا عندنا يسمّونه (( زنبخ )) ومير يكركر الين انقلب على قفاه وتشطّطت رجليه مثل الرجال الّلي أنتم خابرينه وحصل معها ما حصل من أصوات ويوم إنتبه له خويّي قال تراه يعرف إنه عرجون وبدا يتوسع لهم في الشرح عن العراجين وعن فصيلتها بأسلوب بحثي وكان مما قاله إن الزنبخ من نفس الفصيله ومنها الطرثوث ــ مثل بعض الرجاجيل ــ والأذنون وقامو الرياجيل يشبّون نارهم قلت أبزرق أدور لنا غدا قالوا وهاذي النعمه ما هي عاجبتك 0ولين لهم رفيق ارفل مخصصينه للكشنه ويوم قال لهم إنها جهزت وهم يرمون العراجين عليها ، ويصلّحون سلطتهم وهي من العلف الّلي جابوه (( حمّيض وبروق )) والقهوه (( حندقوق وبسباس وقرقاص )) وتسدّحوا ويسولفون وهم متبطّحين الّلي يقول شعر واللي يروي قصص إلين أمسانا الّليل قلت لخويي عجّل ردني لاتفوتني الرحله قال أنا حجزت لك من مطار حفر الباطن مشينا قلت مشينا وودعت الرّبع وانا أقول وين أقرب مطعم ذبحني الجوع ووصلني خويي الى المطار وقال لي انزل بسرعه لاتفوت الرحله وبعد مانزلت وتحرّكت سيارته وأنا أذكر إن في بالي ســـؤال ما سألته له ناديته ماسمعني وبقي الســـؤال يجول في خاطري إلين مادريت وواحد من الأبناء ينادي عليّ يقول وشبك يبوي عجّل ترى الصبح أذّن له ربع ساعه قلت أعوذ بالله من الشيطان الرّجيم وش هالحلم
لكن بقي الســؤال في خاطري وندمت إني ماسألته هل هو ألحاج سلام ؟؟؟
في الحلقه القادمه إنشاء الله (( الختاميّه )) استذكر معكم بعض تلك المناظر اللتي بقيت راسخه في ذهني من ذلك الحلم ، وبعض ماأتذكره عن أوصاف الرّبع الّلي قابلناهم يمكن تساعدوني في التعرّف عليهم 0

أشوفكم على خير

[أبو عبدالرحمن]

لا قصة...ولا تصوير..(ما شاء الله تبارك الله )

تعال يا منقاش...راحت علومك...وبدأ البساط ينسحب منك!

[ابوسيفين]

المشاركة الأصلية كتبت بواسطة أبو عبدالرحمن

لا قصة...ولا تصوير..(ما شاء الله تبارك الله )

تعال يا منقاش...راحت علومك...وبدأ البساط ينسحب منك!

ترى علومك هذي يبدو إن راعي الزيت زحلطها عليك معه ، لكنّها مكشوفه للشيخ ولاتنطلي عليه 0 وأنا أربأ بك أن تكون من الرجال اللي توديهم وتجيبهم تنكه زيت مسروق إعترف الحرامي بسرقتها 000 ياعيباه ياقيدوم ثماله 0

[@ بن سلمان @]

الله يحلل الأفلام المصرية
قم قم صل

وهم يرمون العراجين عليها ، ويصلّحون سلطتهم وهي من العلف الّلي جابوه (( حمّيض وبروق )) والقهوه (( حندقوق وبسباس وقرقاص ))

أحسها أنواع المطرسة

[ابوسيفين]

المشاركة الأصلية كتبت بواسطة @ بن سلمان @

الله يحلل الأفلام المصرية
قم قم صل




أحسها أنواع المطرسة

لو مر عليك اللي مر بي كان مالمتني ، وبعدين ترى بعض المطرسه مدرسه ، لكنك يبدو إنك متأثر من الحاله النفسيّه اللي يمر بها حليفك ، بغيناك تقرى عليه والظاهر إنه أعداك 0 لكن أنصحك ليا تلاقيتوا كل واحد ينفث على الثاني

[صقر قريش]

[ابوسيفين]

المشاركة الأصلية كتبت بواسطة صقر قريش

هلا والله يالصقر وترى واحد من الصقور اللي أنت شفت هديه لك 0

[منقاش]

يا رفيقي يا دكتور مشعان هذا حلمك كيف علمك ؟.
الحقيقه أن القصه تجنن على قول الشباب , ولفت نظري العرجون اللي أول مره أشوفه , وأظن المخاوي سبق وأطراه لي وقال أن العرجون والفقع (الكمأه) وجبتهم البريه المفضله .
وترى عندنا شي يشاديه ينبت على الثمايل والعقمان يسمونه ...؟..الوادي .

[سنا الهجرة]

المشاركة الأصلية كتبت بواسطة منقاش

وترى عندنا شي يشاديه ينبت على الثمايل والعقمان يسمونه ...؟..الوادي .

هههههههههههههههههه
هذا اللي تقول عليه يا منقاش .. كان ينبت عندنا في صفة الحمير بس أنه أصغر بكثير من هذا اللي جايبه الكتور .. هذا شكله مسمد بكيماوي

[ابوسيفين]

المشاركة الأصلية كتبت بواسطة منقاش

يا رفيقي يا دكتور مشعان هذا حلمك كيف علمك ؟.
الحقيقه أن القصه تجنن على قول الشباب , ولفت نظري العرجون اللي أول مره أشوفه , وأظن المخاوي سبق وأطراه لي وقال أن العرجون والفقع (الكمأه) وجبتهم البريه المفضله .
وترى عندنا شي يشاديه ينبت على الثمايل والعقمان يسمونه ...؟..الوادي .

العين ماتعلى على الحاجب ، والمشاورات اللي درناها في الحلقه الأولى يبدوا أنها جابت نتيجه والحاج أشوفه بدا يمحوص على ماقالو أهل الديره 0
وانا كنت عارف إنك ماتبى تنسى نبتته الديره ، وطالبك تعبي منه كرتون للمخاوي ياكله مع الزيت 0