اكتب اجمل قصيدة قرأتها

[رعد الجنوب]

مساكم الله بالخير جميعا

هذه احدى قصايد الشاعر..../ محمد بن ناصر السلولي

اعجبتني فحبيت انقلها لكم

السنين القشر تخلف هقاوي من هقا

والدهر مركز تجارب وميدانٍ فسيح

وش بقا ما علمتنا التجارب وش بقا

كل يوم درس بأسلوب ولسانٍ فصيح

ياهل المعروف كل شقا باللي لقا

والحظيظ اللي من الهم قلبه مستريح

الشقاوي في زمانه يهيا للشقا

واشهد أنه ما يجي من المليح إلا المليح

بين لحظات المفارق ولحظات اللقا

تتضح لك صورة الود بالمعنى الصحيح

زبدة الخافي تبين ليا خض السقا

والصدور اللي بها شر يفضحها الكحيح

وصحبة ماهي بتبنا على عز ونقا

اخرتها لو تطول مبانيها تطيح

لو تشوف اصحابها قدم الأنظار أصدقا

مثل ما قال المثل ما يصح ألا الصحيح

كل صحبة تم ميثاق أهلها في التقا

الحذر منها ترى وضعها ماهو مريح

والموفق من تخير صديقه والتقا

صاحبٍ قلبه سليم ومنهاجه سميح

لعنبو من يتخذ من الرديين ارفقا

والله أن يبطي وهو من صداقتهم جريح

من بغى حاجةٍ على منبر افؤادك رقا

قص لك قصة اسماعيل والكبش الذبيح

لين ياخذ من دموعك لغاياته وقا

ثم قفا بعدها عنك وأركابه طفيح

وش لقا من رافق أهل الخيانه وش لقا

واحداً يمشي على ساق والثاني طريح

الخيانه شر مبدأ يحاربه التقا

لا على ملة محمد ولا دين المسيح