سهيل ابن اليماني .. يعود بمشكلة .. !!

[رويعي الغنم]

اليماني بن اليماني حليف الشيخ شاعرنا سهيل اليماني حفظه الله
جرى العرض على الأنظار الكريمة لحليفكم الشيخ ابو نقشه دام ظله الشريف فحك برؤوس مخالبه صفحة ساقه اليمنى حتى كاد يدميها (عند الشيخ مشريه متلقيته) , ثم التفت يمنة ويسرة وكأنه يقول أحذروا فأن للحيطان آذانا , ثم دنق براسه ارضا وأخذ يلعب فيها برأس عصاته ويرسم أشكالا غريبة ويتمتم بتمتمات مبهمة وكأنه يخاطب شيخوخ الجان ثم رفع نظره والتفت الى جلسائه قائلا :
الله يا حليفي يا سهيل يسهل امرك ويكفيك شر بنات الحرام ويحيك متى ما جيت تحيه تريع وتبدي مع كل ريع اقولها من قلب صادق أصاله عن نفسي ونيابه عن كل البواجي ,, هذي أولة الأولات ..
الثانيه : الصفر فتنه وفيهم ريحة العنبر لكن من دونهم خرط القتاد , بكلام ثاني , أن كان حليفي سهيل يشوف أن فرد حمزه لابد ثاير ثاير سواء كان قبل والا بعد التقاعد فلا بد أنه يكون بعير ويتحمل التالي ..
آحاد ...يتخلى عن ربعه ولا عاد يجيب لهم طاري على طرف لسانه ويصبح بوجي من البواجي بعد كان عتيبي من العتبان ويصبح بعدها اسمه سهيل اليماني البوجي ويذبح معهم شاة الغرم ويعرف أن من جالس القوم اربعين يوما سار منهم ..
شنايم ... نظام البواجي ما يسمح الا بأثفيه واحده , واللي يثبت عندهم أنه جمع بين أثفيتين أو أكثر يرمونه في غياهب السجون حتى يمشي القمل في رموش عيونه ويوحد وينخم ابليس ويلعنه هو والساعه اللي صفر عليه فيها وعرفه فيها بالصفر ...
شلاشا ... عند البواجي لو مات الزوج المستثفي وترك وراه أثفيته لها ترث نصف ماله والباقي لعياله , وهذا دافع يخلي الزوجه من البدايه تخطط حتى تدس له سم الزرنيخ مع أحسن عصير يحبه حتى يزرنخ وهي من بعده تورث امواله وتزوج بداله شاب أحسن منه تنعم هي وياه بقية حياتهم بتركته ويقولون يا دارنا لا دخلك شروالله لا يردك يا هذاك الزوج الأقشر , ويكون في علمك أن المحامين ما رايح يفوتون شي في الداخل والخارج ورايح يقلبون كل حجر ويلاحقون كل قرش خلفه المرحوم في أي بلد على وجه الأرض والا على سطح القمر ..
ألا اذا يبي يلتف على نظامهم فوقتها ما عليه الا يسوي مثل ابو نقشه اللي كل شهر يتزوج ببوجيه ثريه عمرها فوق الثمانين ولا يكتمل الشهر الا وهي في قبرها وهو يتورثها ويستبدلها بواحده مثلها وفي سنها حتى كون ثروه طايله من هالأستثمار المربح في الحياة الدنيا ..
هذي هي قواعد اللعبه لمن يرغب اللعب مع صفراء والا صفيراء , وأن كان حليف ابو نقشه يحس أنه على قدها وقدودها فخلوه يتجاوز حدودها ويعصب على قلة راسه بعصابه حمراء ويدعي عليه بالسلامه ويوقن أن اللي بقي من العمر ما هو أكثر من اللي راح ويغسل يده ثم لا تجف الا عندي , وسلامتكم أنتم وسهيل .....
الى هنا ينتهى النص الكريم .....