من دون صهيون بذتنا صهاينا..!!

[منقاش]

أعتقد أن الموضوع تشبع وأخذ ما يكفي من أبداء وجهات النظر , لكن الشيخ بقي في نفسه كم خاطره من خواطره , وليتكم تسمحون له يختم بها :
ألأوله , أخشى ما أخشاه أنه باكر أذا سمح للنساء بقيادة السيارات كما هو متوقع , وعرف الناس يومها منافعها الكبيره وضروراتها اللي ماهي قليله , وتذكروا اللي وقفوا يوم من ألأيام ضدها , أخشى ما أخشاه يومها هو الفهم المغلوط اللي ربما قد ترسخ في العقل الجمعي عند العامه .
المفهوم اللي فحواه أن اللي حرموهم كل هالمده الماضيه من حق من حقوقهم هم المتدينين واللي أنقذوهم هم العلمانيين (مع العلم أني أستبعد أن عندنا علمانيين , وأعتقد أن اللي عندنا هم مجموعات من دهماء تزعم أنها مثقفه , وهم أدوات بيد غيرهم أكثر من أنهم أصحاب فكر أو مبدأ , وربما باع الواحد منهم دينه بعرض من الدنيا قليل , وهم أخواننا ومسلمين ونتمنى لهم الهدايه وكل خير , والأعمال بخواتيمها , ولا نزكي غيرهم ولا نزكي أنفسنا على الله) .
وهذا الفهم الخاطي اللي أخشى أنه يترسخ مستقبلا عند العامه أن لم يكن قد ترسخ , له عواقب ماهي طيبه على الصحوه مستقبلا وفيه سلبيات كثيره تضر بالدعوه , واللي ساهم وقتها في ترسيخ هذا المفهوم هم كل من أتهم بالعلمانيه المناصرين أو غير الممانعين لقيادة المره لسيارتها ..
وتعرفون أن الشيطان نعوذ بالله منه حريص , والعامه أغلبهم دهماء تتبع غيرها ولا تحب تعني نفسها بالتفكير , وفي هالجو الفكري المضطرب المترسخ في ألأذهان يصعب تذكير الناس أن ألأمه كان فيها علماء وناس عاديين ماهم قليلين رفعوا أصواتهم بصوت يعلى على جميع ألأصوات وقالوها صريحه : قيادة المره لسيارتها في ألأسلام من المباحات ..
الثانيه , ترون زوبعة الخلاف على سواقة المرأه من الملهيات المطلوبه حتى تلهي الناس عن ما هو أهم من أمور دينهم ودنياهم , وحتى يتناقر من يزعم أنهم علمانيين ومن يزعم أنهم من الصحوه أو من قياداتها , وكل طرف يطلع له مناصرين ومعارضين , وبالتالي تؤدي العمليه نفس الدور اللي تحققه مباريات الفرق الرياضيه , وهذا أنتم هالحين شوفوكم في هالملعب الصغير تكثرون الجدل في أمر من أبسط ألأمور , وابو نقشه واحد من اللاعبين في الميدان اللي يلهون الناس لبينما القضيه بسيطه من أساسها والحق فيها واضح وأبلج على ألأقل بالنسبه لي ...
الثالثه , تعرفون القاعده اللي تقول عند الضرورات تباح المحظورات ؟؟, تعرفونها بلا شك ..
لكن عمركم سمعتم عن قاعده تقول عند الضرورات للحلال يحرم الحلال ؟؟, وأقصد بالضرورات ألأمثله اللي سبق وضربتها لكم بالأرمله والمدرسه وغيرها , وأقصد بالحلال قيادة المرأه للسياره اللي ألأصل فيها الحل , وأقصد بتحريم الحلال المنع ألأداري اللي بدا عاده ثم تحول في جانب منه عباده بعد أخذ صبغه شرعيه بسبب ما صدر من فتاوي تمنع المرأه من قيادة سيارتها ..
الرابعه , لا تعددون لي سلبيات سواقة المرأه وتحطونها ذريعه , لأنه ما فيه شي بهالدنيا ألا وله غالبا سلبيات , حتى السكاكين اللي في مطابخكم وتقطعون بها بصلكم من سلبياتها أن أي مخبول يمكن يقتل بها بري , وهل فيه جريمه أكبر من القتل سوى الشرك ؟؟؟.وليه ما نستصدر فتوى بتحريم أقتناء السكاكين في مطابخ البيوت حتى نوقف سفك الدماء؟؟.
الخامسه , الزمن اللي مضى وأجتهد فيه بعض مشايخنا رحمهم الله وجزاهم عنا كل خير , واللي أستندتم على بعض فتاويهم كان زمن مختلف كليا عن زمنكم , وكان لا زال المجتمع فيه متشبع بآثار التصادم الفكري والحقيقي بين الدين والعلمانيه , زمن العلمانيه اللي كان فيه أتباع حقيقين للعلمانيه يقول أمثلهم علمانيه يومئذ (والعياذ بالله) لا أله والكون ماده , ويومها بلغ التاثير مداه وخرجوا المرأه ماهو بس من بيتها بل خروجوها من دينها وحشمتها وكشفوا عورتها وجردوها من كل أخلاقها , وكانت العواصف شديده والرياح هوجاء .
وربما أن علمانا والظروف كما ذكرنا بهاك الوقت وهاك الظروف الصعبه قدروا للأمور حق قدرها ونظروا في حال مجتمعهم اللي كان لا زال غض وأمي في أغلبه , وفقير القله فيه من الرجال بالكاد يمتلكون سيارات والكثره لا تمتلك , ووجدوا أن المطالبه بقيادة المرأه ترف ولا له ضروره من الضرورات في عصرهم , ووجدوا فيما وجدوا أن مجتمعهم لا زال مشبع بالبداوه والجهاله بدينهم ومستجدات عصرهم ويستنكرون كثير من أنشطة المرأه , بل أنه كان في مجتمعهم رجال يتزوج الواحد منهم وينجب ويموت وهو ما شاف وجه مرته , تصدقون؟؟؟ .بل أن بعض المشايخ أنفسهم ربما يومها ما تعلموا قيادة السياره , ولا فكروا يتعلمونه , وغيرهم هو اللي يسوق بهم ..
في أوضاع مثل اللي ذكرت وغير ما ذكرت اجتهدوا جزاهم الله عنا كل خير وأفتوا بفتواهم اللي تمسك بها أتباعهم الى اليوم بالرغم من تغير الظروف وتغير العقليات..

وفي الختام أحب أختم بتنبيهكم ولفت انتباهكم لخطر غلاة العلمانيه في منتداكم الطاهر , غلاة العلمانيه اللي يمثلهم بينكم تيس العلمانيين القارح وفحلهم الكبير المخاوي .
المخاوي اللي يعتبر العلماني في منطقه ومنظوره , أنه هو كل رجل مهرجاني كثير الكلام يعطي الناس علومه قبل تطلبه , وياخذ علومها حالما يقابلها مثل طبوع العرب وسلومها , وسلامتكم..

[سنا الهجرة]

هههههههههههههههههههههه
الله يسعدك يالمخاوي .. أشوفك لين الجانب هذي الايام .. مدري وش وراك ؟؟
الحاصــل >
أنتم باقي تسولفون في هذا الموضوع وانا غفلت عنكم
الله يخارجنا >> صدق اللي يقول ان العرب لايمكن يتفقون

المهم يالربع >> ترى اللي يسمعكم الحين يقول اننا منقسمين صفين ( محافظين .. وعلمانيين )
لكن الحقيقة ان ما بيننا ولا علماني واحد .. ولا نص متصهين ولا ربع ملحد

أنا مرة من المرات دخلت موقع إدعى أصحابة انه ( منتدى العلمانية السعودية ) ويوم تصفحت بعض مواضيعة
والله لا يوريكم >> يقولون كلام يحوم الكبد ويرفع الضغط المنخفض .. فـ بارك الله في ربعنا وعلومهم قدام ما في هذاك المنتدى الخايس

وبالنسبة للحريم وسواقة الحريم >>
اذا سمح لهم ولي الامر بالسواقة .. اللي يبي حرمته والا بناته يسوقون بكيفه .. ويتحمل ما يجيه