يالله اني طالبك

[مغترب]

يالله اني طالبك يالله اني طالبك يالله اني طالبك يالله اني طالبك يالله اني طالبك

يالله اني طالبك فالممات وفالحياه
رحمتك ياخالق الخلق يارب العبيد

تستر احوالي ومن مدتك مدة غناه
طالبك يارب لاتجعل محمد وحيد

فزعتك يارب لانادوا العالم صلاه
طامعٍ في رحمتك لاحصل يوم الوعيد

قلتها واللي بعدها ولو مابه نجاه
واجبي توضيح علمٍ وانا علمي وكيد

مير قبل ابدا واسوق المعاني للدهاه
لعبة الشطرنج ماحلها عقل البليد

سود الله وجه رجلٍ تحت كم العباه
لو فتل في شاربه مانحصل منه فيد

في ذرا بنتٍ تعلت على روس العصاه
هقوته فالبنت دايم لها رايٍ سديد

ما درى بكره تبيعه بعد تلعن ثواه
مثل غيره عقب ماكان في عرق الوريد

كن عينه ماتشوف الضحايا للفتاه
مايجيد الكيد والبنت من قبله تكيد

والله اني خايف انه يجي يوم الذكاه
لايغره عشقها وان حكوا عشقٍ يزيد

لايقول الهم زايل وانا مثل الحصاه
لو حسب لـعبيد ما ظنتي حاسب لـزيد

راس علمٍ مثل سمٍ وانا قاصر مداه
كل مانرسل رساله توقع فالبريد

قلت والباقي من الشام لا حد السراه
ماحسبت الا حساب الولي حيٍ مجيد

يالله انك تلطف بـحمص واللي في حماه
فزعتك يوم ان يمنى العرب مثل الجريد

ياعظيم الشان تقضي على كل الطغاه
انت ملجانا طلبناك لاتبقي مريد

كلنا من دون بابك ولا نبغى سواه
من طغى فالكون لاتمهله يومٍ جديد

تجعله في نارك الموقده يلقى جزاه
مارحم خلقك فلا ترحمه جعله يبيد

وانصر المومن ومكنه والكافر فداه
ديننا الاسلام ننصره لو رحنا شريد

لو يوقف من يوقف نبا نكسر عصاه
ماشغل فكر الخلايق ولو قالوا شديد

ادري ان الحق يوجع وانا عبدٍ عطاه
خالقه قلبٍ شجيعٍ ولا يمكن يهيد

ليتني في عهد ابو بكر واصحابه معاه
ليت موتي كان في عهد هارون الرشيد

وقتها بالسيف نحميك يانهج الدعاه
ديننا والا الشهاده و طوبى للشهيد

راح وقت العز والمجد واصحابه وراه
مابقى الا وقت غنوه وتطبيل ونشيد

يامدور للمكاسب ورى بومه وشاه
يشهد الله من وراهم ترى ماتستفيد

من بغى علمٍ يفيده يطبق للوصاه
وان تنكد في حياته ترى بكره سعيد

لايفرط في صلاته وصومه والزكاه
وان رزقه الله يزور الحرم لو هو بعيد

لا يعق اللي تهل المدامع في رجاه
يوم عنها غاب مده وصارت وسط قيد

لايبيع اللي تعذب لجل يصرف علاه
شايبٍ همه سعادة عياله كل عيد

لايسوق الساق فالسوق شاين مبتغاه
من يدق الباب بـابـه يدقونه بـ حيد

قالها اللي جر صوته وغنى من بلاه
بعد فارق دار ربعه وقرب للصعيد

شاعرٍ لو كان قلبه حجر همه وطاه
لاطرا داره على ماطرا حد القصيد

داري اللي مثل نجمٍ تعلا في سماه
ديرة الاحرار والجود والمجد التليد

اه ... ياداري (ثماله) ... واهٍ ثم اه
من بعدها كني اللي فقد كل الرصيد

مثل راع العين من بعد شوفه في عماه
اشهد انه عاش في ضيم ما سره عضيد

تقصر ايدينه ليا جاه رجال ونصاه
خانته دنياه يوم الزمن طبعه عنيد

وان بغى طرقه بعيده تبا تقصر خطاه
بعد ماعاش بحياته يصايد من يصيد

ماتهنا في فطوره ولا يبغى عشاه
عايفٍ وقته وفي دنيته عايش زهيد

والختام ازكى صلاتي وزيدوا فالصلاه
ياصلاة الله على المصطفى خير العبيد

[سهيل2012]

في ذرا بنتٍ تعلت على روس العصاه
هقوته فالبنت دايم لها رايٍ سديد !!

صح لسانك أيها الشاعر المغترب ، فقد جسدت واقعا ملموسا واضحا للعيان ..

اللهم انصر اخواننا المستضعفين في الشام ، وأصلح أحوالنا وردنا إليك ردا

جميلا يارب العالمين ..

أعانك الله أيها المغترب أنى كانت غربتك ، وأعادك سالما غانما إلى وطنك وبني قومك

وتقبل مروري .

[مغترب]

صح بدنك اخوي سهيل ...تشرفت بمرورك
والله يخارجني من اقتباسك هههههه

[صقر قريش]

صح لسانك
وعلى القوة دايم

[ابوسيفين]

صح لسانك يابن العم
كل بيت منها بقصيده
راقت لي وقرأتها اكثر من مره واستحييت ان اقتبس منها بيتا دون اﻻخر

[مغترب]

صح بدنك يا صقر قريش
وصح بدنك يا ابو سيفين

[نديم االألم]

صح لسانك كفيت ووفيت جزلة وتستاهل تحية وفية
عادل الزايدي