فنجال .. وعلوم رجــــــال .. !!

[ابوسيفين]

المشاركة الأصلية كتبت بواسطة سهيل2012

[size=5]
وعلى طاري طيب الذِكر مصطفى .. وعلومه ..

هذا مصطفى سلمك الله جاه ضيف من جماعة العربان وأراد أن يكرم سباله .. ويدسم شواربه

وراح للمجلبة ( الماقفة ) يبي يشتري الخروف الزين السمين .. وكل ما وقف عند خروف وسامه

من راعيه قال : بـــ 1000 تركه وراح للي جنبه .. كم يا ولد .. قال راعيه بـــ 1200 تركه وراح للثالث

كم يا راعيه ؟ قال : بــ 1500 عصب مصطفى وزعل وراح .. قال واحد منهم : وين رايح ؟؟

قال لهم بصوت ٍ عال ٍ : ( للجحيييييييم ) .. بلهجة مصطفى !!


قال البدوي : أبك القحيم اللي أنت تباها لو تطبخ لحمها يومين ما نجح !



وقد تذكرت قصة مشابهه لما سبق .. يقول راويها :

واحد حضرمي ناسب له ناس من القبائل المعروفة .. وذاك اليوم يجونه أرحامه في البيت ..

ويوم شافهم وهي تلزمه الراعة .. ولكن وش يسوي ؟

لا بد أن يكرم أرحامه .. ويقدم لهم ما يليق بهم ويجمله معهم ....

بتّل الرجال .. وعلى سوق الجِمال .. ويسوم الحشو .. بكم الحاشي يا ولد ؟

قال راعيه بـــ 5000 آلاف ريال ! هوّن .. قال أذبح لهم حسيل .. أرخص !!

راح سام الحسلان .. لقاها من ثلاثة آلاف ريال ... هوّن منها ... عوّد على الخرفان .. لقاها من

ألف ونص .. ومن ألف ثلاث .. وأهونها من 1000

تركها .. وعلى التيوس .. ولاها من ثمان مئة .. وزود

هوّن أبو حضرم .. وعلى سوق الطيور !!!!

ويشتري له ( ديك ) بعشرين ريال .. وياخذه على البيت .. ويدخل المطبخ .. ويحضّر السكين ..

والديك يفرفر .. وهو يذبحه ويقول :

(( فرفرّ ما تفرفر يا فرفور ... من ناسب الأجواد يفعل هكذا .. !!! ) .

من زمان وانا أسمع مقولة (( من راحم الاجناب يصبر على ذبح الادياك )) واثرها لحضرميّك ؟؟

ولأن الشيئ بالشئ يُذكر يقولون إن فيه واحد من حددانا تزوّج له شاميه ، وكل مازاروه أرحامه قدّم لهم مايبيّض الوجه من جذعان الطايف المعروفه ، وكل مرّه طبخه غير وبعد العشى مسامره ومجالسيّات وموانسه تسر الخاطر
وبعد خمس أو ست سنين أبدت له زوجته رغبتها في زيارة أهلها تبي تشوفهم ويشوفون عيالها ومن محبّته لها شرى من الهدايا مايجمّله ويجمّلها مع أهلها وركب سيّارته ولا دروا أرحامه ذاك اليوم إلاّ وهو عند الباب وفرحوا به وببنتهم ورحبوا به وقعد فالليل ينتظر كرامة أرحامه (( خوال عياله )) والرجّل يفرح بطيب خوال عياله مثل فرحه بطيب عيال عمّه ويمكن أكثر 0

ما أطول عليكم جا وقت العشا وجاب راعي البيت السفره وحطّها بوسطهم ثم غاب شويّه وإلينّه جايب طُرشي ووزّعه على السفره قال خويّنا شكل العشى سليق ، وتأكد له الأمر يوم انحطت صحون الليمون المخلل ، وبعد شوي وهم يحطون صحون صغار فيها عسل قال لا والله إلاّ تكلفوا طبخوا سليق ومندي في وجبه وحّده الله يهديهم ، لكن تغيّر عليه العلم يوم حطوا صحون الجبنه ولايمديه يفكّر وهم حاطّين صحون الحلاوه وضربات متلاحقه لم يعد يستطع معها التفكير إلاّ بعد أن رحّب به معزّبه وإذا بضِيْفَتْهُمْ نواشف 0

وبعد العشى حبّوا يسوون له جو مثل جو المجالسيّات وبدو يجرّون موّالات شاميه ، ويوم جا الدور عليه قال أنا ما أعرف لطروقكم هذي لكن أبجيب لكم ردحه مثل اللي عندنا قالو له تفضل ، قال : ــ

يا ارحمانا يقطع نباكم 000 يكّالة الحنبص ترانا 0000 ماناكل الحنبص كماكم 0000 لابد من حزّه تَجُونا 0000 ونقدم الحنبص عشاكم 0 وسلامتكم

[سهيل2012]

وبعد العشى حبّوا يسوون له جو مثل جو المجالسيّات وبدو يجرّون موّالات شاميه ، ويوم جا الدور عليه قال أنا ما أعرف لطروقكم هذي لكن أبجيب لكم ردحه مثل اللي عندنا قالو له تفضل ، قال : ــ

يا ارحمانا يقطع نباكم 000 يكّالة الحنبص ترانا 0000 ماناكل الحنبص كماكم 0000 لابد من حزّه تَجُونا 0000 ونقدم الحنبص عشاكم 0 وسلامتكم

بيض الله وجهك وصح لسانك يا أبو سيفين .. أنا أشهد إنك ضحكتنْ بها السالفة الشاميّة ..

وعلى طاري الردحة والعلوم الغانمه اللي قالها عاني الشوام .. ذكرت قصة قديمة حصلت لمصطفى ..
يقول الراوي : مجموعة مدرسين يدرسون في هجرة ومعهم واحد مصري مدرس رياضيات اسمه ( مصطفى الشرقاوي ) ..
انعزموا للعشاء عند أهل الهجرة ذات ليلة .. هاثمك كشخوا السعوديين ولبسوا مصطفى ثوب من ثيابهم وكملوها بالغترة والشطافه ( العقال) .. ولاه ما تقول ألا سعودي !

وصلوا عند جماعة الربع وقلطوا .. ودار الفنجال وعلوم الرجال .. والقصايد .. وتعرفون الجماعة يرددون آخر البيت .. مع هزة الرأس تجاه الصدر قليلا ) .. !

يالله ياربي عليك التسانيع ( ييييييييييييع )
وإن ضاقت البيبان بابك وسيعي ( إييييييييييييييعي )
كريم يابرق ٍ نخيله ورى الريع ( يييييييييييع )
ونخيّله في أسناع وادي النقيعي ( إيييييييييييييعي ) وهكذا !

وشوي ورى الدور واصل مصطفى ...

قالوا الربع بصوت ٍ واحد : يا الله يا مصطفى .. اتحفنا يامصطفى .. الدور عندك .. قووول ....

تفاجأ مصطفى وقال :

ياقمااااعه ما عملتش حســـــابي ( قالوا البدو : آآآآآآآآآآآآآآآبي )

أنا ما عنديش أصيييييييييده ( قالوا : إيييييييييييييييييييييييده )

كمل يا مصطفى كمل ..كمل !!

[سهيل2012]

هذه القصة لا أجزِم بصحتها .. رواها أحد الشيبان لنا زماااان منذ ما يربو على ثلاثين عاما ..

وإن كانت من نسج الخيال .. فقد حبك الشايب ( رحمه الله ) أحداثها .. وأبدع في روايتها ..

يقول الشايب : هذا واحد ٍ من الملقف لقي ثلاثة أشخاص جالسين بجانب جدار .. وكل واحد ٍ

منهم معه حصاة ( حجر ) ويخبط بها على صدره ويقول :

أنا أستــــاهل !!
أنا أستــــاهل !!
أنا أستــــاهل !!

فسألهم من باب اللقافة والفضول : ماذا بكم أيها الرجال ؟ وماذا حلّ بكم ؟؟

فلم يُعِيروه اي اهتمام .. واستمروا في عملهم ...

وفي اليوم التالي عاد إليهم .. ( ولاهم على شغلهم .. ) ما تغيّر شيء !!

فكرر السؤال : علموني .. وش السالفة يا الربع ؟ سلامات !!

فلم يُجبهُ أحدُ .. واستمروا .. يخبطون في صدورهم .. وبصوت واحد .. أنا أستاهل .. أنا أستاهل ...
وفي اليوم الثالث مرّبهم .. وطرح السؤال المعتاد .. ولكن ما أحد يمّه !!

فماذا صنع الملقوووووووف ؟

أخذ له حصــاه .. وجلس جنبهم .. وقعد يخبط في صدره ويقول : أنا أستاهل .. أنا أستاهل .. !

وفجأة ! تكلم أحدهم قائلا له : أنت ما تستاهل !

قال : ليه ؟

قال : لأنك ما سويت مثلنا ... لكن إذا تبي تعرف قصتنا وما حدث لنا .. قوم أنا أعلمك ..

قحص الملقوف زي الذيب الأشهب .. وتبع الرجال .. الذي أخذه بيده إلى مُرتفع قريب وصعدا سويّة .. إلى أعلاه .. ومن قمة هذا المرتفع قال استعد .. وتمسك في أذانيك لأنني رايح أصفقك على ظهرك وبعدين تعرف وش اللي صار لنا يا أبو لقفه !!

وما هي إلا ثوان ٍ إلا وصاحبنا صاكه بأقوى مامعه من تحت ( قلّته) ألا وهو طايح في هاك البستان الجميل والجنة الخضراء اللي ما توصف .. خضـــار وثمار .. وفنجال وعلوم رجال ..
وبينما هو يتجول بين أنحائها وجد هاك الشايب الأبيض صاحب اللحيَة البيضاء الطويلة .. والذي رحب به في هذه الأرض الخضراء .. ووضح له التعليمات وأعطاه النصائح قائلا :

كلْ واشرب وانبسط .. لكن ما لك ومال خلق الله .. لأتسأل أحدا عمّا يصنع .. ولماذا ؟

دع الخلق للخالق .. واترك ( اللقافه ) !!

هز رأسه أبو لقفه وقال للشيخ : طيب .. إن شاء الله أكون عند حسن ظنك ..

فهل يلتزم أبو لقفه بهذه النصائح التي أسداها له الشيخ الأمين على هذه القرية الخضراء ؟

أم يغلب الطبع التطبع ؟؟؟

للأسف لم يلتزم أبو لقفه بهذه النصائح ( وأبو طبيع ما يترك طبعه ) ..

بدأ أخونا يتجول في هذه الجنـّة الخضراء .. ويتأمل في عظيم صنع الله .. يأكل من الثمار اليانعة

ويشرب من المياه النابعة الصافية .. وبينما هو في هذا الحال إذ وجد رجلا كبيرا مفتول العضلات

عريض المنكبين بارز الأنف جاحظ العينين .. يصعد إلى أعلى شجرة توت عملاقة فاجأها خريف العمر !
وقد يبست معظم أوراقها .. وهذا الرجل العملاق يتسلق جذعها .. ويتنقل بين أغصانها المتهالكة .. بخـُطى متثاقلة .. ويعود بورقة ٍ واحدة ٍ فقط .. ويحمل هذه الورقة إلى مكان بعيد ..
ويضعها في كيس كبير .. ثمّ يعود أدراجه ... ويصعد مرةً أخرى إلى أعلى الشجرة ويقطع ورقة يابسة جديدة .. ويهبط أرضا .. وإلى نفس المكان ويضع الورقة هناك ويعود .. وهكذا عمله طوال اليوم !
ما تحمل صاحبنا هذا الموقف وصاح في الرجل قائلا :


أنت خبل ! وش ذا اللي مسويه ؟


هشْ غصون الشجرة بيدينك ولا بالمحجن ( المهش ) ألين تسقط جميع الاوراق اليابسة .. ثمّن
اجمعها في الكيس مرة ٍ وحدة .. وريح نفسك من ها التعب !

ما سمع كلامه الرجل ..واستمر في عمله .. في صمت .. وشوي ورى أمين المزرعة الشايب

الأبيض أبو لحيه بيضاء معه ..


قال : وش سوّيت يا الملقوف ؟

قال أبو لقفه : شوووف المهبول هذه كيف يسوي ؟

قال الشايب : لا يكون كلمته !

قال : هيو الله كلمته ونصحته ..

قال هذي فرصة .. وباقي لك فرصتين !

انتبه لنفسك .. لا عاد تتلقف .. إن كان تبي تعيش في ها الجنـّه معززا مكرما ... اترك اللقافة !


فأجابه : طيّب آخر مه .. ما عاد أتعودها .. تبتْ .. تبتْ ...

وفي الحلقة القادمة - إن شاء الله - تطالعون موقفا جديدا لأبو لقفه !

لا تروحوووووووووووون بعييييييييييييييد .. وفالكم طيّب .

[النادر]

افهم منك انه باقي ثلاث حلقات ثنتين للقافه والثالثه لنتيجة اللقافة اللي بتخليه رابع اربعه

شفت وش سويت بنا خليتنا نتلقف على السالفة هههههههههههه

متابع وابا اتوب عن غيرها

[سفن دايز]

يعطيكم العافية

[سهيل2012]

والثالثه لنتيجة اللقافة اللي بتخليه رابع اربعه

الله يرج أبليسك يا النادر ...

لا تحرق علينا الفلم !

[سهيل2012]

المشاركة الأصلية كتبت بواسطة سفن دايز

يعطيكم العافية

الله يعافيك ..

مروركم أسعدنا .

[الحاج سلام]

عجل يا سهيل بارك الله فيك ترى طالت السالفه الا اذا ودك تسوي منها فلم مكسيكي .

[النادر]

بطريقتي بعيدا عند الديابيج اللغويه او العصيدة الشعبيه وسموها بكيفكم منهجية جديده للسوالف ان شئتم وتروها من صماصيم الدماغ قصة قديمة وصغتها بطريقتي وطازه على قول السودانين حااااااااره يازول

[poem="type=1 color=blue font="bold medium tahoma, verdana, arial, helvetica, sans-serif""]لي صاحب امس المساء جاب لي علم=يقول والعهده على راوي القول
فيما مضى قصة واذا ودكم حلم=معرض سوالف كلها هول في هول
الذيب خاوى له حصيني على سلم=يتناوبون القنص دول باثر دول
وماجاب واحدهم يقسّم بلا ظلم=بين الثنين وجايب الصيد مسوول
وابطو وهم بين القرى رزقهم هلم=مره دجاج ومرةٍ كبش مفتول
ومر الزمان وليلهم دايما بلم=والناس ضاقت والقرى همها ذول
وجابو كلاب وعينوا حارسٍ ولم=وضاقت على حلف الفلس عرض وطول
الين نادا الذيب وهو جايع ٍ شلم=يابو الحصين اقرب..تسمع لذا القول
سن الزمان اللي ضحك بان به ثلم=والموت يالحصني بدا يعزف طبول
تعال صارعني واصارعك ومن سلم=ياكل خويه مابها غدر وخمول
قال الحصيني ذا المسا اجيبلك علم=والا تصارعنا انا وانت لاحول
واخذ شوي وجاه يعدي وهو كلم=(قم صارع الكلبين) (انا باشغل الزول)[/poem]

[سهيل2012]

المشاركة الأصلية كتبت بواسطة الحاج سلام

عجل يا سهيل بارك الله فيك ترى طالت السالفه الا اذا ودك تسوي منها فلم مكسيكي .

وراك مستعجل يالحاج سلام الله يهداك ..

الجماعة شوشوا علانا .. أبو سيفين من جهه .. والشاعر النادر من جهة أخرى ..

حتى نسيت ما أدري وين وصلت !