هُنا محاورات سهيل مع شعراء المحاورة في المنتديات ..

[سهيل2012]

المشاركة الأصلية كتبت بواسطة رعد الجنوب

صح لسانك انت شاعر محاورة رائع

صح بدنك يا أخي رعد الجنوب ..

وعاد سهيل يحمل في جعبته محاورات جديدة حول ( سهيل والثريا )

سترونها هنا - إن شاء الله - عند تفرغي ..

فقط انتظروني !!

[سهيل2012]

محاورة سهيل القادمة - إن شاء الله - مع أحد الشعراء المعروفين ومدير أحد المنتديات ولم تخلو

كالعادة من ذكر ( حبيبة الألب ) الثريا !! والتي كانت المحور الرئيسي للمحاورة المذكورة ..

وربما تتكشف بعض الحقائق عن الثريا ..

تابعونا لاحقا وفالكم طيب !!!

فقط انتظروني !!

[الحاج سلام]

منتظرين ومنا الصبر ومنكم الوفا .

[سهيل2012]

بسم الله الرحمن الرحيم


(( المحاورة السابعة ))

وهذه المحاورة هي آخر محاوراة أخيكم سهيل في المنتديات .. وقد جرت أحداثها في منتصف شهر شعبان
الماضي مع الأستاذ والشاعر المخضرم / عبدالله المنصوري ( مدير منتديات مكتب التربية والتعليم بــ ...........) وهو شاعر نظم ومحاورات معروف من خلال المناسبات والفعاليات التي تقام في تعليم ......
والبداية كانت مع الشاعر / عبدالله المنصوري


عبد الله المنصوري
سلام من شاعرٍ يعرف حقـوق الـرجال *** للشاعر اللي مقدم للـثريا طـلب

انا ادري انك سهيل وماعلى اسمك جدال *** لكن قلي من اللي يعسفون الصعب


سهيل
يا مرحبا من سهيل وعرفِكم ْ راس مال **** يالشـاعر اللي بقــانونه وسلم العرب

لو هي بســفك الدّمى ولا بخشمْ الريــال **** لن كـان طوّعتهـا وأغرقتهـا بالذهب


عبدالله المنصوري
ونعم بحـالك لكـن المـاء يفت الجبال *** والضامي اللي يمـر النهر مـاقد شرب

وسط السماء نجم والاخرى تروح زوال *** لكـن دخيلك تـرفق لايضيع التعب


سهيل
أبا آرد العِدّ واشرب من قراح ٍ زلال *** مــا همنـي لو يصـير الدّم ليـن الـركـب

الجـوع ما يقطعهْ يـا كود لقمهْ حـلال *** يا حلوها من سنام شعيل في أول رجب

عبدالله المنصوري
دور علاها وتلقاها على كـل جال *** واللي يناظـر سما يطرح عقاله غصب

انا رميت الاجـابه في يدين السؤال *** لكـن اشوف العتيبي مايكب النشب

سهيل
سلامة الرأس تكفي لو يروح العقال *** أعَلِمِك وش حصل ولا تعرف السبب

حقيـقة سـهيل مـا ظـني تعوّد خيــال *** وأنته جوابك يا أبو نياف فيـه العجب


عبدالله المنصوري
حـقيقة سهيل ماتفرح رجـال الشمال *** وانا جوابي قريته في غلاف الكتب

واللحم فوق الثرى والدود جايه مجـال *** والادمي بين منطـوقه وفعله غلب


سهيل
أنا جـنوبي عشــقتْ النــجمه أم الــدلال *** لـكـن عيّـا البــخت والحـظ مـا الله كـتبْ

وش ياجد الدود في جســم ٍ غدا كالخِلال *** جلدْ وعظم والضلوع العوج مثل الخشبْ


عبدالله المنصوري
الدود مـامـور والدنيا حرام وحلال *** واللي مشى في طريق الحق فاز وكسب

وانا اشوف البناء وصل لحد الكمال *** وابن النفيعي طـرب وابن النفيعي طرب


سهيل
كسبــان كسبـــان من شجع فريق الهلال *** واللي يشـجع فريق النصر صـدق انـكبْ

وابن النفيعي ما شجعهم على كل حــــال *** يشــجع الرااااااااقي اللي فوق هام السُحبْ

عبدالله المنصوري
الرااااااقي اللي تقوله ضيعـوه العيال *** لو انهـم لعبوا بجد انتصر ما انغلب

وختامها ياسهيل يطيب معـك المقال *** وتطيب لي معرفتكم ياعريب النسب


أرجو أن تكونوا أن قد استمتعتم بما ورد بين ثنايا هذه المحاورة وإلى اللقاء في محاورات قادمه إن شاء والسلام عليكم ورحمة الله وبركاته .

[الحاج سلام]

بيض الله وجهك اشعار جميلة ومنوعة ، وسعت صدورنا يا سهيل ونشطتنا صح لسانك ودام بيانك .

[ابوسيفين]

صح السانك وعلا شانك مبدع انت وخوياك

[سهيل2012]

المشاركة الأصلية كتبت بواسطة الحاج سلام

بيض الله وجهك اشعار جميلة ومنوعة ، وسعت صدورنا يا سهيل ونشطتنا صح لسانك ودام بيانك .

وجهك أبيض يا الحاج سلام .. وصح بدنك ولن أبخل بأي محاورة أتوقع أنها تعجبكم وترضي ذائقتكم الرائعة ..

[سهيل2012]

المشاركة الأصلية كتبت بواسطة ابوسيفين

صح السانك وعلا شانك مبدع انت وخوياك

شكرا لحضورك الراقي ..

[سهيل2012]

(( المحاورة العاشرة ))

وموضوعها حول خافي الذِ كر فيليكس ونقزته المشهورة .. والثريا ..
مع الشاعر المقدام من شعراء قبيلتي والبداية عند سهيل ..

يا الله إنك لا توفق خواجتنا فيليكس = طامع ٍ يبغى الثريا وهي ما هي بـ له
كان ربي وفقه ثم أخذها وين أطس = كان أخذهــا في طـريقه ووداها هله

المقدام

الله اكبر يا سهيل ويش جاك وش تحس=راح همك يم من بالجمال مدلله
صاحبك فيليكس يا صاحبي يبغى يعس= باذن ربك رحلته بالنجاح مكلله

سهيل
الخواجه ما نبي له يا ها المقداااام رس = مذهبه ما هو بطيب في حلقه سلسله
وجهه أحمر دايري مير عينه عين بس = الله إنه وسـط وجهه يهب له قنبله

المقدام
الخواجه يا سهيل له سنين منغمس = صاحبي وصاحبك ليش انت ما تتخيله
اه يا وقت وحنـا معه نلعب تنس = كيف تالى الوقت يا ابن العرب تتجاهله

سهيل
دونها ضابط خفر دونها جند الحرس = دونها المقدام وسهيل راع الاوله
المدرس خلص الحصه ودق الجرس = كل رجال ٍ يجازونه بحسب عمله

المقدام
الخواجة فى علوم الفضاء راكب فرس= وانت يا راع الغنم فيش عقلك مشغله
كل ما شفتلك زول (ن) تحرك تلتمس= تشتغل فيك المكينة ونـورك مشعله

سهيل
حبها في القلب من عشرة سنين انغرس = والله إني خايف أموت حيل من الوله
ما غدااابي ثم ضيــعني ألا أبو هلس = مير قصر علمك الزيـن ولا طـوّله

المقدام
تو ما دليت درب العرب يا بو انس = الخواجه ما يعرفون هذى البهلله
يا حاسفه يا عميلى على وقت عمس= ضاعة الهقوة مع اللى غدى فى البهذله

م/ن

وسلامتكم ولا يهون فيليكس النمساوي أبو قفزة ..
وإلى اللقاء في محاورة قادمة إن شاء الله ..

[سهيل2012]

بسم الله الرحمن الرحيم

وهذه محاورة بيني وبين شاعر اسمه / مقدام العتيبي


مقدام

سلام ردية من خاطري يا سهيل
ردية يشمل الحظار مضمونها

مثل العسل طعمها والكيف بن وهيل
من شاعر يبدع القيفان بالحونها


سهيل

دام البقى يا المسلم وأنت صاحب جميل
عني وعن من حضر بالأذن توحونها

يا صاحب الهيل ما أنته يالعتيبي بخيل
سوق الفناجيل للي يستحقونها


مقدام

طبيت فى ديرتك ودي ادور حصيل
لكن وش هالصلاة اللى تصلونها

ربعي هل الطايلة لاهى تحيد وتميل
ضيعت يا سهيل سلم القوم وقانونها

سهيل

طبيّت فــ / الموقع اللي ماش زيّه مثيل
عليه وبل السحابه هلّت مزونها

والنعم وأنا زميلك وأنته أحلى زميل
وسهيل له غاية ٍ ما ينقصر دونها


مقدام

أشوف بعض العرب ويا دبشهم محيل
مدري من الوقت والا علوم تخفونها

ايامنا يا سهيل ما فيه شى يستحيل
لا تقول مدرى عن اللى تجر فى اردونها


سهيل

ما شفت صفق الهوا لقّح طوال النخيل
وعيونكم حِوْل ما ظني تشوفونها

وأنته تعرّضت يا مقدام عابر سبيل
عَمْلّتْك ما ربعك عتيبه يسووّنها


مقدام

صفق الهواء من قديم الوقت عرفك قليل
نتاجها دايم ابحثلك تزمونها

من شب نار الحطب يصبر وقلبه عليل
فى جادة الطيب مع ربعى تعرفونها

سهيل

تضحك على سهيل ما تقدر ترى مستحيل
لكن خل القدم تمشي على هونها

لن قاله الله لقيتك في طريق الجبيل
لاذكرك سالفة ليلى ومجنونها


مقدام

ثن الركايب تراك اخطيت درب الدليل
شوتات ( مسي ) فلا تقدر تصدونها

ليلك معى يا طويل العمر ليل طويل
لن عشت لنسيك قصتها ومظمونها


سهيل

أثْنـِي ركاب الفكر في كل يوم ٍ وليل
واللي سواتك يجون نخلص ديونها

لبست ثوب الشياكه فوق ثوب الأصيل
لكن ما جمّلت مقدام فــ / عيونها


مقدام

لنا مواقف على الطالات يابو خليل
والا انت حملتك يالمقرود يشدونها

حنا ليا من حضرنا الخيل تصهيل صهيل
تعرف اهلها وتعرف من يعنونها

سهيل

إلكم مواقف تكاسي صح يـا بـو نبيـل
واللي برخصه عمومي جو يسوقونها

أسهر مع الهم والهوجاس والله وكيل
لكن بنـت السمـا مـا تضحـك سنونهـا




مقدام
مواقف الطيب ناقفها بشكر جزيل
نبنى خيام الوفاء محد يبنونها

اسهر مع الهم والهوجاس ليلك مهيل
مانت قريب من اللى تهز فى امتونها


وإلى اللقاء في محاورات قادمة إن شاء الله .