هُنا محاورات سهيل مع شعراء المحاورة في المنتديات ..

[سهيل2012]

بسم الله الرحمن الرحيم

(( المحاورة رقم 19 ))

محاورة جديدة قبل أسبوعين تقريبا بين سهيل وأحد ابناء عمومتي الشاعر /
سافر مسفر العتيبي .. والبداية من سافر حيث يقول /


سلام الله لبو احمد ساري طرقي وهو عجلان
يصادمني مع الروحه يصادمني مع الجيه

على شانه نبا نهدم بيوت ٍ مالها سيسان
أنا خائف على رجله تلوى فوقها الحيه

سهيل

ألا يامرحبا يالشاعر اللي تعرف العنوان
تعال ادخل مع البيبان حط يديك فــ/ يديه

تبي تهدم بيوت الطيبين اللي لنا جيران
تعوذ من شياطينك يا سافر واحسن النيه

سافر

يدوم لك البقا يا اللي ترحب والخطوط تبان
وأنا شايفك بعيوني ما بين الشمس والفيّه

ترى جيرانكم جيران ياللي مفتري فتان
أنا ماني من اللي يعرض الحسنات بالسية

سهيل

خطوط المملكه توصِلك يا سافر ليا عمّان
مع الزرقا يجيك الخط والوجهه شماليه

ابه خط ٍ يبا يوصٍلك لين تطب في لبنان
لكن احذّرك من التضاريس الطبيعية


سافر

فــ / وسط المملكه عايش ولا ظامي ولا جيعان
ولا لي وجهة ٍ تبعد عن حدود السعودية

عمى ما أدري مفتّح ما تشوف النار والدخان
على رأسك تدور الدائره 100 على 100

سهيل

بغيتك يا العتيبي تشبع من الخوخ والرمان
ما دام ان الدير في أقطاركم دهْر وسناويه

أدوس النار والأخطار سلم لربعي العتبان
وأحط السيف أبو حدين في روس الحراميه


سافر

أشوف الخوخ الرمان أنا ما أبغى لكم عنوان
دياري مثمره وبطيبها وقطارها حيه

ترى ربعك عتيبه حشام وتقفل على الدكان
وبانت لي حقايق منك في خط ٍ وبرقيه


سهيل

ترى الخط العمومي بين أهل رابغ واهل عسفان
يوصّلك المدينه كان به رخصه عمومية

أبو دكان مقضاته شراها بأرخص الأثمان
يجونه شفتهم بالعين مرّاره وطرقيه


سافر

نعرف خطوطنا فــ / المملكة يالعاشق الطفران
بيوت الله ناصلها بدون هذي وهذيه

تحمل ذمتك علوم ما عندك لها برهان
عيونك غشتك ياللي سهر عينه غراميه


سهيل

أنا مغنيني الله وانشد المقدام مع جبران
خلقنا الله يا ابن العم يا سافر غناويه

بريه ذمتي ياللي تعرف الزود والنقصان
ولا عمري يا ابن مسفر جلست مع الحقاويه


سافر

عناك الله مع اثنين وبانت صورتك ألوان
غناوية فــ / بعض أمور وبعض أمور سرية

تبري ذمتك في مجلسك يالعاشق الطربان
ترى اللي شار لك بالعلم في ثوبه أماريه


سهيل

رجال ٍ فــ / اللوازم تنطح الفريّس فــ / الميدان
ولي صورة وبالألوان يا الطيّب خياليه

وراع الثوب لابس ثوبه الأبيض على الأمتان
يسج أقدامه الثنتين من شقصان لا .. ليه

سافر

تروح يمين ولا يسار أنا بأقول لك غلطان
الك صورة مع الألوان يبغالك بعد كيه

وراع الثوب الأبيض قام يعلجكم على اللحيان
يسج اقدامه الثنتين لكن ماش حريه


سهيل

يديني دون حلقي والفشق في محزمي مليان
ما عندي للعِدا رحمه ولا فــ / القلب ماويه

أبا أربيك .. وانسيّك خط يمر مع نعمان
وأردك غصب مع خط البهيته واليمانيه

سافر

يدينك ردها فــ / الجيب وانت ضعيّف ٍ تعبان
هذي علومك سجلت يا طاق طاقيه

هزيل القول تنطق به ولا أنت مقابل الشجعان
تبا ترمي بنفسك فــ / الخطر فــ / دروب عبرية

سهيل

أبا أطلقها يدين تقرر الشوكه على الميزان
لكن يديك يا سافر تورق فــ / الملوخيه

هزيل القول ما جبناه تعرفني فصيح لسان
يا راع الموتر اللي سرعته سرعه جنونيه


سافر

يدينك مطلقه في البحر يا ظامي ويا عطشان
تفرج فــ / البحر بالليل مره صبح واعشيه

أنا اللي مقرر الميزان يا مغرم وياعشقان
مالي نظر معك مره وأبا أمسّك بيديه


سهيل

تقوله والبحر فيه الكنوز اللول والمرجان
وفيه الحوت الأزرق ياكلك يا ابن الأفنديه

طعام سهيل والبدو السمن والتمر والقرصان
وأهل جده عشاهم يغمش ومنتو وطعميه


وسلامتكم وإلى اللقاء في المحاورة رقم ( 20 ) إن شاء الله .....

[حسن عابد]

ماشاء الله عليك وصح لسانك ومن معك

[سهيل2012]

المشاركة الأصلية كتبت بواسطة حسن عابد

ماشاء الله عليك وصح لسانك ومن معك

أحسن ما قلت يا أخي حسن ..

صح بدنك وأرجو أن تكون تجربة سهيل البسيطة جدا راقت لكم ..

[سهيل2012]

بسم الله الرحمن الرحيم


(( المحاورة رقم 20 ))

محاورة بين سهيل وشاعر من الجماعة .. معرفه ( الساهر ) ..

الساهر
سلام تسليمه من البال الوسيع ** تسليمة الاصحاب عند اصحابها
الشك زايل نشترى ولا نبيع ** ياهل خيام (ن) ماتطيح اطنابها


سهيل
يا مرحبا في صيف ولا في ربيع ،،،،،،،، ترحيبة مثل العسل جينابها
الشك زائل وأنت وانا نستطيع ،،،،،،،، نرجع السكين جوف نصابها


الساهر
خلك علي مهلك مع الخط السريع ** الناس فى لحضه تثور اعصابها
والله ماناكل طعام من ضريـــــــــــــع** اللي خلطها شك مانرضابهـــــا


سهيل
وانته على مهلك وزبدك لا يميـــــــع ،،،،،،،،،،،، المشكلة حولك تعرف أسبابـها
يا اللي تبا ترقى على الحيد الرفيع ،،،،،،،،،،، قدامـــــــك ذياب تحد أنيابهــــــا


الساهر
الديره الي دونها باير صنيع ** وش عاد ابى من وعلها وغرابها
ياسهيل انا مشيتها مع كل ريع ** ماهمني روس العرب وذنابها


سهيل
قدم دليلك والمــــذاهب ما تضيــــــع ،،،،،،،،،،بين الرجال اللي طوال أشنابــــها
وانا أدري إن الحق ما يرضي الجميع ،،،،،،،،،، وإن جاتك (مصيبه) تبا ترضابــــها


وإلى اللقاء في محاورة أخرى ..

[سهيل2012]

بسم الله الرحمن الرحيم

(( المحاورة رقم 21 ))



وهذه محاورة جرت أحداثها بين سهيل وشاعر من الجماعة .. معرفه ( أبو نائف )

والبداية مع أخي الشاعر / أبو ناااائف ..



ياسلامي سلام (ن) فيه شرهه وعتاب = = شرهتي فوق روؤس (ن) ما تحسب الملام

كل علم (ن) مسجل بالقلـم فـ / الكتـاب = = ويــــن فـعــل الأوائــل جـعـلـهـم للــرحــام



سهيل

مرحبابك ..خطا شــرهتك ولا صــواب ********* قص علمك وسلمك بعد رد الســــــلام

قدم كتابك وبيني وبينك حســـــــــاب ********* فيه سطر(ن) حلال وفيه سطر(ن)حرام


أبو نائف

البقا يالمرحب عّد وبل السحاب = = ياسهيل الكريم إبن الرجال الكرام

ودنا ودنا تكـمـل رقـوم النصاب = = لا تغـر الـعلـومـي يارفـيـع الـمقام



سهيل

باين إنك ..سواة الذيب مخلب وناب ******* ذيب(ن) أشهب سرى يقنب بخشمه عرام

بهر الـدلة ..يجيـــك الخبر والجــواب ******* ليــن شرابـــــها يفقه وينســــــــى الطعام



أبو نائف

إيه ذيب (ن) وبادي فوق كل مرقاب = مـير يالـذيب الأمـعـط صايدتك السهام

الـرسايل كـثـيـره ياعـزيــز الجـنـاب = واصـل (ن) ذكرها مكتب مديرك العام


سهيل

كان ذيب(ن) فقدامك رجال(ن) ذياب ********* بعد ما قام حظك حظــي اليــوم قام

خلها بالظروف ..وصــك للشر بـــــاب ********* عندنا سيف(ن) يقص اللحم والعظام


أبو نائف

نـعـم والله وفـيكـم ميـر لـيش الـغيـاب = = الـذيابه نـعـرف أقـسومهــا فـ الـسنـام

درة (ن) محتموها أشيوخها والشباب = = خل سيفـك محله وين روؤس الأقلام



وسلامتكم وإلى اللقاء في محاورات قادمة ..

والمحاورتان السابقتان منقولتان من أحد منتديات الجماعة .

[سهيل2012]

بسم الله الرحمن الرحيم


( المحاورة رقم 22 )



محاورة جديدة ( قبل أسبوع ) تقريبا بين سهيل والشاعرالمعروف / رعد الجنوب ..

والبداية كانت من رعد الجنوب .. القائل /


ياسهيل وشبك محتدي بالحيل
ماكن لك قلب وعقل ولسان

اكرب حزامك وانتبه للسيل
السيل زمه يقطع الوديان


سهيل

لأنك يا شاعر ما عَدلَت الميل
ميّلت يمك شوكة الميزان

سيل ٍ يغطرف مع طلوع سهيل
قدامه الثملان والعتبان


رعد الجنوب

والله مالي شف بالتفصيل
لمحه وحبه تزرق النيشان

الهاجري مايتعبه تحليل
بالذات لن حول على نعمان

سهيل

هذي تبا ياصاحبي تعليل
من غير لا زود ٍ ولا نقصان

الهاجري شغـّال ف التمويل
ف المصرف اللي بالربا مليان


رعد الجنوب

البنك له خطه وله تمثيل
والخط له ريشة قلم فنان

اسلم وسلم لي على التحويل
تحويل حسب الجهد يابو فلان


سهيل
نقدّم الفنجــال بن وهيل
والبنك ومديره تراه إنســان

اسلم وقلـّه جاري التحميل
ياصل بميسوره على العنوان

وسلامة الجميع وإلى اللقاء في محاورة قادمة - إن شاء الله .

[سهيل2012]

بسم الله الرحمن الرحيم

( المحاورة رقم 23 )


محاورة جديدة ( قبل أسبوع ) تقريبا بين سهيل والشاعر / نظام ساهر .. في أحد المنتديات

والبداية كانت مع سااااهر .. القائل :


مرحبــا من هجــوسنً قاسيه ماتلين

تضرب المعركه ماهمها لو تمـوت

ياسهيــل العتيبي لـــو تجــر الونين

ساهر يطاردك لو تنحشر فالبيوت


سهيل

والبقى يالمرحب والخواااافي تبيــن
ما تدش المعــارك لابسين البشوت

مد يمنــاك وأنا أصــافحك باليميــن
ارخ صوتك ما دام الناس حولك سكوت


سااااهر
المعارك لها قومنً وقايد فطين
والخوافي عليها عشه العنكبوت

برفع الصوت فوقك مره ومرتين
وأن بغيت المصافح رجلي اللي تشوت


سهيل

ندحم القوم يا ساهر بجنب (ن) متين
نحمد الله ربي من كبار البخوت

رجلك مقيدة بالقيد يا أبا الحصين
ارفع الصوت ثم إن قدر الله تموت


سااااهر
نســمـع أنــك قــوي عزوم ذيك السنين

مار ذالحين رمشك من بلاك أمحتوت

أبك انــا ذيب مـخلابــه ماكف اليديــن

وموتي أمره من الخالق بعز وثبــوت


سهيل

نفرش الصحن سمن ونلحِفِه بالسمين
ما نـقدّم لضـيف الله قرص الفتـوت

نرمـي الذيــب بالبندق وربك يعيـن
احذر من الرصاص بوسط حلقه يفوت


سااااهر

مــايـــرد الــكـــريــم ألا الـلــئــيــم الـلـعــيــن

ذك شاتــك بــدون تـجـيــب مـــوزه وتـوت

بـنــدقــك مـاتــصـيــب ولا تـجيـب ألك دين

وانت ورصاصك أبا أحبسك وسط تابوت


سهيل

الكرم طبعـنـا في كل حزّه وحيــن
نذبح الحِيل ما نأكل من البحر حوت

سِـلم أهلنا وطبع أجدادنــا الأولين
والبخاري دجاجه يتقاطر زيوت


ساااهر

الكرم من طبوع عتيبه المكرمين

ومن جحدنا كرمنا ماله إلا يموت

عيش جيلك وقبلك راحو الطيبين

بس كرت البخاري ضمن حذف الكروت


تمت المحاورة .. وباقي واحدة فقط ونقفل الجزء الأول بإذن الله ..

[سهيل2012]

بسم الله الرحمن الرحيم


( المحاورة رقم 24 )


هذه محاورة جرت أحداثها بيني وبين زميلي وصديقي سافر مسفر العتيبي ( من مدينة جدة )

قبل ثلاثة ايام تقريبا ..... والبداية من الشاعر سافر /


نويتك يا سهيل العتيبي و انت مطلوب
تجيني لطلـب لا توخـر لـو دقيقـة

ياما رسلتلك من رسائل جوف مكتوب
و سلامي بالرسائل قريته ذا حقيقـة

سهيل
سهيل ابن العتيبي ليا جا سد فــ النوب
يجي وقت الطلب ما توخر عن رفـيقه

نويت ألعب معك وأسترق غترتك والثوب
وأشب النار فوقك يا ابن مسفر حريقه


سافر

سهيل اخفاء الحقائق وهو رجال محسوب
ليا جـات الحقائـق يابايضيـع طريقـه

كبار القول خله واتـوب الربنـا تـوب
ونارك طفهـا لايجـي براسـك شقيقـه


سهيل

ترى فنجالك اللي تسوقه دوم مشروب
سـهيل النجـم مـا يفرح بنكبة صديقه

أنا ما أخبر عليّه يا سافر مسفر ذنوب
كبيره غير كفتتك في قدور السليقه



سافر
مديرك رشحك للرياسه وانت منصوب
سهيل اسمين تعرف وكلن له بريقـه

مشيت ادروبك اللي تباها مدور الروب
تطش اعلوم ياسهيل مافيها واثيقـه




سهيل

مدير سهيل ما فيه يا بن الناس عذروب
رفيقي وابن عمي وأنا كبتن فريقه

هذاك اللي تقوله طعام البدو مرغوب
طعام الشيخ يشرب منه ويفك ريقه



سافر

مدير اسهيل قفاء واسهيل اتقول مغصوب
في راس اظلع بادي وشوف روضن يويقه

طعام البدو طيب تراء للنـاس محبـوب
علومك مخطيه وانت تسمـع للموسيقـه


سهيل

مدير سهيل وافي يكمّل كل ماجوب
حرام إن جاك حمّلك حمل ٍ ما تطيقه

رضا تكر يبا يكسر محمد الشلهوب
يبي يأخذ الكوره منه بأية طريقه

سافر

علومن باديه منك مثل الزبد وتـذوب
تحمل نفسك الذنوب وانا نفسي عتيقه

قزاز الساعه اللي معك ياخوك مشطوب
في حماك زرع طيب ونفسي ماتطيقـه



سهيل

ترى المندوب ما يقضي الحاجه لمندوب
وأنا مثل الجمل يمشي الله لا يعيقه

زروع ٍ طيبه في بلدنا كنّها الذوب
بعيده عن شواربك يا راع السويقه



وبهذا ينتهي الجزء الأول من محاورات سهيل مع شعراء المنتديات ..

وإلى اللقاء في الجزء الثاني بعد فترة راحة .. وذلك بمشيئة الله .


وسامحونا ..

أخوكم / سهيل ..

[سهيل2012]

بسم الله الرحمن الرحيم


عدنا من جديد ..

ومع الجزء الثاني من محاورات أخيكم سهيل في المنتديات ..

المحاورة رقم ( 25 )


هذا لقاء تصادمي بين سهيل وزميله مقدام العتيبي وقعت أحداثه الأسبوع الماضي في

أحد منتديات ربعنا بالطائف ، تصادم أسفر عن خسائر وتلفيات في البودي والحديد فقط !
ولا الركاب طلعوا سالمين والحمد لله .. حادث تصادمي لا زالت تبعاته تطاردنا أنا ومقدام
ونعاني منها كثيرا .. نقلته لكم في محاورات سهيل ، وأرجو لكم طيب المتابعة ..


سهيل
سلام الله سلام سهيل بعد البعد والغيبه
بعد طبيّت جيت البيت يا هل البيت من بابه

ابه سافر وابه مقدام فخر لربعي عتيبه
يسد اللازم الطارف ليا من فتّل أشنابه



المقدااام

هلا يا مرحبا يا سهيل لا شـك ولا ريبـه
ليا منك دخلت الدار يا ذيب مـع اذيابـه

عتابه عزوة اللى يعتزي ما يحصد الخيبه
حضر مقدام فى ذالليل مثلك يحسب احسابه


سهيل

يدوم لك البقى يا شاعر ٍ ما ينجحد طيبه
عمود البيت ما يثبت يا كود نجوّد أطنابه

هذاااك اللي تحداني أبا أكسّر عراقيبه
حسافه كيف يظلم واحد ٍ طيب من أصحابه




المقدااام

زمانك وان صفالك تبدى الايام لـك عيبـه
وانا مانى معلم واحد مـن حسبـة اربابـه

تصاريف الزمن تعطى وسيع العرف تجريبه
وانا لى ماقف مع طيبين العـرف والجابـه


سهيل

زمانك خثرب الصاحب يا أبو فالح مشاريبه
وقف دون العدود الصافيه يومي بمشعابه

وأنا والله ما أخشى يا ولد فالح مشاعيبه
لكن أخشى من الجفوه وشرهة ربعي عتابه



المقدااام
تهيض ياسهيل الطيب والاجـواد تعديبـه
وبعض العلم لا يبدى ولانت لاحق ثابـه

ومن قدم لقا بالوقت لـو دارت دواليبـه
فلا يهمك ضعيف المعرفة لو صكت ابوابه


سهيل

عسى شرواك يالمقدام ما تطفي مشاهيبه
بعد هذي تراك السيف يا ابن العم ونصابه

وحشمه للرفيق اللي بدا في عارضه شيبه
أبا أدمح زلّته قبل يتردى يفقد أعصابه



المقدااام

انا ادرى وانت تدرى والعرب ياصاح تدريبه
ترى باب يجيب الريح صكه ويـش تبغابـه

حشايم للرفاقـة والقرابـة الطيـب تبديبـه
عليك البيض يا اللى تعرف المنقود واسبابـه



سهيل

دخلت لمسجد العباس متوضي وأصليبه
لكن الشيخ واقف بالعصا من دون محرابه

عرفت الشيخ باسمه بعد ما عدد مطاليبه
يهدد بالعصا ويحدد أضراسه مع أنيابه



المقدااام

وكاد انك مسوى وقعت وش انت مسويبـه
توقع وانتبه لا ياخـذك صاحبكـم انهابـه

لكن اعزمه واحذر والخطا للشيخ لا تجيبه
وقدم له سمين العذر تصبح من حدى انسابه


سهيل

لبنا في الصميل وتمرنا في داخل العيبه
ليا مرّ الشواوي يا سليّم نتوصابه

يقولون الرجال الضيف في دبرة معازيبه
ترى ميسان وشدانه يا بو فالح ما تتشابه




المقدااام

تعلمنى بحالك والعرب والكل يدريبـه
ليا مرك عميلك فازهبه وكثر بمزهابه

تولم ياستر للشيخ واكرم فى مواجيبه
ترى ربعك عتيبه معشيه الذيب فالغابه

سهيل

من الطائف سرح مرزوق وأمسى الليل في طيبه
يعرفوووو نه ليا طـبّ الحرم يا خوي بثيــــــابه

عسى ربي يسامحنا من النمّات والغيبه
خصوص إنا سرينا الليل يا رجال نغتابه



المقدااام

توردها تصدرها وكل الحكـى تحكيبـه
تقول المشكلة فالشيخ واللى صوبكم جابه

عسى من لامكم فالشيخ ذيب الليل يسريبه
انا ادري وانكم تغلون شيخ القوم واحبابه



وإلى اللقاء في محاورات أخرى بإذن الله ..

[الحاج سلام]

يا هلا يا سهيل ومرحبا عودا حميدا يا ابو احمد عدتم والعود احمد . اليوم مصادفة دخلت لهذا المنتدى ووجدتك تشارك في جوانب عدة وكم هي فرحتي بعودتكم .
لانني فقدت مشاركاتكم وتغريداتكم في تويتر فاذا بكم انتقلتم الى هنا تصدحون بهذه المشاركات الجميلة فحق لي ان افرح بذلك .