ولد غريره في ضيافة منقاش / الحلقه الأولى

[منقاش]

ولد غريره في ضيافة منقاش / الحلقه الأولى ولد غريره في ضيافة منقاش / الحلقه الأولى ولد غريره في ضيافة منقاش / الحلقه الأولى ولد غريره في ضيافة منقاش / الحلقه الأولى ولد غريره في ضيافة منقاش / الحلقه الأولى

في هاك العصريه من العام الماضي كنت على حماري أردد في الانشاد والقوافي واحيان أعرط ركبي وسيقاني من مشريه تاخذ وتلقاني وتهرشني هرش , ويوم أقتربت من مسجد الجماعه في الديره الا وانا أسمع هاك اللجبه والعلمه اللي تجيني من ناحية المسجد ظنيتها في البدايه طلبه بين الجماعه .
وأعود أوقف واربط حماري وادخل المسجد ألا وانا على الفقيه يحدث في الجماعه عن الحج . يوم شفت الجماعه ما عندهم فتنه ولا نشايب كما خبري فيهم وأنا أرجع في قفايه وانسحب لكن راعي السواني تلحقني من قريب وجرني بطرف ثوبي وقال أنثبر واجلس يا منقاش لعل الرحمه تغشاك مع المسلمين.
جلست واصغيت سمعي للفقيه مع المنصتين وسمعته يحث الحاضرين ويقول يا مسلمين الموت في الرقاب والله في المرقاب وانتم ما تدرون من منكم يعيش حتى يدرك العام القادم , يا ناس كل من يمتلك الزاد والراحله يغتنم الفرصه ويحج الفرض , ثم قال كلام ثاني عن الموت والآخره أرعبني وادخل الخوف في قلبي وطمعني في مغفرة ربي ورحمته.
قمت من مقعدي خاشع وتهاديت في مشيي حتى دنيت على مهلي من الفقيه وجثيت على ركبي قدامه وقلت : يا فقيه أنا كنت في غفله واليوم دوبي فقت وصحيت وانجلت الغشاوه عن بصيرتي ونويت أحج بعد سمعت كلامك , وابغيك عساني فداك تزيدني نصايح وليتك تقللها حتى ما أضيعها كلها .
رد عليه الفقيه وقال : يا منقاش ربك سبحانه وسعت رحمته كل شي وأخذه أليم شديد , وربك سبحانه طيب ولا يقبل الا طيب , وأول الطيب أنك تطيب مالك وتخرج منه كل الحرام ولا تستبقي ألا الحلال الزلال حتى تحج منه .
يا منقاش ربك ما هو غافل عن اللي ما يخرجون زكاة أموالهم أمثالك حتى أجهوا عنا بالقطر , ولا هو غافل عن حقوق الولايا اللي أنحرموا من ميراثهم في الجبل والوادي واكل حقوقهم أمثالك من ضرس على الثاني .
يا منقاش الزراع وانت أولهم غشيتم العباد في خضركم وفواكهكم اللي تجلبونها للأسواق يوم أنكم توجهونها بالزين وتخفون الردي في أسفلها . وآخر علومك اللي ما ترضي ربك يوم أعطيت دراهمك لأبو أمجد الحرامي اللي شغلها لك في سوق الأسهم حلالها وحرامها ومشبوهها.
يا منقاش وقف زلع وبلع الحرام , وقبل تروح الحج توب من القلب النصوح واستغفر الله ورد المظالم على أهلها وصفي مالك من الحرام ثم حج من صافي الحلال , ولا تاكل الا حلال حتى تنفتح بيبان السما لدعاك .
رديت عليه وقلت : أنا ما سعلتك الا عن الحج ,, وبعدين ويش مدخلك بين عبد وربه وبيني وبين الورثه ؟؟, وليش الحسد يوم تدز خشمك في قروشي ورزق ورعاني ؟, والا ودك تشمت بي وتشمت عليه الحاضرين بعد سمعت أن قريشاتي المهياه ما لحقها خير بعد أخذها مني سويد الوجه أبو أمجد وشغلها كما زعم في الأسهم ولا رد عليه ألا خمسها ويزيد يمن جريمته ويقول : مبروك عليك يا منقاش , أحمد ربك بعد عود عليك بعض حقك ولا راح عليك الحمار ببردعته كما راح على غيرك .
ثم قمت متغضب تسمع طلايبي من أبعد مكان,وقفيت وانا أقول ما دام أن الحج على المستطيعين أنا ماني من أهل الأستطاعه حتى القى الحلال اللي أحج منه .
صرفت النظر عن الحج ونسيت سالفته أشهر حتى لاقاني مفتي الأستراحه المخلوع (طيب الذكر اللي يسمونه مخاوي منقاش) وعلمت له بعلومي مع فقيه الديره .
رد عليه وقال : يا منقاش ما عليك من فتاوى المكفراتيه , حج وترى الحج عرفه لا غير , والدين يسر ما هو عسر , يعني حج ووقف مع الناس في عرفه وقبل الغروب أنحش معود ولا تبيت ألا عند عيالك وما جاك عليه ,, بس أياك تسعل أحد غيري يشككك في الفتاوي الصحيحه ويخرب عليك نيتك الطيبه .
ما عليكم من طوالها ,, أخذت فتوى المخاوي وقلت خلي بينك وبين النار مفتي ,, نزلت من الطايف صباح يوم الوقفه وقضيت نهاري في عرفه من مخيم للثاني أتمشى بين الحجاج واسولف معهم وأتعلم أهل اليمن والشام واللي جايين من سد البحور , أتعلمهم عن ديارهم وكلاها وحال أهلها وحلالها وطبوع قبايلها . وكان من بين اللي قابلتهم وتعلمتهم رجال من قبايل خماجات الأسبان أسمه كونزاله غريره .
يقول ولد غريره في علومه أنه كان مستمسح (مسيحي) حتى قرى كتاب عن دين ثماله (الأسلام) وعرف منه الحق من الباطل واهتدى وأسلم , ويذكر أن عنده أوراق قديمه (مخطوطات) ورثها عن أجداده كابرا عن كابر تثبت أن أجداده من بني الأصفر أسلموا يوم كان العرب يحكمون الأندلس , وبعد طرد بني الأصفر للعرب أجبروا كل من بقي من المسلمين خماجات وعرب وبربر على الأستمساح وترك دين ثماله (الأسلام) وكان منهم أجداد ولد غريره .
رديت عليه وقلت : يا ولد علومك عجيبه وغريبه ومراميها بعيده ويبغي لها سعه من الوقت ومكان غير هذا , وانت أجنبي ولك واجب وليتك تسير علينا في الطايف وبلاد ثماله حتى نعلمك الدين الصحيح ,, وتراك محمول مزمول في ضيافة منقاش من يوم تنقل رجلك من مكه حتى تعود لها , قل تم يا ولد حياة غريره ..
رد عليه وقال : تم , لكن أنا ما يسمحون لي أخرج عن مكه والمدينه وجده .. رديت عليه وقلت : لا تحمل هم , عندي لك من يهربك حتى تصل عندي حتى لو كان معك مية رجال .. رد عليه بنقده وقال : لالالا , عيب وحرام يا منقاش ,, أنا أرجع لبلدي واراجع جماعتكم في السفاره واجيك بتاشيرة زياره .
تفرقنا على هالأساس , وفهمته أذا جاء للطايف يسعل عن العمده مروق المنقه وهو معروف ومشهور عند أهل الحواير ويعرف منقاش ويبي يدله عليه .
وبعد وقفت مع الحجاج وصليت الظهر والعصر جمع في عرفه تعجلت ونحشت معود للطايف , وقبل غروب شمس نهار الوقفه بساعه وانا في الطايف عند العمده مروق المنقه في تكيته اللي على باب بيته , ولقيت عنده المشاكس والمفتي (مخاوي منقاش) ياكلون فصفص ويدخنون أكرمكم الله شيشه ويلعبون ضومنه ويهمزون ويلمزون ويغتابون في خلق الله وياكلون في لحومهم .
هنوني بالحج ثم علمت لهم بعلومي من يوم مشيت حتى عودت وقلت : تكفى يا عمده , أنت تعرف بيتي بعيد ولا يجمل وابغي أجيب ضيفي (ولد حياة غريره) عندك .
رد عليه العمده بضحكة مسخره وقال : هيا بلاشي بكش من حق البدو , والله حلوه يا واد منقاش , هدا اللي باقي علينا أنته تعزم والعمده يضيف ,, قوم قوم وريني مقفاك لا توجبني أتناول الشون واحطها متن أكتافك واعطيك درس كما اللي أخذه قبلك المروح المشاكس حتى هلل وعرف أن الله حق .
ويوم شفتها حمضت لميت ثيابي وأهميت أترك الهابي ألا ومرة العمده تنادينا من ورا الشباك وتقول : أترككك يا منقاش من كلام العمده اللي ما يحل ولا يربط ,, أذا جاك ضيفك جيبه للبيت ,, الله يحيك أنت واياه واللي يجي معكم , ولا تشره على العمده تراه قلبه أبيض ولسانه زفر ولا هو على بعضه من الخوف بعد سرى عليه ليل أقشر البارحه وأديته قتله وتوطيت في بطنه .
الى هنه أنتهت الحلقه الأولى ,, خلوكم مع الشيخ منقاش في الحلقه المقبله حتى يعلم لكم بباقي السالفه مع ولد غريره , وسلامتكم …

[شبلي أبو الونات]

قبول ان شاء الله
الحين لزمك على مرت العمدة تجيب لها قفة حاج ولا تنساني
بس قول لي أنت حاج مفرد والا متمتع لان فتوى المفتي اللي قالها لك للمفرد
والا المتمتع سمعت فتواه فيها غير يقولون على لسانه انك تصلي الظهر في عرفة وتقيل في مزدلفة و بعد العصر ترمي وتطوف بعد المغرب ةتروح لاهلك

[الشيهان]

يالله حي علومه ولاتحييه
فتوى في مكانها ولكل شيخ طريقته
والفتوى هذي خاصه وليست عامه هذا من حكم العلماء وبعد نظرهم وفقهم الله وشيخهم في ذلك مخاوي منقاش اللذي اثر ضياع مصلحه خاصه وهي حج هذا المخرف على وقوع مفسده عامه وهي تدنيس البقاع الطاهره مزدلف ومنى بقدميه التين لم تمسهما المياه منذ مبطي
وفقك الله ايها الشيخ الجليل اللى منك قليل عندما صرفته عن المشاعر المقدسه واعدته الى خرابته في شعبان ثماله

اما حكاية فلوسك ياحرامي انا كنت حاط برطم على اخوه راجيا ثواب الواحد الاحد في اولادك والا انت ماطرى على بالي اكسب من وراك حسنه
نسيت يالباير يوم سوق الاسهم راكب كونكورد بقيادة السحيمي وانت دموعك تهطل من قلة الدراهم وتقول تكفى يابو امجد الفزعه وش الدبره واستغضت لحال عيالك واحط من حسابي الخاص مبلغ اشغله وارباحه لك وانت كل يوم تسابق في حمارك عند كمبيوتري تمتع حواجبك قبل عيونك بالرصيد
ويوم صاح الصايح وضرب الكفر حق الطياره على ارتفاع 21000 قدم وجينا بالمضلات وانت على الارض تفرج قمت تسب وتسخط
صدق من قال لاتسوي خير شر مايجيك

[حسن عابد]

علوم العربان كلها عندك حتى المستمسح جاتك علومه الظاهر مارحت للحج

[منقاش]

شبلي : مشكور , والفتوى اللي تقول عليها ما سمعها منقاش , لكن المفتي نهاني عن القفف والهدايا .
ابو أمجد : أزعلك الصدق وكلمة الحق وبديت تليم تلافيق كذوب تحسب أحد يبي يصدقك .
حسن عابد : أقول لك وقفت في عرفه وتقول ما حج منقاش , غير كلامك وتراك غالي وابغيك تحالفني مع حلفايه العمده وشبلي وابو عبدالرحمن وابن سلمان .

[@ بن سلمان @]

المشاركة الأصلية كتبت بواسطة منقاش

وابغيك تحالفني مع حلفايه العمده وشبلي وابو عبدالرحمن وابن سلمان .

مسكين بن سلمان تلاقفوه المهبل كل بيد

[أبو علي]

صادق ، صادق ، يا منقاش راعي علوم مع عموم القبايل حتى الخماجات تعرف لغاتها .

فديتك ، فديتك .

[زهور الريف]

المشاركة الأصلية كتبت بواسطة @ بن سلمان @

مسكين بن سلمان تلاقفوه المهبل كل بيد

ما للمجنون الا اهله

[مخاوي منقاش]

ابن سلمان مهبول عن مهبول يفرق وعليك بالحليف لوهو مرجوج/
لا يازهور انا اشهد ان ابن سلمان يجي بالعقل بعدي مباشرة /
ابن عزاب /وش جرالك فديتك فيديتك؟ اثبت على الحق واحذر وساوس الشيطان وابى ارسلك (قروة) مقري فيها تشرب منها قبل النوم واثناء التوم
الاخ الشاعرالقدير حسن عابد /ماشفت من كذبه الا هاذي ؟
ابو امجد تبريكاتنا لك فضيق عليه الخناق

[منقاش]

هذي نهايتها يبن سلمان ما يمرمطك الا كهلة الشيطان , وان كنت ابن سلمان صدق ما أنت راقد عليها .
ابن عزاب : ما تنطم وتعقب يا أبو ق و ا ر ي ر . وهو من متى منقاش يحتاج لمثلك أنت والمشاكس وابو أمجد ومخاوي والا حتى ابو عبدالرحمن حتى تنعمون له؟ .
العمده مروق المنقه : وينك يا عزوتي يا راعي الوقفه ما تبدي بالشون وتقف معي ؟.
أقزوز منسم : الله يرحمك ويتوب علينا وعليك .
مخاوي : أنطم , واقطع واخس يا الرويبضه .