الحميدي الثقفي

[حسن عابد]

الحميدي الثقفي الحميدي الثقفي الحميدي الثقفي الحميدي الثقفي الحميدي الثقفي

وقفة مع الشاعر الفذ ( الحميدي الثقفي )

شاعر ولد في بلاد ثقيف في عام 1388 هــ

عذب ... عبقري ... يعد من ابرز شعراء الجنوب ..
الشعر عنده فن وجنون ... تستهويه الصور الشعرية ...
لا اجد تعبيرا يفي بحقها

جنون العاصفة

ليلة مطر شق الرعد جو الأنـفـاس
وأمطر جنون العاصفة من حروفي

أعد واذكر .. وأنسى بعـض نــاس

أشباح ذكرى تسـكن أطلال شــوفي

كان الزمان لصادق الحب نبراس

وكان المكان أطهر مكان لوقـــوفي

طـفولتي ياحـلم ياغــربة إحـسـاس

يابـعد شــق بخنــجر البــعد جــوفي

اصرخ .. ولكن تحتضن صوتي أقواس

وجمرة قلم مرتد تشعل كفوفي

كل ماتكسر .. للقمر بيدر الماس

حدر السنابل تورث أغصان خوفي

وكل ماخرج من معطف الليل نسناس

أحاول أخرج من ثنايا ظروفي

واكتب شعر تنزيل من وحي الأنفاس

لعلها تقلب حروفي حروفي

(السحاب احمر !!!)

يا كثر ما يشتكي ...لو يشكى الدفتر !
من نزعة الحـرف في عقلـي وتجميعـه..
أحيـان ما يحن في جـــوفي نـبات أخضـر
وأحيــان في " ثانية" تـورق مطاليعـة ..
يبــرق ويــرعد خفوقـي والقلـم يمطــر
وأنا اتعــمد ضمـا حـرفي وتوجيعــه ..
فـي داخلـي صمت .. يحتـاج انفعـال اكثر
من زخرف القول يـا " خالد" وتصنيعه ..
الشعـر بعيـون أخوك / الحلـم والمهجـر
خوف وبعض صدق تنـزفنـي ينـابيعـه ..
وش لون تمطر سمانا – والسحاب أحمر ؟!
والـبرق يـدمي جوارحنـا بــصابيعــه ...
محـدٍ خبـر سيـل .. لا يدفـن ولا يحفـر ..
وان جـف يحـزن ثـرا الوادي لتوديـعه ..
كـف وحـدا على التصفيــق مـا تقـدر ..
لاشفـت مـاهـو مطـاوعـك الزمن طيعـه ..
مـا هــو ضـروري يـلامـس جرحـك الخنجـر
ولا أنت مجبور .. حتــى تعلن البيعه ..

الشاعر / الحميدي الثقفي

( القاتل المتقول ؟!!!)

بلشت بعرفنا الفاضل ..بسحر الخاتم المعمول
عطوني حب واخذوا ماغلى من تركة اجدادي !
سيوف معلقة وخيام ودلال وسروج خيول
مرابطها خشب وتقاعدت في قرنها الحادي
تموت الخيل عطشا في ( المذاود) والشعاب سيول
تلحفنا جلود احلامنا... في المرقد الهادي..
( أحبك في الشتا والصيف ..أحبك في شهر ايلول !!
أهالينا بخير ...تزوجت هند ونجح شادي !!)
وحنا صابرين وننتظر سيف الله المسلول
يجينا من بلاد الشام يقفل موجة الرادي !
نضت حيلي مدارات العطش ياما تهد حيول
تعبت استشرق الغفران واعصي طاعة اسيادي !
أبقتل مولدي وادري بـ اصير القاتل المقتول
ولكني كسرت المستحيل ونقطة ابعادي
على جسر الضياع المنتمي للخوف والمجهول
افتش عن سطور الموت عن تاريخ ميلادي
ولاأملك غير حبر لدفتر أشعار وقلم مشلول !!
وعرفان الحنان : أمي وأبوي وطيبة ابلادي !

( الحميدي الثقفي )

[حسن عابد]

ــــــــــــــــــــــــــــــــــ
الخامسه والثلاثين
ــــــــــــــــــــــــــــــــــ



الايادمي .. يادم الرازقيه
مية عام ماعتقتّك المغارس
الا يادمي طلقة البندقيه
حشا .. مايبورد بها كل فارس
هي الشمس .. لو غربت مشرقيه
هو البحر .. موطن ومنفى النوارس
بقا بي من الكل .. كل البقيه
شغب ضجة اولاد صرفة مدارس
الا يادمي .. يادم الرازقيه
مية عام مسجون من غير حارس!!+
...............
تكللت وحدي / توحدت كل
تظللت جسمي / تجسمت ظل
تحللت أسأل / تساءلت حل
تقللت كثري / تكاثرت قل
..................
اقبلي واقبلي .. واقبلي واقبلي
في بياض الغموض
وفي الغموض المبين
صرت انا كل ما مافات فيما يلي
ماتبينه يكون / كوني اللي تبين
اقبلي واقبلي .. واقبلي واقبلي
مظلمه مشرقه / خافيه بينه
اقبلي هالة المعتم المنجلي
مثل من ظل يمشي على بينه
احلم بحضورك .. أمضي لمستقبلي
دام راح التعب / راحة المتعبين
طوقيني..
بحس بيقيني ..
هي ( الخامسه والثلاثين )
بوابة الأربعين
اغسليني بما رآب من زرقة الرمل
وكتابك المحو ..
والمحو ماتكتبين..!!
واطلقيني ..
مع الليل للشمس ..
ياشمس صبح اشرقيني..
فلربما تشرق الشمس مني واغني :
( الا ياهلي ) ..!!
صدقيني هي ( الخامسه والثلاثين ) ..
بوابة ( الأربعين ) ..!
اغسليني ببرد الغبش ..
من دروب .. الشغب
توقف الناس عند اول اعتابها متعبين
احرقيني بسكينة الشك ..
ابقطع يقيني..!!
هي ( الخامسه والثلاثين ) ..
عند اول اعتابها
تفتح اسطورة الصخرة ابوابها..!!
تسألي ..
انت مين ...؟!
افتحي الباب ..
واحد من المنتمين!
المعصَّر بغيم الصدف
بالغوايات ..
بالطيش ..!!
وبلذة العيش
في ( الآخر ) اللي نزل فيه ..
واستوطن الذات
ثم ارتحل من دم النطع ..
حتى اقاصي سديم الملذات ..
والولدنه..!
اقبلي وغدنه
مظلمه/ مشرقه ..
مجدبه / مورقه ..
ممحله / مغرقه ..
بارده / محرقه ..
كوني ابعد من الأقربين
أقرب الأبعدين ..
اقبلي ..
كوني الاصغر الأكبر الـ .. الـ .. بلا الـ ..!!
كوني مثل ماتبين ..
جاهله / غارقه ..
حانيه / جارفه ..
هاديه / عاصفه ..
قاسيه / لينه
صعبة ٍ / هينه..
كافره / دينه
غامضه / بينه ..
مثل مستقبلي ..
اقبلي :
كل ماخط منحط خطين..
خط البدايه وخط النهايه
...........
ركضنا .. وقفنا ..
سمعنا وطعنا ..!!
اكلنا شبعنا .. !!
على ربوة في العقيق اجتمعنا ..
نغني (( احنا وسود العيوني ))
وياعيوني / عيوني!!
وياشجوني / شجوني!!
وياظنوني / ظنوني!!
وياديوني/ ديوني!!
وياسجوني / سجوني!!
وياعطوني / عطوني!!
لحد ماسكتوني ..!!
تعبنا نغني :
مشينا لعليا في ثمانين ليلة ٍ ..
على شانها عليا تهون الصعايب
عشرين منها تضرب الارض بالحذا ..
وعشرين منها في ظهور الركايب
وعشرين منها في البحور الغزيره ..
وعشرين منها في الجبال النشايب
وعشرين منها في بطون الشعايب
............
طاعن ٍ ف( الباهت ) المصفر وجهك ..
شاحب ٍ ذابل ومنهك ..
في ظهيرة يوم سبت ..!!
والمدينه تطفح ارصفة الشوارع
ضجة اولاد وشغب ..
صرفة مدارس
تحت شمس ٍ من نحاس ..!
كنت بلحالك ..
جسدك ..
وماتيسر من ظلالك
كنت تنسج من سؤالك حيرتك..
والريح تنسج منك خبت ..!
كل كلمة صيف تكتب محوها ..
تمحي كتابتها
تتكسر مرايا من خيال الما..
على مرمى عطش مكسور كاس ..!
هو من فينا البحر ..؟!
قال الجسد للظل ..
قال الظل : من فينا الغريق
امتد وامتد السؤال وما أجبت ..
هو من فينا كسر قيد الطريق..؟!
ومن هو المأسور من فينا الطليق..؟!
وطال .. طال الظل طال ..!!
اكتظ حولك من غبار التايهين وجوه ناس
هو من فينا .. ومن فينا ..
ومن فينا تمادى .؟!
طال طال الظل طال ..
لحد ماصاح الجسد :
يكفي ..
تعبت.. !!
ارجوك من هذا العبث..
يكفي .. تعبت .!!
بعدها صار البحر صمتك فراغك
والشجر هذا الدم المورق شماغك ..!
والهوى كينونتك ..
والأرض تحت اقدامك ..
والما ينحسر عنها ..
ويمتد اليباس
..........
البحر باب الملوحه ..
والشجر عالم بروحه
مثلنا مثل الطيور ..
كلنا تكوين ( لوحه )
شمس تكتب مامحيت ..
وريح تمحي ماكتبت
ربما كراسة زرقا / سما ..
تجلس على صخرة نهار
تختمر كراس ازرق في التباس المبهم .. المبهم..
لحد الالتباس

[حسن عابد]

شمس ابجديه
ــــــــــــــــــــــــــــــــــ

يارب هذا الطريق افعى تفـح وعتمـة اعشـاب

ظلمه وطين وبلل وعظـام نـاس امـوات حيـه

الليل غابة ونبض انفاس صـدري فـاس حطّـاب

تستنبت النـار فاكهـة الشتـا شمـس ابجديّـه

من سلّة الريح من غيـم الصـدف لابلـل ثيـاب

من رجفة اللـون مـن تفّاحـة البـرد الشهيـه

والشارع الصمت نهر اسود من المطـاط جلبـاب

يقرا صـدى خطـوة العابـر ملامـح سرمديـه

ياموت وبيوت حارتنـا علـب سرديـن وتـراب

تـرى التعـدّي لغيـر اوّل قرابيـنـك زريــه

الريح تصفر وينعـق طيـر بـوم وتنبـح كـلاب

ويضـج صمـت المدينـة كلنـا نـذر المنـيـه

قلت المدينه تثاوب في وهـن ونعـاس الابـواب

والناس من غيـر تلقـي بـال تلقـي بالتحيّـه

ابسألـك صاحبـي خايـف ومتـردد ومـرتـاب

كم من سؤال يمـوت وينولـد ويمـوت فيـه ؟

هذا الحذر والتوجّس في الملامح مالـه اسبـاب

هذا الترقـب وهـذا الريـب والخـوف المعيّـه

الصبر طبع الجمل طيّب عرفنـا سـر الاعجـاب

هذا الوفا في الكـلاب الوافيـة طبـع وسجيّـه!!

ابسألك صاحبي واقسى كمـا يقسـون الاحبـاب

وجهك هو القاتل المقتول مـن فيـك الضحيّـه ؟

عمرك مجرّد زمن تافه غبي جـوف الزمـن ذاب

من منبع الليل الـى صبـح المصبّـات القصيـه

للجوع مخلاب من قال ان ماللجـوع مخـلاب ؟

لا في الثـرى ضاجعتـك ولاارضعتـك الرازقيـه

ياحكمة الطيش ليش نخلـد الاسمـا والالقـاب ؟

مايمكن اسم الورود اشواك واسم الشمـس فيـه

لو للغموض المبيـن وللبيـان الغامـض كتـاب

محـدٍ بقـى لـي عليـه ولابقـى لاحـدٍ عليّـه

عرفتني كنت انا صاحبك واصحابك لـي اصحـاب

امـد لمصافحـك يـدّي تصافحـنـي يـديـه ؟

ابسألك عن ملامح وجه طفلٍ في القـرى غـاب

غيّبت .. والا القرى ياطفـل غابـت فيـك هيـه

قلت القرى واجهشت لك في البلاد رعوش الاعناب

والمشمش المسقوي واغصـان لـوزه عثريّـه

والما تقول بـكظايمها زبرجد فـي المـدى راب

والعشـب مجـدول بخيـوط الصباحـات النديـه

ابسألك صاحبي غمّـض عليهـا جفـن واهـداب

ياما لصبح القرى مـن وشوشـات المـا هنيـه

[حسن عابد]

ــــــــــــــــــــــــــــــــــ
ظنون الأرصفه
ــــــــــــــــــــــــــــــــــ

اذكر .. ومبتل السكوت اطفـاك واشعلـك الحـوار

ليلـة شتـا فيهـا تقاسمنـا ظنـون الأرصـفـه

قلت انـك اطـول مايسـور قامتـك ظـل الجـدار

قلـت انـك اجمـل ماتشوهـك الحيـاة المترفـه

قلت ان اقـوى مانقيضـك غيـر هـذا الانكسـار

في صوتك الليلـه ولاهـو صوتـك اللـي بعرفـه

خابرك تحكي عن خلاص الورد واغصان الحصـار

تلمع تلاشي تنبعث مـن كـل شـي فـي اطرفـه

مسفر .. قم انفض ثرثرة دفترك عن صمت الغبـار

حتى تنامى من فضـا الغبشـه عصافيـر احرفـه

وان كان من غيم الجبـل سيلـت بالـوادي نهـار

جب لي معك من سدرة الوادي هديـل .. ورفرفـه

اذكر عن الموتـى يجـي لاصـار للفـي انحـدار

مـع لمـة الفيـه علـى بالـك كـلام تسولفـه

ماعاد في قلبـي تشـب لدهشـة التخميـن نـار

صمت المدينه في عيونك ضج رقص .. وغطرفـه

اسمع دوي ريح الجبال اللي لهـا بصـدري قـرار

يممـت لـك تيـارهـا يجـرفـك .. ولاتجـرفـه

تعبـت افتـش عـن ينابيعـي وخطواتـي بحـار

تعبت افتش عـن سمـا حفنـة رمـال مجغرفـه

ماخترت اكون من الهوى .. والنار .. والطين اختيار

ماخترت الم البحـر دمـع ٍ فـي عيونـي واذرفـه

ماخترت اغني موجة الياماااال مـن لـول البحـار

لكنـي اخترتـك تقاسمنـي ( ظنـون الأرصفـه )

[حسن عابد]

الصايع
ــــــــــــــــــــــــــــــــــ



ضاق صدره ..
حس حتى البيت اللي .. انو لد به ..
صار قبره .!!
لملم انفاسه .. وبعض اوراق كراسه
شرب باقي بقايا الشاهي البارد بكاسه ..!!
وخرج ..
وقف على الدرج ..
ولع سيجاره ..!!
استرق نظره على شباك غرفة جارته ..!!
شاف جاره .. وانحرج ..!!
أرخى راسه .. صار نصف انسان ..
ربع انسان ..
ماباقي من الإنسان فيه الا لباسه ..!
كان في حالة ندم ..
لو طعنته وقتها ماسال منه .. نقطه دم ..!!
.....
والله ياديما ..
مااسامح اسلافي ..!!
أخذوا الأيادي ..ما ..
خلوا سوى اكتافي ..!!
أمشي كما الأعمى ..
قدامي خلافي ..!!
والنور والظلما ..
حملٍ على اكتافي ..!
( واغض طرفي إن بدت لي جارتي ..
حتى يواري جارتي ماواها )

...
على خيال الما ..
هذا الحجر طافي ..
كل النسا : سلمى
وكل الرجال : وافي
لاصارت الأسمى ..
تلمس وتنشافي ..!!

..
وامتطى سيارته ..
سار في كل اتجاهات المدينة ..
لف ابو كل الشوارع
مره نازل .. مره طالع
مرن نازل ... مره طالع ..!!
قل : يدور شلته
قل : يفكر في عذر ( للجار ) إذا علم ابوه بزلته
قل : يبي ( كفتيريا ) جايع ..
يبي يشرب وياكل
قل : يدور عن حلول
او عن مشاكل ..!!
قل : يسوي مايسويه المراهق ..
إنحرافات وخرافات ..
وسخافات .. ومهازل ..
قل : يغازل ..!!
....
البحر ..
ويش البحر..؟!
لولا رمال الشط ، والأطفال ، واليامال..
والمرجان والأصداف والما.. والسفينه
والمسا ..
ويش المسا..؟!!
لولا دفا لون الستاير من شبابيك المنازل ، والنسا ..
وخشوع جمر الليل في احظان المباخر ..!
انت شايف ضحكة الموجه على صدر البحر تختال ؟!
شايف ضحكة الما .. كم حزينه في نوافير المدينه ؟!
شايف الفرق الكبير الشاسع الواسع
شايف كم هي الأشيا تكون أجمل كثير بدون آخر ...!!
............
في اليمين من التقاطع
اعترض له نور احمر
نور ساطع
صاح به : اوقف
وكان الصوت حازم حزم قاطع
خفف السرعه .!!
رخى صوت المسجل
ارتجف .!!
صاح نفس الصوت وبقوة صراخ : أوقف
وقف ..
واستعاذ بطيبته من شر حراص النوايا
وين رايح ..؟؟
أو إذا ماكنت رايح قلنا من وين راجع
ماأنا .. ما ...
ما أنت ماعندك ادب
إنت تربية شوارع
إنت شكلك واحد مسوي سوايا
هات إثبات الهوية
حاضر وماعندي مانع
ها هـ هذي هية :
الإسم : راضي سويكت
المؤهل : جامعي
المهنة : صايع

[line]


ــــــــــــــــــــــــــــــــــ
موجة حمام
ــــــــــــــــــــــــــــــــــ

رفرفت فـي بالـي اوراق بيضـا مهملـة

واشتهى صمت ابيض الجوع تفاح الكـلام

مثل طفـل ٍ كـان يبنـي ويهـدم منزلـه

في هديل البحر واصطادته موجـة حمـام

جيـت لاسهـم ٍ تناسـى ولاجـرح ٍ دلـه

عن هوى اللي ينزعون الجروح من السهام

جيت للدنيا قمـر وجـه صوتـي حنظلـه

تحت جلدي ذاكرة خبت من رمل .. وعظام

لي سما عالي وحفنة سديـم و.. وسنبلـه

سبحت فيهـا وغنـت عصافيـر الغمـام

كن من روّع ضبى خبـت دمـي واجفلـه

وارتبك في حانة الصيف طاروق الصـرام

كلمـا قربـت للريـح نــار ٍ مشعـلـه

فوق صدري زادني جمرهـا بـرد وسـلام

كيف خيلت آخـر الوقـت قـاع ٍ ممحلـه

كيف خيلـت آخـر القـاع وقـت ٍ للهدام

وش هو آخر دربنا .. آخر الـدرب اولـه

لاهمزنـا مهـرة الوقـت وانـزاح اللثـام

كـل درب ٍ تعرفـه حـاول انـك تجهلـه

الدروب لصمت وجهي .. مجاهيل وظـلام

[line]


ــــــــــــــــــــــــــــــــــ
صاح بي صاحبي
ــــــــــــــــــــــــــــــــــ

صاح بي / صاحبي .. والليل عطر الكتابه

كيف نبنـي وطـن للمتعبيـن اغتـراب

كيف تطلـع يدينـك يارفيـق الصبابـه

وانت للتمر فـي شفتـك طعـم الغيـاب

قلت له : ظلك الناضح بريـق ومهابـه

اطعن الظل واكتب مـن دمـاه الجـواب

من رقى نخلة الدفتـر وشـق السحابـه

تغسلـه باحتمـالات المطـر والتـراب

كلما خـدرت صحـو السـؤال الاجابـه

سال قيض تشجر من عـروق السحـاب

فوق نخل جنـو طلعـه وخانـوا ترابـه

وارتدوا فوق ثوب الطين .. طين الثيـاب

صبي الغيـم ياسلمـى لنـاس ٍ غلابـه

من عطشهم على الما يحلبون السـراب

اظهري مثل نفحة برق .. والفجر غابـه

واختفي مثل ورده فـي ظنـون الكتـاب

غصنها يعزل الما من سـراب التشابـه

والنسانيس ترسم بـه نوافـذ .. وبـاب

[line]


ــــــــــــــــــــــــــــــــــ
الدخول إلى الخارج
ــــــــــــــــــــــــــــــــــ

انتي خرجتي من سواحل صوتي المتعب صدى

طفلة قصيده .. أو قصيدة طفل مجهولة حنين

ماتشبهين الحلـم مـادام لصباحاتـك مـدى

تعبت اصبك في مكان الجرح نـار وتنطفيـن

جيتك خياليٍ دخل خـارج محـارات الـردى

جيتك وبعيوني قرى ترفض حيـاة الميتيـن

ابي صباحاتك مدن تستاهل ادموعـي نـدى

ابي نهار مصافحك يستاهل اعصابـي يديـن

ابي تزيديني ضلال .. الشاعر ان ضل اهتدى

ابي على طول انتظر وانتي تجين .. ولاتجين

للدرب عمري ماقتديت الدرب لخطاي اقتـدى

دربٍ قتل كل الخطا عندي يمـوت بخطوتيـن

في سلة احلامي خبر يرفض حصار المبتدى

انا الفقير اللي حكى بافـواه كـل المتعبيـن

أحلامنا تولد صغار وتكبـر ذنـوب وعـدى

بين احتمالات الحياة ورهبة المـوت اليقيـن

[line]


ــــــــــــــــــــــــــــــــــ

[اليزيدي]

وفقة اللة ابو علي

[حسن عابد]

اهلا ياليزيدي
سلامات

[أبو عبدالرحمن]

يعطيك العافيةأبو علي..

بس تأكد من عمر الميلاد...أتوقع الشاعر عمره فوق الخمسين...

[مشعل الثمالي]

سلمت حسن عابد
بكل صراحه حيرتنا وش الاجمل بقصايد الحميدي ولكن
بيض الله وجهك وسلمت على الشاركه الجميله اكثر
من رائعه .
اقبل اجمل تحيه من ولد عمك لا عدمتك .

[حسن عابد]

اهلا ابو عبدالرحمن وكل ماتشاهده منقول لم اضف عليه ولم انقص
مشعل اهلا بك يابن العم ياذخرنا وقت الشدايد