أبغي رايكم في مشكلة الفاس والراس ؟؟(الجلسه ألأولى).

[منقاش]

أبغي رايكم في مشكلة الفاس والراس ؟؟(الجلسه ألأولى). أبغي رايكم في مشكلة الفاس والراس ؟؟(الجلسه ألأولى). أبغي رايكم في مشكلة الفاس والراس ؟؟(الجلسه ألأولى). أبغي رايكم في مشكلة الفاس والراس ؟؟(الجلسه ألأولى). أبغي رايكم في مشكلة الفاس والراس ؟؟(الجلسه ألأولى).

بسم الله الرحمن الرحيم
سلام عليكم يا تالي ربعي , ومبروك عليكم عشر الشهر وليلة القدر , وبعدها أثني عليكم بالتبريك بقدوم عيد الفطر , وبعد :
في ليله من ليالي هالشهر الكريم , كنا نتسامر في ضيافة حليفي ساري الليل , وحضر سمرتنا مكاوي الشيخ وابن ابي محمد والرويعي وابو شرين وحاضر نفسه وبايعها بقرشين , وكم واحد غيرهم من كمال ربعنا وأعضاء منتدانا .
علم لنا معزبنا بعلوم كثيره طلع فيها ونزل وخفض فيها ورفع وأكثر في ذكر بعضها حتى سمعناه يقول , وفي نهاية المطاف لا بد يا ربعي أن الفاس تبي تقع في وسط الراس , وهذي هي الطامه .
كنت أستجمع أطرافي واهجر متكايه واستقعد حتى أستويت في مقعدي , ثم أعتزيت وقلت :
أني أبو نقشه اللي يورد القول الفعل ,, ويا ربي أني داخل عليك يا دافع البلا ,, ويا ساري فاولنا خير , وعلم لنا ويش هي الفاس ؟, وقل لنا من هو الراس؟؟.
ألتفت معزبنا (ساري) ناحيتي والجد كاسي كل ملامح وجهه ومعتلي جميع نبرات صوته وقال , الراس هو روسنا كلنا يا أهل القريه , عربنا على عجمنا , نسواننا على رجالنا , سودنا على بيضنا , فقرانا وأغنياءنا.
كلنا يا أهل هالقرية اللي أسمها الكره ألأرضيه , يعني أنها موس تبي تعم على كل الروس , والسعال (اليوم)بعد أكتملت وانتظمت حلقات المشكله في سلسلتها ماهو , هي تبي تقع الفاس في الراس والا لا ؟؟ , لأن وقوعها أصبح في حكم المؤكد , وأنما السعال هو متى تبي تقع ؟؟, وويش مقدار الضرر اللي تبي تخلفه ؟؟...
زادت دهشتي , وزاد ذعري ذعرا على ذعر بعد عرفت أن الكلام جد , والخطر داهم والطامه عامه , وزاد فضولي وولعي بباقي العلوم بعد عرفت الروس وغاب عني معاني الفوس اللي تبي تصيب كل الروس .
ظنيت في أول وهله أن ساري عنى بالفوس نيازك تبي تضرب الكره ألأرضيه , أو عنى بها قرب مجي كويكب العذاب , أو مجي الدخان , أو ثورة بركان يلوستون العظيم , أو أنفلات حرب كونيه نوويه , أو أكتشاف ميلاد المسيح المسخ في أصفهان , أو أكتشاف سد يأجوج وماجوج ..
لكني فيما بعد عرفت أني كنت ساري في وادي , ومعزبنا (ساري الليل) ماشي في وادي ثاني ..
وهالحين بعد عرفتم الروس , خلوكم على رسلكم ووسعوا خطركم , لأنكم تبون تحتاجون لعدة جلسات حتى تلمون بالمشكله من أطرافها وتقدرون تناقشونها وتبدون رايكم فيها.
عدة جلسات تستمعون فيها لسعالات الشيخ ابو نقشه وأجوبة معزبنا ساري الليل , وفي النهايه رايحين تعرفون الفاس وتحطون اليد على متن قلة الراس ,وبعدها أن كان لكم راي في الفاس اللي تبي تدمي الراس هاتوه مشكورين .
واحب ألفت أنتباهكم من البدايه وأقول لكم , لا تخوفون من المقبل عليكم من الموضوع , ولا تخوفون من أمكانية جركم وأقحامكم في أحاديث تجهلونها ولا ترغبون الخوض فيها , ترون الموضوع ما فيه محاذير من الكتابه عنه , لأن صاحبكم مجنون وصاحي لحوايجه , وصاحي أكثر لحوايجكم وحاجتكم لمنتداكم ....
والمهم هو التفاعل من جانبكم وكيل المديح تلو المديح لسماحتنا , لأنكم أذا بخلتم علينا بالمدايح نبي نبخل عليكم بالمعلومات ونوقف الجلسات , ووقتها يمكن تجيكم الفاس على غفله منكم على متن الراس ..
هذي هي أشتراطاتنا , وهذا هو اللي يلزمكم , وموعدنا معكم الجلسه الثانيه أن تمشيتم بما أشترطنا عليكم , وبذلك أذنا لمن يشهد والله خير الشاهدين ...

[الحاج سلام]

يالله صباح خير يا فتاح يا كريم .


الشيخ منقاش اسعد الله صباحكم بالخير والسلام والأمن والسرور .

من البداية ارهبني العنوان فاس ووقع في الراس اللهم سترك .

ومع انني لم أستبين القصد ولكنني سوف اثق في تطميناتكم ياشيخ وأقول على بركة الله .

ولا أنسى الإشادة برجاحة عقلكم وحكمتكم أيها الهمام فسر على بركة الله ولك منا التبجيل وعليك التعجيل .

[حسن عابد]

كانوا يعلمونا وحنا صغار كيف العبد فلق راسه بالفاس وكبرنا وشفنا كم من الاحرار وقعت فوسهم في روسهم وعلمتنا الليالي والايام ان الموت فاس يقع في الراس لكن لا نعلم متى
ولكن صاحبك ساري الليل والفكر ماندري وش وراه وننتظر منك الحلقه الثانيه باهتمام ايها الشيخ الهمام والفارس المقدام وسلام للحاج سلام

[أبو عبدالرحمن]

يا لطيف ...

الله يهديك يا شيخ منقاش...دائما تقطع تشوقنا!

نزل الحلقة الثانية...

[ابوسيفين]

ومن يُطلبُ منه الرأي بحضوركم ؟
كلّنا آذان صاغيه ، كيف لا وقد تقمّص الشيخ ثوب النذير ، ولا أراها سوى موعظة ألهمه الله إيّاها إبّان إعتكافه الأيّام الماضيه تقبّل الله منّا ومنه 0فالحقنا بها بارك الله فيك قبل أن تُطلق الشياطين من أصفادها 0

[أبو علي]

بارك الله فيك يا بو نقشه وسلمك الله من كل شر ، هات العلم عسى خير والله انك جبت لي القلق ...... اللهم سلم سلم ......

[منقاش]

عميد منتدى الحياة الفطريه , الشيخ سلام سلمه الله وأبقاه , ومن كل شر أذراه : أطلعنا على ردكم المفعم بالثقه في وعود ابو نقشه , والله يعيننا حتى نوفي بها الوعود اللي ما أدري كيف تورطنا فيها ..
اللهم أجعلنا عند ثقة شيخنا سلام وعند ثقة جميع ألأخوان , ولا تجعلنا من الأقوام اللي أذا وعدوا أخلفوا وأذا أوتمنوا خانوا وأذا حدثوا كذبوا , وشكرا على أطلاعكم وكل ما جاء في ردكم , وابشروا باللي يسركم ويطيب خطركم....

ابن العم الشاعر حسن عابد حفظه الله : نشكرك على أطلاعك وتعليقك , ولا بد أن شاعريتك ورمزية الشعر اللي تغلب على شعرانا هي اللي رجحت عندك فاس الموت على غيرها من ساير الفوس ..
لكن فاسنا اللي ندندن حولها , فاس ما عمر أحد خبرها من ساير الناس , وحتى تعرف فاسنا وتميزها من بين جميع الفوس تابع باقي درسنا حتى تفهم رطننا , وشكرا لك مرة أخرى ..

مشرفنا العام ابو عبدالرحمن حفظه الله : أبشر بما يسرك , والعلوم أن شاء الله تبي تجيكم ورا بعضها مثل المعزا والضان أذا فكيت عنها عنانة الحضيره وجاتك مسربه معها .
وبالمناسبه , وقبل أنسى , ترى حبيبك المكاوي أتصل اليوم بسماحتنا من المدينه المنوره , ويزعم (أن صدق) أنه معتكف بعياله في هاك الرحاب الطاهره , نسأل الله أنه يعطينا ويعطيكم خيره , ويكفينا ويكفيكم شره وشر كل من فيه شر ...

حليفنا عميد منتدى الرحلات الشيخ ابو سيفين أدام الله عزه : ما يفهم ابو نقشه ولا تجلياته أحد مثلكم يا حليفي , ونشكركم على أشادتكم بصقر وشاعر القوقاز , وأن شاء الله نكون عند حسن ظنكم , وتلقون عندنا ما يسركم , ومشكوين على أطلاعكم وتعليقاتكم ..

الشيخ ابو علي رحمه الله : بارك الله فيك وهدانا وهداك الى سواء السبيل , وآمين لنا ولكم على دعاك , وأبشر بالعلوم , ومنكم المتابعه ومنا المواصله ومن الله للجميع العون والتوفيق, وشكرا ..

[أبو علي]

حبيبي منقاش هيا ، الانتظار صعب ، وانحن مشغولين ورانا مقاضي وصلاة وعبادة وانت رابطنا كل شوي نطالع ما كتب منقاش شي ، عجل هات العلم

[منقاش]

هذا اللي ناقص عليك يا ابو نقشه ....
أبو علي : تبي تعقل وتحط على فمك شحم وتجلس جلسة الحشمه وتسكت مع الرجال الحشام اللي شوفهم معك في المجلس والا لا ؟ ...
وخذ في حسابك ثاني مره أن فخامة أبو نقشه ما أحد يتأمر عليه والا يملي عليه التعليمات , أبو نقشه رجال أصوك متصوك من صوكان (صوكان أعلا قمم جبال القوقاز في الحدود بين أذربيجان وداغستان) , وأن كان عندك أوامر من فضلك خلها على أم علي .....
أنت هالحين توحيني والا لا؟؟؟؟؟....

[المقداد]

اللهم إنك كريم تحب العفو فاعفو عني وعن منقاش و المسلمين .
ثم أما بعد .

اردنا إبلاغ فضيلته أننا نتابع ما يكتبه عن كثب , ولا شك أننا مستمتعون ومستوقفون, وأردنا أن نطرح عليه رأياً وفضلاً يتقبله ... لا أمراً ! كما فعل الأولون .
أن يتعجل بكتابة الحلقة الثانية كوننا نتأهب للخروج أيام العيد الي حيث تهامة للهدف المعلوم ولأبي غليون !

المقداد