الســـــــــؤال الذي لم أطرحه ؟؟ ((الحلقه السادسه ))

[ابوسيفين]

الســـــــــؤال الذي لم أطرحه ؟؟ ((الحلقه السادسه )) الســـــــــؤال الذي لم أطرحه ؟؟ ((الحلقه السادسه )) الســـــــــؤال الذي لم أطرحه ؟؟ ((الحلقه السادسه )) الســـــــــؤال الذي لم أطرحه ؟؟ ((الحلقه السادسه )) الســـــــــؤال الذي لم أطرحه ؟؟ ((الحلقه السادسه ))

السلام عليكم ورحمه الله وبركاته ومسّاكم الله بالخير

أعود معكم لتكمله حلقاتنا عن رحلتي مع ذلك الشخص المجهول وقد اتيت في الحلقه السابقه على ذكر بعض المشاهدات من موقع المهرجان 0 أما أنا وصاحبي فقضينا عصريّه ممتعه في التجوال بين المخيّمات لم يشوبها سوى الوقت العصيب الذي مرّ بصاحبي عندما أراد الخلاء ــ أجلّكم الله ــ فالمنطقه مستويه مدّ النظر ومليانه ناس وطرق ولا تجلس في مكان مادريت الاّ طالع عليك سياره ولاّ راعي وبعد جهد جهيد لقينا لنا وغيفه صغيّره وينطلق لها خويّي وقبل مايقضي شانه الاّ وهو ويناديني تعال تعال صوّر ! قلت ياولد إستح على وجهك 0وبعدين طول الرّحله وانت مانعني من التصوير وش اللي تغيّر 0 قال صوّر وبعدين أعلّمك عوّدت نزلت بكمرتي وصوّرت هالصوره

^

^

^

^

^

^



وهذه صور له معززا مبجلا في مكتبي




قال ارفع هذا عندك تبي تلقى بكره من خويانا واحد مايسمع فيه ، من عقب الوسمي بشهر تلقاه مايخلي محل يجمّع فيه ويرمي فالفريزر وطول السنه ياكل منه0
قلت المهم خلّصنا ورجعت للسيّاره وهو قعد يقضي شانه ولا دريت الاّ وهو راجع لي ومعه شويّت علف قلت هذا وش هو ؟ قال ليا عرفت إسم الّلي صوّرت أعلّمك وش هذا 0 المهم إني خصرته وقلت مصيري أعرف ومشينا لخيمتنا وسوّينا ذاك المشوي الذي تستاهله هالّحى الغانمه وخويي ماشاء الله معه كافه متطلبات الشوي




عزّ الله انّ إحنا تعشينا وعيّنا خير في جو بارد لدرجه إن خويي ماقدر يشرب الما إلا بعد دخّله معه في الفراش من شدّه برودته 0 قال ارقد بكره مواعدين لنا خويا أهل مقناص والمشوار طويل 0
ويوم أذّن الصبح قمنا وصلّينا وشدينا عفشنا ويوم جاء الضحى وإحنا فالمنطقه اللي بين حفر الباطن ورفحا ولينه في طعوس على طرف مناقع ماء من بعد المطر وليا كل واحد ناصب صقره على وكره





قامو بعد كذه كل واحد يتعلم الثاني عن وش معه من علف وكتو كراتينهم ولين خويّ مجمّع معه كرتون وش كبره من الّلي لقيناه أمس العصر وصورناه ويقوم واحد منهم ويرمي عليّه واحد من كرتون خويي وقال لّي وش اسم هذا قلت هذا عندنا يسمّونه (( زنبخ )) ومير يكركر الين انقلب على قفاه وتشطّطت رجليه مثل الرجال الّلي أنتم خابرينه وحصل معها ما حصل من أصوات ويوم إنتبه له خويّي قال تراه يعرف إنه عرجون وبدا يتوسع لهم في الشرح عن العراجين وعن فصيلتها بأسلوب بحثي وكان مما قاله إن الزنبخ من نفس الفصيله ومنها الطرثوث ــ مثل بعض الرجاجيل ــ والأذنون وقامو الرياجيل يشبّون نارهم قلت أبزرق أدور لنا غدا قالوا وهاذي النعمه ما هي عاجبتك 0ولين لهم رفيق ارفل مخصصينه للكشنه ويوم قال لهم إنها جهزت وهم يرمون العراجين عليها ، ويصلّحون سلطتهم وهي من العلف الّلي جابوه (( حمّيض وبروق )) والقهوه (( حندقوق وبسباس وقرقاص )) وتسدّحوا ويسولفون وهم متبطّحين الّلي يقول شعر واللي يروي قصص إلين أمسانا الّليل قلت لخويي عجّل ردني لاتفوتني الرحله قال أنا حجزت لك من مطار حفر الباطن مشينا قلت مشينا وودعت الرّبع وانا أقول وين أقرب مطعم ذبحني الجوع ووصلني خويي الى المطار وقال لي انزل بسرعه لاتفوت الرحله وبعد مانزلت وتحرّكت سيارته وأنا أذكر إن في بالي ســـؤال ما سألته له ناديته ماسمعني وبقي الســـؤال يجول في خاطري إلين مادريت وواحد من الأبناء ينادي عليّ يقول وشبك يبوي عجّل ترى الصبح أذّن له ربع ساعه قلت أعوذ بالله من الشيطان الرّجيم وش هالحلم
لكن بقي الســؤال في خاطري وندمت إني ماسألته هل هو ألحاج سلام ؟؟؟
في الحلقه القادمه إنشاء الله (( الختاميّه )) استذكر معكم بعض تلك المناظر اللتي بقيت راسخه في ذهني من ذلك الحلم ، وبعض ماأتذكره عن أوصاف الرّبع الّلي قابلناهم يمكن تساعدوني في التعرّف عليهم 0

أشوفكم على خير

[أبو عبدالرحمن]

لا قصة...ولا تصوير..(ما شاء الله تبارك الله )

تعال يا منقاش...راحت علومك...وبدأ البساط ينسحب منك!

[@ بن سلمان @]

الله يحلل الأفلام المصرية
قم قم صل

وهم يرمون العراجين عليها ، ويصلّحون سلطتهم وهي من العلف الّلي جابوه (( حمّيض وبروق )) والقهوه (( حندقوق وبسباس وقرقاص ))

أحسها أنواع المطرسة

[صقر قريش]

[منقاش]

يا رفيقي يا دكتور مشعان هذا حلمك كيف علمك ؟.
الحقيقه أن القصه تجنن على قول الشباب , ولفت نظري العرجون اللي أول مره أشوفه , وأظن المخاوي سبق وأطراه لي وقال أن العرجون والفقع (الكمأه) وجبتهم البريه المفضله .
وترى عندنا شي يشاديه ينبت على الثمايل والعقمان يسمونه ...؟..الوادي .

[سنا الهجرة]

ههههههههههههههههههههههههههههههههههه

الله يرج ابليسك يا شيخ

وش هذا الفلم الهندي .. قال أبو عبد الرحمن سحبت البساط من تحت كراعين منقاش

وأنا أقول سحبت النيل من تحت كرافيس المصاريه

اللي مهولني ماهو الحلم حقك .. كلنا نحلم .. وشبه ليلي

لكن تعال قول لي كيف ما نسيت هذي الاسامي .. اللي كأنك جايبها من ( شمس المعارف)

واللي ما يعرف شمس المعارف .. هذا اظنه كتاب من كتب المشعوذين يحظرون به الشياطين . واسمائهم مثل هذي الاسماء .. والله يستر لا يكون رسالة الدكتوراه حقت الدكتور ( ماخذها في التحضير )


الله يستر عليك يا د. مشعان والله انك مبدع ( أشور عليك تشوف لك قناه تتبنا فنك
على الاقل تفكنا من روتين الافلام المصريه .. اللي كلها حب وقواز وطلاء ومخدرات

[سنا الهجرة]

المشاركة الأصلية كتبت بواسطة منقاش

وترى عندنا شي يشاديه ينبت على الثمايل والعقمان يسمونه ...؟..الوادي .

هههههههههههههههههه
هذا اللي تقول عليه يا منقاش .. كان ينبت عندنا في صفة الحمير بس أنه أصغر بكثير من هذا اللي جايبه الكتور .. هذا شكله مسمد بكيماوي

[منقاش]

أشوفك ياحليفي يا سنا الهجره قمت تخاطبني نشافي بدون القابي , ونصيحتي لا تكررها حتى لا يستغل الشيطان نعوذ بالله منه هالثغره ويوغر بيننا العداوه والبغضاء.
يعني ما يتكلف عليك يبن عمي وحليفي ترمي قدام أسمي كل ما ذكرتني شريف والا فخامه والا سياده والا زياده بدكتور والا غيره .
أما البساط وسحبه اللي يحاول ابو عبدالرحمن بأساليبه الملتويه يشق به صفي أنا والدكتور دام ظله فأقول له ولغيره , العبوا غيرها ولا تبيعون البيض على سلاقيته , ولعلمكم الدكتور مشعان كان أستاذي في الليليه يوم أنا أدرس في محو ألأميه , ولا هو عيب أن الطالب يجي مثل أستاذه .
وبعدين , ويش يدريكم لا يكون الكتور مشعان والشريف الدكتور منقاش معرفين لشخص واحد ؟ , مجرد سعال .......

[ابوسيفين]

أشكر للجميع مرورهم وإطرائهم وسأعود انشاء الله لكل منهم على حده 0

لكني أطلب من المشرفين والإداره حذف أي مداخله تسيئ لشيخي أو لاتشتمل على شيئ من ألقابه ولو كانت لي الصلاحيه مانتظرت ذلك من أحد 0 ولعلمكم إني إختصرت كثيرا مما رسخ في الذاكره من ذلك الحلم لهدف واحد فقط وهو التشوّق والتشوّف لما تبقى من موضوع الشيخ الفكاهي (( الهادف )) من أجل غزّه جيناك هالحزّه 0

وسيتم تأجيل الحلقه الختاميّه من هذه السلسله ولن تنزل الاّ بإذن سماحته 0

[منقاش]

مشكور يا دكتور مشعان على هذا الوفاء العظيم لحليفك , وهذا الأطراء العجيب لرفيق دربك , وهذا ما هو غريب على حملة الشهادات العليا أمثالي أنا واياك .
بخصوص الحلقه الختاميه , لا بالله نبيها ولا نسمح لك بتأجلها , وليتك تقسم الحلقه الختاميه لخمسه أجزاء كل جزء صفحه على ألأقل , وأذا وصلت الجزء الخامس تقسمه لخمسه فروع كل فرع صفحه ألا سطر على ألأقل .
بس تكفى أوصيك بحليفنا الطيب الحاج سلام خيرا , الرجل شدهان ومشغول عنا في الهشيم والغرفان ولا نبغي ما يشوشر عليه ويخرجه علينا منها وهو كان كاثم عنا بينها .
أما حلقات غزة العزه فظني يبن عمي أنها تبي تسبب لنا أحراج كما اللي أنت خابر في الحلقه ألأولى , وبريدي التكروني مليان برسايل من مواطنين يطلبون أيقاف المسلسل , وأظن أن الشيخ سلام ما عاد يعرج على ألأستراحه أحتجاج على حكاية السروال والثعبان والوغيفه لأنها أساسا تبع الحياه الفطريه ومن أختصاصه ويبغي غيره يحترم ألأختصاصات .

كتب هذا البيان , شيخ الثملان : الدكتور الحاج منقاش دام ظله وقدس سره .....