أبغي رايكم في مشكلة الفاس والراس ؟؟(الجلسه الرابعه).

[منقاش]

أبغي رايكم في مشكلة الفاس والراس ؟؟(الجلسه الرابعه). أبغي رايكم في مشكلة الفاس والراس ؟؟(الجلسه الرابعه). أبغي رايكم في مشكلة الفاس والراس ؟؟(الجلسه الرابعه). أبغي رايكم في مشكلة الفاس والراس ؟؟(الجلسه الرابعه). أبغي رايكم في مشكلة الفاس والراس ؟؟(الجلسه الرابعه).

بسم الله الرحمن الرحيم
السلام عليكم ورحمة الله وبركاته , وبيض الله وجيهكم اللي كملتم عدد الردود المطلوبه , وبعد :
ويسري علينا ساري بباقي علومه ويقول = طيب , أذا كان هذا هو وضع أمريكا وسفينتها , ويش هو الحل ؟؟, ووين المخرج لها من ورطتها ؟؟..
بعباره ثانيه , كيف تقدر السفينه ألأمريكيه تناور في الأمواج العاتيه والرياح العاصفه وهي المثقله بالديون وفوايد الديون الربويه كما شاهدتم هذا المشهد بوضوح على ساعة ديونها في الحلقه الماضيه ؟.

الجواب , لو كانت المسأله مسألة ديون وبس لهانت المشكله , لكن البليه أكبر من كذه بكثير وكثير...

كيف أكبر من كذه بكثير ؟؟؟....

الجواب : المشكله جنبها مشاكل تراكميه متشكله بأشكال مختلفه , أشكلت على أمريكا وأشكلت على أمم ثانيه تورطت معها , وخذوا على هالكلام أمثله سبق وأشرنا لبعضها .

واحد من أهمها وأعصاها على الحل : مشكلة صناعة وأدارة الدولار المختطف من قبل عصابة الصيارفه الدوليين (المرابين العالميين) ..

وثاني منها : قضية خطف قراراتها السياديه , الأقتصاديه منها والسياسيه من قبل لوبيات متلولبه لولبها أباطرة ألأمبراطوريه الربويه العالميه وعملاهم .

وثالث منها : لعبة ومهزلة ألأنتخابات اللي يتلقى فيها المتنافسين من الحزبين الديموقراطي والجمهوري (على مقاعد ممثلين الشعب ومقعد الرياسه) الدعم على مستوى الولايات وعلى مستوى الحكومه الفدراليه .
الدعم المالي والأعلامي والمعنوي اللي ينهمر على كلا الحزبين في وقت واحد من قبل عملاء أباطرة الأمبرطورية الربويه .
وبهالدعم واللعبه المزدوجه يضمن ألأباطره أستمرار نفوذهم , ويصبحون هم الفايزين الحقيقين في كلا الحالين والأحتمالين بصرف النظر عن من يفوز من الحزبين , وكأنهم بدعمهم المزدوج هذا يتمثلون بمقولة من قال , أمطري أنا شئت فخراجك يأتيني , لأن النتيجه ألأنتخابيه في مثل هالحاله يتحول فيها كل فايز من الحزبين لعميل خانع للداعمين (الأباطره) , ومدين لهم بجمايلهم اللي وصلته للميصال والمنصب اللي لولا دعمهم بعد مشيئة الله ما وصل له .

ورابع منها : الأمراض ألأجتماعيه المزمنه والمستعصيه في المجتمع ألأمريكي , ونعني بها العوالم الخفيه والسفليه اللي تعيش وتعشعش تحت ألأرض في الظلام الدامس , وهي عوالم خارجه على القانون مثل مافيا المخدرات وعصابات الجريمه المنظمه وتجارة السوق السوداء وتجارة الرقيق ألأبيض وأنشطة تنظيمات الجماعات العنصريه وغيرها .
كل هالعوالم الخفيه تقف أمريكا بكل صولجانها وعدتها وعتادها عاجزه أمامها ولا هي قادره على أستيصالها , والسبب لهذا العجز هو أن هالعوالم تستمد قوتها وتتجه خيوط تحريكها بأتجاه أوكار تديرها ألأمبراطوريه الربويه اللي ممنوع على أحد مسها أو فتح ملفاتها بموجب قانون أن كان ماهو مكتوب فهو مفهوم تمام الفهم عند النافذين في الجهات التنفيذ أكثر من فهمهم للقوانين المكتوبه .
تتجه خيوط تحريكها للأمبراطوريه اللي تستطيع تشغيل هالعوالم الخفيه لمصلحتها بيسر وسهوله متى ما أحتاجت لها أو رغبت في تشغيلها لخدمة هدف من أهدافها حتى لو كان الهدف أرهاب الخصوم أو تصفيتهم الجسديه ..
وبكذه أصبح نفوذ وسطوة الأمبراطورية الربويه وأباطرتها مهاب الجانب وراسخ ألأركان ومتجذر وضارب بعروقه في نخاع زعيمة الرأسماليه المزعومه اللي أسمها أمريكا , ومن خلال أمريكا يتجذر هذا النفوذ في بقية أفراد ألأسره الدوليه , مثل يوم كان يتجذر قبل قرن تقريبا في كل أنحاء العالم من خلال الأمبراطوريه البريطانيه اللي ما تغيب عنها الشمس ...

ثم ماذا بعد ؟؟.
ولا توقف مشاكل أمريكا عند هذي الحدود , وكأن اللي بها من العلل والأسقام ما يكفيها , ويزيد أباطرة الربا وأعوانهم يورطونها في نفقات تساوي ضعف دخلها .
وهنه ركزوا لا هنتم , ركزوا وأنتبهوا من فضلكم وحطوا خطين باللون ألأحمر تحت تنفق ضعف دخلها , وانتبهوا لأن مناورات السفينه في هالمنعطف وهالمرحله بالذات سببت ورايحه تسبب أضرار بالغة الخطوره ومستعصية الحلول.
والمقصود بالنفقه اللي تساوي ضعف الدخل , هو أن أمريكا أذا كان أجمالي دخلها 2ترليون تقريبا , يورطونها في ألتزامات تنفق عليها أربعه ترليون تقريبا كما حصل ويحصل منها في كثير من السنوات الماضيه والسنه الحاليه..

وهنه لا بد لنا من الرجوع بكم مره ثانيه للسعال المهم اللي رددناه على مسامعكم أكثر من مره حتى مليتم من كثرة ترديده وهو :

كيف تقدر السفينه ألأمريكيه تستمر في ألأبحار وسط هالأمواج المايجه والتيارات المتلاطمه والأجواء الماطره والرياح العاتيه ؟.
كيف تنجي في هالأجواء من الغرق في الوقت اللي أصبحت فيه مثقله بديونها وفوايد ديونها وفوقها تنفق ضعف دخلها ؟؟.

يعقل هذا الكلام؟؟.
نعم هذا اللا منطق معقول وواقع , ويبي يستمر طالما أن السفينه أستلم خطامها أباطرة الربا من زمن ماهو قريب في حين غفله وغره من أهلها , واستلموا مع خطامها خيطها ومخيطها تحت شعارات الخصخصة وشعارات براقه غيرها .
وهالحين وصل ألأباطره بالسفينه للمكان اللي يتعذر فيه تلمس طرق الرجعه , وأصبح ما أمامهم ألا الهروب بها للأمام والمناوره بطرق غير مشروعه مثل ما ناوروا في الماضي (قبل أربعين عام) يوم تملصوا وتخلصوا من ضمانة غطاء الدولار بالذهب (الخالص) , وغدروا على رؤوس الأشهاد بكل ألأمم اللي وضعت ثقتها في عهودهم ووعودهم , وحطت الدولار ملاذ آمن لكل مدخراتهم وودايعهم ..
ولا كان منهم يو م علت أصوات ألأحتجاج على غدرهم ونكثهم بوعودهم ألا الأعتذار بعذر أقبح من فعلهم , وخرج ممثلهم وتحدث بأسم أمريكا وقال: الدولار حقنا والمشكله مشكلتكم قبل تكون مشكلتنا , (يعني فهلوة عصابات).
كذه بدم بارد وبجرة قلم واحده رفعوا الغطا اللي كان بواقع أوقيه (أونصه) لكل 35 دولار , واللي بموجبه (الغطا) كان بأمكان أي بلد أحتفظ بأحتياطياته (توفيره) بالدولار يستبدلها بالذهب متى ما شاء بنفس هالتسعيره .
ونتيجة لهالمناوره الخبيثه , شوفوا أوقية الذهب اليوم كيف أصبحت تساوي حوالي 1800 دولار , وكل يوم والذهب في أرتفاع بعدما كان مستقر ومسعر بواقع 35دولار للأوقيه .
وانتبهوا , ترون الفرق بين سعر اوقيه الذهب أمس(35$) وسعرها اليوم هو الخساره اللي تحملها كل من حط الدولار ملاذ آمن لمدخراته واحتياطياته النقديه , وكل من قبض دخله أو باع منتجه بالدولار والعملات المرتبطه به ..

وتستمر السفينه في مناوراتها كما ناورت في الماضي يوم نزلت الدولار من على متن الذهب وركبته على متن برميل البترول , كذه بقفزه واحده مثل قفزات العفاريت أو القرود نط الدولار من على ظهر الذهب ألأصفر ولا وقع ألا على ظهر الذهب ألأسود , كذه بدون أذن ولا تستورحوله لغطا له , وكذه خرج طرزان من جبته الصفراء ودخل في جبة الناس السوداء وكأنها من حلاله وحر ماله .
وبعد هالمناوره الطرزانيه الخبيثه سارت تقوم القيامه ولا تقعد , ويرتفع قرع طبول الحرب ولا يخفت , ويجن جنون أرباب الدولار أذا أرباب البترول رفعوا سعر بترولهم , لأن أي أرتفاع في سعر البترول يقابله مباشره أنخفاض في سعر الدولار اللي نط على البرميل مثل العفريت .
وبعباره مبسطه : أذا أرتفع سعر برميل البترول من 50 دولار الى 100 دولار يفقد الدولار نصف قيمته , وتفقد معه كل العملات المربوطه به نصف قيمتها , وأذا أنخفض سعر برميل البترول من 50 دولار الى النصف (25$) ترتفع قيمة الدولار الى الضعف .
يعني علاقه عكسيه بين الراكب والمركوب وبين العفريت والجبه السوداء وبين براميل البترول والدولار اللي نط على متنها..

هذي المناوره الخبيثه يا سيداتي وسادتي أصبح معها واحد مثل ابو نقشه يدعي مصبح وممسي على البترول بالرخص , في الوقت اللي كان من الواجب عليه وعلى أمثاله أنهم يدعون بالعكس .
شفتم كيف مناوره من مناورات السفينه قلبت المفاهيم حتى على المستوى الشخصي وعكستها عند ابو نقشه؟, وشفتم كيف يتعركس العكس ويعكس ألأمور والمفاهيم؟؟.

وتذكروا وأنتم في خضم كل هالمناورات ولا تنسون أن ألأمبرطوريه الربويه هي اللي تمتلك الدولار ولا هي أمريكا , وتذكروا أنها بسبب هالملكيه تكسب في جميع ألأحوال ولا تخسر , ومكاسبها تصل الى تسع ميه في الميه في دولارها اللي ما كلفها في ألأصل ألا عشر قيمته اللي تبيعه بها على أمم ألأرض .
ويا ويل من يقرر أستبدال الدولار بعمله ثانيه حتى يبيع بها بتروله كما يوم قرر من قبل ونفذ قراره الرئيس صدام حسين , وكان جزاه أختلاق المبررات لتدمير بلده وتنفيذ حكم ألأعدام فيه صبيحة يوم عيد المسلمين حتى تصل الرساله في أبلغ صوره من صورها لكل من يلعب بالنار مثله..
يتضايق ابن أبي محمد ويقاطع ساري وهو يقول : يا ساري , الليل سرى ونجم الصبح بدا , والديك هذا هو أسمعه يؤذن, وهذا أنا بديت أتثاوب ولا عاد أقدر أجمع , وهذا المخاوي شوفه جنبي له شخير ونخير من أول الليل .
فيا ليتك يا عانيه تختمها وتعطينا الزبده وقصة المناوره ألأخيره , وترى ميصال الفاس لمتن الرس أصبح علينا أهون من هذي السمره اللي سريت بها علينا .(أنتهت تغطية الجلسه)..

والى هالحد نتوقف بكم , وفي الجلسه الجايه(الخامسه) يجيكم أن شاء الله جواب ساري على سؤال ابن ابي محمد , وتجيكم معه علوم المناورات الحاليه والأخيره اللي بدا فيها السحر ينقلب على الساحر , واللي ابتدت معها السفينه ترنح وتجنح يمنه وتلفخ يسره ,وابتدا بعض ركابها يتوجسون من الخطر ويتحسسون يمنه ويسره لعلهم يرتدون أطواق النجاه , ويا سرع ما نادى عليهم المنادي أنج سعد فقد هلك سعيد , ويا سرع ما قرعت أجراس ألخطر أيذانا لهم بالقفز من ظهر السفينه في خضم المحيط لعلهم يتلحقون ويعلقون بقوارب النجاه اللي من قلتها تذكرنا بقلة مثيلاتها على سفينة التايتانك المشهوره اللي غرق بغرقها أكثرمن ألف ضحيه ألتهمتهم وحوش وقروش البحار في ليل دامس غابت نجومه وهاجت أمواجه وأشتدت بروده وزادت صروده , والقله القليله اللي نجت منهم نجت بأعجوبه , وبقي ناجيهم بقية حياته زايغ البصر شارد الفكره مضطرب الحركه من آثار وهول الصدمه , وسلامتكم ..

[مخاوي منقاش]

انا لم افهم من هالكلام شيء وانا عندي سؤال التموين اللي محوشة لليوم الاسود كيف اقدر اغطيه بالذهب ؟ وهل الغطاء على شكل شرشف او لحاف او بطانية وخاصة ان الشتاء مقبل؟ وهل تنصحني اشتري بترول او اضرب ضربتي بالين الياباني لاني سمعت ان الله مبارك به ؟

[سنا الهجرة]

سالم وغانم يبو نقشة
حياك الله وحيا علومك

وتراني كنت أفكر وأقول وش فيه ريالنا ما عاد يسوى شي أثاريه من هذا الخايس اللي في أدين الشرذمة اللي ما تتسماش

الله يخارجنا

عاد لا تبطي علينا بالحلول حتى نحتاط ان قدرنا

[أبو خولة]

شرحك سرى شيخنا وشاعر وصقر القوقاز
ابونقشة دام ظله الشريف
وأعانك الله على مخاويك وعلى ثقل الفهم عنده..!

بعض العرب ودك تحطه بـ مخباك ** وتطلعه كل لحظة و تحبه
ينطبق هالبيت على شيخنا ابو نقشة
حفظه الله


وبعض العرب و دك تلخه بمسحاة ** وترجع عليه كل شوي و تلخه
وهذا ينطبق على المخاوي
شافاه الله
,,,

[منقاش]

مخاوي الشيخ : معك حق أنك ما تفهم درر ابو نقشه , لأن كلامنا يادكاترة المال وألأقتصاد فوق مستواك بكثير , أما تحويشتك فهاتها وسلمها لأبو نقشه حتى يستثمرها لك عند ألأباطره .
وان كان بقي بعدها عندك شوية تحويشه أشتر بها شيكل وحطها جنبك على السرير وغطها بغطى قدر الكبسة ثم احتضنها هي والمغطى والتحف أذن وافترش الثانيه....

حليفنا الشاعر سنا الهجره : وانت سالم وغانم أن شاء الله , ومشكور على أطلاعك وتعليقك , وتابع معنا وابشر باللي يسرك ويسلي خاطرك , والخايس هو المخاوي والشرذمه هم أنصاره اللي ما يتسمون ...

حليفنا الشاعر ابو خوله : لله درك ولا فض فوك فقد ألقمت المخاوي حجرا يوم هددته بالمسحاه , ومشكور على أطلاعك وردك الناري اللي رديت به على المخاوي الجبان .
والحقيقه أن المخاوي ما يتحمل المسحاه وأن بغيت راي بدر الدجى أستبدلها بمكنسه أم عصا مثل مكنسة الساحره اللي نشوفها في مسلسلات توم آند جيري ...

[مخاوي منقاش]

ابو خولة
صدقني اللي ينضرب بمسحاة اشوى من اللي يحط بالمخبى لان مايحط بالمخبى الا الدخان والفصفص والمفاتيح وان ارتقت بضاعة المخابي فسبحة ويجينا هالغبي فاتح كشرته يحسبك تمدحة وخاصة الشطر الثاني لان الحب للنساء لا للرجال
منقاش / انت ما جاوبت على الاسئلة وانت الخبير
سناء / اعرف انك تجامل منقاش وهو يعتقد انك معه قلبا وقالبا

[الراااقي]

لا يهمونك يا شيخ مخاوي فأنت شيخ الإشتراكية التي تتقاسم المعيشة مع الجميع..!
ونحن حلفاؤك نرد ونذب عنك من كل من يتطاول عليك من أمثال المُتشيعر أبو خولة وغيره,
فأكثر من العطايا والهبات وتوزيع مخزوناتك من متطلبات المعيشة لحلفاءك ونحن نكفيكهم عناء الردود...
وهذا بيت رد على المتشيعر أبو خولة
بعض العرب ودك بالدركتل توطاه ،،، ثم ترجع له بالريوس توطاه

[مخاوي منقاش]

بعض العرب ودك تحطة بمرواه (وهي قدر كبير للماء)
ثم تشب النار وتسمع صريخه
لا يالرااااقي زادك الله اليفات(من الاف) لايضيق صدرك فينطلق لسانك بكلام تجرح به منقاش شيخ المخابي(الجيوب) فمهما تمادي يالعدوان فالتبن الذي ارسل اليه قد ياتي بنتيجة

[أبو علي]

ماشاء الله تبارك الله اشكرك على هذا التوضيح ، استفدنا جزاك الله خير *

[قلم حر]

والى هالحد نتوقف بكم , وفي الجلسه الجايه(الخامسه)

استقراء جميل للأزمة الماليه العالميه ربما لي عودة ورد مخالف لردك في بعض النقاط !

مبدع منقاش وفي انتظار مواصلت جلساتك

دمت مبدع