منقاش المتصهين/ الحلقة الثانيه

[منقاش]

منقاش المتصهين/ الحلقة الثانيه منقاش المتصهين/ الحلقة الثانيه منقاش المتصهين/ الحلقة الثانيه منقاش المتصهين/ الحلقة الثانيه منقاش المتصهين/ الحلقة الثانيه

ومساء هاك اليوم ظويت بيتي أتعضرط وياليت اسحب في كراعيني ,, ومن التعب اللي بي أهم أطرد الكلب واربض مكانه , وبعد العشاء وانا منسدح على قرارة ظهري أتفكر في النقوص اللي لحقتني من السفله رويعي الغنم واتدبر كيف أحفر له حفره طويله ما عاد يخرج منها ,,, وكنت مرزز رجيلاتي قدامي في عرض الحده واهوجس واحيان اعترط واهرش في جلدي من المشريه الا وانا أسمع نباح كلابي المربطه ,, مالكم في التفاصيل ..
الزبده , جاني ضيوفي (الصهيوني والمتصهين) , وحمدت الله اللي كتب لهم عمر جديد بعد واحد من كلابي (أسمه عرام بن بخيت بن فراس بن غنام) كسر السلسله وبغى يورطني مع الصهيونيه ورطه بجلاجل ..
من حين جلسوا على الفراش بثوا علومهم وقالوا : أسمع يا شيخ منقاش - نحنا محتاجين بدوي يحب الخير والأصلاح بين الناس عساه يسمح الهروج بيننا وبين البدو حقين دار فور السودان ,,, ولا كل بدوي يصلح لها العلوم ,,, البدوي اللي نبغيه يكون ذكي ويفهمها وهي طايره ويحب الفلوس ويصلي ويخلي , يعني فيه من قلة الدين شويه ويرشي ويسترشي ولا يتشدد ,,, باختصار يكون معتدل وصوره طبق ألأصل لشرواك يا منقاش ,,, قاطعتهم وقلت : لا بالله أنا معتدل من يوم أنا ورع العب في الساحه واكره العوج والعوجان اللي مثل رويعي ..
قالوا :علومنا طويله ولا هذا مكانها ,,, وهالحين نبي نعطيك عنها تناتيش والباقي ندرسك أياه في الطريق ,, وقبل كل شي - قل لنا كم اللي يكفي أهلك بعدك بالدولار ؟؟ , حتى نعطيك أياه قبل تمشي من بيتك وتحطه في يد عيالك يصرفون منه باقي أعمارهم ,,, وترا جاك العوض , وبدل شقاك وتعوبك اللي قلت أنها سنه تصيب وسنه تخيب تبي تاخذ من هالحين اللي يسدك ويسد عيالك طيلة أعمارهم وترمي بالشقا والقصى ورا ظهرك ,,, وان كان نجحت في مساعيك للخير والصلح بين الدارفوريه وبيننا كما نبغي ,,, وقتها لك بير بترول في دار فور نركب لك عليها عداد وتقبض ثمن كل برميل يخرج منها كل يوم بيومه بسعر البورصه في نيويورك وامستردام ..
ووقتها من مثلك يبو نقشه؟؟, بدال الحمار يسير عندك رعية حمير , ويسير عندك طياره خاصه ويخت تبختر به في البحروالمراسي ,, وتجوز من الشقراللي تبي,,, وتفتح حسابات جاريه في بنوك الدنيا كلها , وارصده سريه في سويسرا , وتظلي على شاشات التلفزه وصورك على الجرايد , ويصبح أسمك رجل ألأعمال الهامور الدامور الملياردير الشيخ منقاش اللي أذا غلط رد عليه السامعين صدقت وصح لسانك يا حكيم زمانك....
أما ويش نبيك تسوي في دار فور ؟؟, فجوابه : بعدين بعد نوديك هناك ومعك حميرك نعلمك كيف تدخل لنا في الجنجويد والقبايل اللي باقيه واقفه مع حكومة البشير وتدهن السير لشيوخهم وتميلهم معنا ضد حكومتهم حتى يطلبون ألأنفصال عن بقية السوادنه وينضمون ضد الخرطوم مع القبايل اللي سبقتهم ,,, وقبلها نبغيهم يقشعون لأي واحد يشوفونه في ديارهم من شركات الصوانيه اللي جايين ينقبون عن البترول ويورونهم العين الحمراء حتى يعطون الساق لحقه من دارفور ولا عاد يعتبون عليه.
أما أنت وحمارك اللي ما تقدر تفارقه يوم واحد, نبي نهربكم من طرف البرعلى زورق حتى نوصلكم لحاملة الطايرات في عرض البحر, وهناك تبقون أسابيع على ظهر واحده من السفن حتى ندرسك عن أهل دار فور وقبايلهم ومشاكلهم اللي بينهم وثاراتهم وعاداتهم ودلهم وسبولهم واسامي اهل الحل والعقد منهم , ونفهمك بأغلاط الحكومات السودانيه على أهل دار فور حتى تذكرهم بها وتولع في قلوبهم الحقد وتملا صدورهم على حكومتهم ثم تستميلهم عنها جهتنا,, والكلام طويل وطويل بالحيل وتبي تعرفه بعدين ,,, بس قل تم وعلمنا كم تبغي فلوس هالحين لعيالك في غيابك ؟؟..
رديت : ما فيه شرط على كريم ,, والتجاره في معرفة شرواكم ما هي في الفلوس ,, قالوا : أجل هات ماعونك ,, واجيب لهم خرج الحمار ويملونه لي ربط من أم ميه كل ربطه ما تلتقي عليها أصابع الكف , وقالوا هذي كلها دولارات تبي تكفي أهلك , دولار ينطح الثاني ما هي معزاك المقاصير,, وبعد أسبوع يجيك مندوبنا ويسري بك محمول مزمول .. قلت كل علومكم زينه بس ليتكم تزيدون القريشات شويه ,,, كانوا يجيبون خيشه مليانه ربطات قروش بالكاد يقلها الرجال المتعافي ويكتونها عليه في مقعدي حتى دفنتني الى عند محزمي ,, وقالوا يا منقاش : القروش جديده بربطها وانتبه اذا فكيتها لا تقطع أصابعك , تراها حاده مثل ألأمواس ..
أنبهرت وسهيت عنهم , كنت ذاهل ولا أنا مصدق وأفكر هو أنا في حلم والا علم ,, ولا أنتبهت ألا وهم يقولون : هيه نستاذن منك وباقي العلوم مثل : من نحنا ؟؟ وليش جينا دارفور ؟؟, وليش دعمنا بعض أهلها حتى يتمردون على الخرطوم ؟؟, ووش ذنب حكومة السودان؟؟ وتفاصيل عملك اللي نبغيك تسويه , وعلوم غيرها , كلها رايح تعرفها على ظهور المدمرات وحاملات الطايرات في عروض البحار .
وقبل يتركوني قلت لهم : يا ضيوف الرحمن سمعت في كلامكم كلمة عفريت ,, لا يكون قصدتوني ؟؟ , والثانيه كني سمعتكم تقولون أنكم تبون تجوزوني , وان كنتم من جدكم أبغي ألأوله صهيونيه حتى تعلمني الرطانه ويسير بيننا حسب ونسب ,,. رد عليه اللي يرطن بيننا : لالالا , يا منقاش : الرجال كان يتكلم بلغته العبريه ويقول : آني روتسي مدبير عم منقاش عفريت ,, ومعناها : كنت أتمنى أني أهرج مع منقاش عربي ,, يعني ألعربي معناها في هرجتهم عفريت ,,, أما الجواز لو تبي بالدرزن الخير واجد وخل السعه في بالك ... قلت : مشكورين وبالخير مذكورين وهالحين دوبي عرفت ليش يقولون فلان معبر لكن بسيطه عفريت والا جنيه .. ثم ودعوني الرجال وسروا عني , وانا سريت أشتغل في ليل أظلم وسط حوش غنمي أمعون وأحفر وادفن في القريشات في حفر تحت أضلاف غنيماتي وبعرها ....
الى عند أضلاف غنيماتي وبعرها نتوقف , والحلقه الثالثه تبي تشوفون منقاش كيف يهربونه الصهاينه من البر للبحر, وتعرفون الخطه اللي يبون يمشوني عليها , والخفايا اللي حجبوها عنكم .
وسلامتكم أنتم وكل أخواننا الصهاينة والمتصهينين

[ابو ملاك]

الفلوس مغرية .. . يامنقاش
انتبه ونا ولد عمك ... لاتغرك . . ثم لدار فور تجرك . . وتروح دارفور وهناك يكشفونك اهل دارفور ويكشفون عمليتك . مع الصهاينه ثم . . . أين منقاش وعلومه . راح في خبر كان .

[بن عواض]

الله يوفقك ويستر عليك من الكور لا ينحرونك .

[@ بن سلمان @]

الله يوفقك يا منقاش في رحلتك
وخير من تستأمن على عيالك القوي الامين
والدليل اني مراقب على اكثر من 1000 عضو ومتحملهم
هاه علمني في ايات طيف دفنت الدراهم ؟

[ABO TURKI]

الله يخارج دارفور منك

[ابو عادل]

عرام بن بخيت بن فراس بن غنام علم في رأسه نار
بدأت تتضح خيوط المؤامرة يامنقاش من خلال الاسم أعلاه ولوماعرام أصيل ومن صلب فراس ماقطع السلسلة والا الثاني ثاوي ماغير (ينبح ساكت)

عارف ليش اختاروك للمهمة؟
على شان عرفوا انك متصهين من زمان وبالتحديد من يوم غيبت أنفاس فراس وطمست عليها طمس حمران العيون (واغبني )

الزبدة/نبي نتحمل السالفة حتى آخرها بس نصيب ذراري فراس من الدولارات اما الخيشة أو الخرج مليان خل هذي على بالك وكمل السالفة وعلومنا معك طويلة يابو نقشة.

[النتيف]

الله الله يا منقاش
وأنا أقول فضايحك اللي تسويها ما جات من فراغ
إثرك متصهين

نبي نحتري تالي علومك ونشوف الفضايح اللي تبي تظهر
وانتبه لحمارك لا يجيه دوار البحر ثم يحسبنه كلبك عرام ابن الكلب بخيت

[أبو عبدالرحمن]

أهم شيء نصيبنا لا يضيع..

ونحن شركاء معك..فلم يصلوا إليك إلا عن طريق المنتدى..وإحصائيات المنتدى تثبت قدومهم..

فلا مناص من الحيلة والتهرب..ولن نسمح لك بالسفر قبل دفع 20% من ما هو موجود في الخيشة.

فما حصل لي مع رويعي الغنم..لن يتكرر مع منقاش..

[مشاكس]

يامقشر حظكم ياجنجويد
ماسلم بن لادن
وبرويز مشرف
والبرنسه كندريسه رايس
وحاشك حظهم الردي يمهم
المهم كل هروجك هذي مالها بزار عندنا
حفيد فراس على قيس مااشوف انهم حاطين له النص من المبلغ
والنص الثاني لك واللي معك
انما هو انت مخير بن الخيشة والا العيبة
واللي تختاره الثانية ترجع لمالك فراس نظير تخليد ذكر فراس المجيد
لأن الصفات اللي دفعت الصهيوني والمتصهين للجوء اليك هوو ماعهدوه في ك وفي كلابك وعلى رأسها حفيد فراس وهو باب رزقك ولا تجحد بلكي ربي كتب رزقك من ورى الكلاب
أعط ورثة فراس حقهم علشان يتبارك رزقك

[المشتاق]

صهيون وادي جفن
اسم كتاب قريبا في متناول المهتمين
الكتاب سيتناول سيرة منقاش في اربعة فصول
الاول ولادة منقاش ونشأته
والثاني منقاش والعمدة
والثالث منقاش وعمرو موسى
والرابع منقاش في دار فور
الكتاب يقع في 600 صفحة من النوع الفاخر
واللي يعكف على الكتاب الان المبرد
( مصدري موثوق ومطلع عن قرب )