رحلتي الى عرق بنبان

[@ بن سلمان @]

رحلتي الى عرق بنبان رحلتي الى عرق بنبان رحلتي الى عرق بنبان رحلتي الى عرق بنبان رحلتي الى عرق بنبان

salam:
احبتي اعضاء منتدانا العامر , جيتكم اليوم بسولف لكم برحلة الى عرق بنبان شمال شرق الرياض وتبعد عن الرياض اكثر من مسافة قصر ( ما شبرتها ) لكن خوياي اللي يعرفون المنطقة اذا جات الصلاة يقصرون .
يمكن بعضكم يقول الله من ثقل الطينة وش لنا وش للسوالف هذه , وانا اقول ادمحوها ها لمرة وان ما جازت لكم لا تستحون قولوها ولكم علي توبة ياللقافة لبطلها .
الاربعاء العاشر من صفر لعام 1428 , اعضاء الرحلة ما شاء الله تبارك الله ( اذكروا الله ) احمد بن مصلح وعبد الله بن وصل الله ( جاي من الشرقية ) وحمدان بن علي الشقيق الاكبر للنادر والكايد وابناؤه حسام و( القلق) هشام وفارس وهيثم ( والبلاستيشن حقهم ) وعبدالهادي بن عبداللطيف وابناؤه زياد و زهير ورداد بن سالم ( جاي من مكة المكرمة ) وخالد عيفان الجعيد وعبدالله بن مساعد وابنه خالد ومعه ( كيسة فصفص ) وعضو المنتدى الكايد ومحمد بن سعد بن مسعود ( وهذاالاخير ان الله احيانا السنه الجاية ان كان بيخاويهم انا بقعد في الرياض ) وخالد بن عبدالرحمن بن مبروك ( جبت اسمه ثلاثي حتى لا تفهمون غلط ) وعضو المنتدى واقعي جدا ومحاكيكم بن سلمان وعبدالرحمن وسلطان ابناء عبدالله بن عبيد .
طبعا المكان معروف مسبقا للكثير منا , وعشان كذه كل طلع على هواه , اللي وصل امغرب واللي العشاء واعتقد اني اخر واحد واصل تقريبا الساعة 15 /9 ليلا وكان الجو جميل وسكون الصحراء ونسايمها وشبة الضو واللي يفور الماء واللي يحمس البن واللي يقول ابعدوا الدخنة شوي , ومباريات البلاستيشن شغالة واللعب بالحجز او بالعضل .
بيت القصيد واللي ابغي اوصل له معكم هو جلسة برية مثل تلك تاخذك الى جو شعبي , ترجع بك الى ايام الصبا والى ايام الموروثات الشعبية .
بعد العشاء قاموا الشباب في صفين واخذوا في ترديد الاناشيد , وطبعا بطلها رداد بن سالم هو من كان اكثرنا حفظا , فجاءنا بنشيد ( يالله يا سمح الانظار _ راجع منتدى التراث ) ونشيد (يا حيد ياللي فيك انا بادي _ قريبا على منتدى التراث ) .
طبعا امير الرحلة هو احمد بن مصلح وجرت العادة على ذلك , وينازعه عليها حمدان ابو حسام حين يجد في نفسه نزعة الى التمرد ونحن مع من تكون مصلحتنا ( عرب احد يمانع ؟ ) , في صباح اليوم الخميس وبعد الفطور على المعروكة بالسمن والعسل كان الجو يتبدل وعلته اتربه ورياح تزداد بمرور الوقت .
اميرنا يبي يوسع صدورنا وامرنا نركب سياراتنا وندوج في ارض الله الواسعة ورا الربيع والنفل والمراعي , ركبنا سياراتنا وكان من حظي اني اسوق للامير ( دايم احب اشخص مع الشخصيات الكبيرة ) وكل ما طبينا وادي لقينا الرياح والعجاج سابقنا عليها , نيمن نلقاها عجاج , وناخذها يسار ونلقاها ساهي , نبتل طول تقصر الرؤية , هذا الامر جعل خوينا رداد يتمرد على اميرنا ومخاطبا الكايد بالبدعة التالية :

[poem="font="Simplified Arabic,4,black,normal,normal" bkcolor="white" bkimage="" border="outset,4,gray" type=0 line=0 align=center use=ex num="0,black""]يا بو يزيد الهوى زايد عن العاده = وانت تعرف العلوم وعندك ارياده
اما تدور لنا مكان نرتاده = والا نعود لديرتنا ومنازلنا [/poem]

ورد ابو يزيد عليه :

[poem="font="Simplified Arabic,4,black,normal,normal" bkcolor="white" bkimage="" border="outset,4,gray" type=0 line=0 align=center use=ex num="0,black""]يا صاحبي طير شعري طار بقياده = والقلب يرقل وراع الفكر ما فاده
وحنا مشينا بلا شور ولا قياده = وحنا على الوعد والميراد ما زلنا[/poem]

بدت الان بوادر انقلاب وبالتاكيد ستنشأ تحزبات وجماعات , الا ان اميرنا ما شاء الله عليه رابط الجأش ما هزه لسان شاعر ولا من اتبعه من الغاوين , وامر بعودتنا الى مخيمنا حفاظا على رعيته ( طال عمره ) .
في المخيم استكملت المساجلة :

رداد سالم :

[poem="font="Simplified Arabic,4,black,normal,normal" bkcolor="white" bkimage="" border="outset,4,gray" type=0 line=0 align=center use=ex num="0,black""]القايد اللي يمشينا على عناده = وش رايكم ياجماعة نحرمه زاده
ولا يهتني بالمنام وطيب مرقاده = وشلون خطط لنا والحين ضيعنا[/poem]

الكايد _ ابو يزيد :

[poem="font="Simplified Arabic,4,black,normal,normal" bkcolor="white" bkimage="" border="outset,4,gray" type=0 line=0 align=center use=ex num="0,black""]يطيب صيد الفضا لا طاب صياده = واللي رمى في عجاج الوقت ما صاده
ما نملك الا الصبر ما نملك زياده = والله على صبرنا معكم يجملنا[/poem]

رداد :

[poem="font="Simplified Arabic,4,black,normal,normal" bkcolor="white" bkimage="" border="outset,4,gray" type=0 line=0 align=center use=ex num="0,black""]الكل معنا تلاقي ناس وراده = والبعض منا لها يا صاح نقاده
والشعر ان كان ودك تقدح زناده = الله يوفقك وحنا الله يوفقنا[/poem]

الكايد :

[poem="font="Simplified Arabic,4,black,normal,normal" bkcolor="white" bkimage="" border="outset,4,gray" type=0 line=0 align=center use=ex num="0,black""]والرأي كثر الحطب والنار وقاده = والعزم يا صاحبي خيال وجياده
نبيك ترمي وخيل العزم معتاده = والله لو ترخص الارواح ما بعنا[/poem]

رداد :

[poem="font="Simplified Arabic,4,black,normal,normal" bkcolor="white" bkimage="" border="outset,4,gray" type=0 line=0 align=center use=ex num="0,black""]دوا العطش يا عميل الخير براده = دوا القلوب المريضة روحة عياده
واللي يريد الشعر يسمع لولاده = والا يعود لبن زيدون ما قلنا[/poem]

مساجلة جميلة بين الكايد ورداد بن سالم قطعها مداخلة لواقعي جدا

[poem="font="Simplified Arabic,4,black,normal,normal" bkcolor="white" bkimage="" border="outset,4,gray" type=0 line=0 align=center use=ex num="0,black""]لاطال شعر الغلط جتكم الساده = يا قادة الشعر وش ذا العلم يا قاده
لا مات طير السعد بيموت هداده = والله على جملة العربان ينصرنا[/poem]

حتى جاء الامر بالتدخل من الجهات العليا بالابيات التالية :

[poem="font="Simplified Arabic,4,black,normal,normal" bkcolor="white" bkimage="" border="outset,4,gray" type=0 line=0 align=center use=ex num="0,black""]العير لو تركسه ويموت في قياده = والخصم لو نحرمه دلوه ومجباده
والعبد ما يرتفع عن شورة سيادة = الله يوفقك وحنا الله يوفقنا[/poem]

ثم يأتي ابو حسام ليختم الحديث

[poem="font="Simplified Arabic,4,black,normal,normal" bkcolor="white" bkimage="" border="outset,4,gray" type=0 line=0 align=center use=ex num="0,black""]الهرج له في العرب يالذرب نقاده = تعرف مصادره قبل تشوف ميراده
والناقصة ما تجي منا كما العاده = الله على الطيب يالصاحب يثبتنا[/poem]

لم يسعفنا الجو فقررنا العودة على مضض
وهنا تنتهي احداث رحلتي , طبتم وطاب يومكم

[حسن عابد]

احب اسجل المشاركة الاولى وسوف اعود للقرأة

[أبو عبدالرحمن]

ما شاء الله تبارك
صحبة مباركة ورحلة ممتعة...

أدام الله عليكم المسرات ..

[ابو ملاك]

ماشاء الله عليكم يابن سلمان ...

رحلة موفقة

وين الصور ...... ؟ والصور للمعلومة أكبر تعبير ... والله انا من عشاق الرحلات والسفر ...
وحب مثل هذي علوم ..

بارك الله فيكم جميع .. ورحلة موفقة انشاء الله .

[ابو عادل]

سوالف تشرح الصدر
طلعة ووناسة وأرض واسعة وربيع ومجموعة متجانسة.
وهذا عز الطلب وبالتوفيق هالمرة والمرات القادمة.

[@ بن سلمان @]

المشاركة الأصلية كتبت بواسطة ابو عادل

سوالف تشرح الصدر
طلعة ووناسة وأرض واسعة وربيع ومجموعة متجانسة.
وهذا عز الطلب وبالتوفيق هالمرة والمرات القادمة.

يعطيك العافية
الله يجعل ايامك كلها انس وسعادة

[رويعي الغنم]

تبارك الله ما شاء الله
بس لي يبن عمي سعالين : ألأول كم كمية البهارات في القصه ؟؟ والسعال الثاني :ليش تهمش خوياك وتقولي رحلتي ولا قلت رحلتنا ؟؟.
الزبده : أخوتك لوحدها وناسه يبو هبه ,,, ومشكور على القصه والرحله الجميله ...

[@ بن سلمان @]

المشاركة الأصلية كتبت بواسطة رويعي الغنم

تبارك الله ما شاء الله
بس لي يبن عمي سعالين : ألأول كم كمية البهارات في القصه ؟؟ والسعال الثاني :ليش تهمش خوياك وتقولي رحلتي ولا قلت رحلتنا ؟؟.
الزبده : أخوتك لوحدها وناسه يبو هبه ,,, ومشكور على القصه والرحله الجميله ...

سعالك الاول
اعرف ان كثير من قراء المنتدى ممنوعين من البهارات بعد رحلة العوارشة عشان كذه هي خالية والحمدلله .
سعالك الثاني
انا ما همشت خوياي نسبت لهم اريج الرحلة وعبقها ( يا فتان )
اسعدني مرورك ولطيف مداخلتك
الصيف الجاي ان شاء الله لازم يكون غير

[abonayf]

يعطيك العافيه ابو هبه

باين الرحله كانت جميله والصحبه اجمل

ننتظر ماوعدت به من نشيد (يا حيد ياللي فيك انا بادي ) .

دم بخير

[@ بن سلمان @]

المشاركة الأصلية كتبت بواسطة abonayf

يعطيك العافيه ابو هبه

باين الرحله كانت جميله والصحبه اجمل

ننتظر ماوعدت به من نشيد (يا حيد ياللي فيك انا بادي ) .

دم بخير

تحياتي ابا نايف
النشيد في منتديات التراث