الثوب ابو نقوش .

[منقاش]

هذا الموضوع تفوح منه رايحة مؤامره ضد ابو نقشه , مؤمره دبرت بليالي حالكة الظلمه , ولا هو ليله واحده , ولا أدري من غرر بشيخنا حليف ابو نقشه وصديقه عميد منتدى الحياه الفطريه حتى وقعه مع أسطوانة التاريخ والتراث هالوقعه المنيله على قول أخواننا المصاريه

ولا أستبعد أن الصهيونيه العالميه تقف ورا هالحبكه اللي سبقها قبل فتره حبكة الصخره أم نقشه اللي في جدار السد وصفى عليها الماء , وبعيدها الثانيه اللي دفنها المقداد ألأعظم ولا قدر حليفي وصديقي العمده المقداد بن ألأسود أنه ينبش عنها ويظهرها من مدفنها .

وهالحين خلونا نعود لموضوعنا .
الأسم أبو نقوش جمع المفرد لكنية ابو نقشه , هذي واضحه ولا فيها لبس ولا جدال , ويبدو أن المتآمرين يبغون يخاطبون العقل الباطني للأعضاء والعضوات , ويقولون لهم هذا المصدر اللي أخذ منه الشيخ ابو نقشه أسمه ووسمه , وفي النهايه يغررون بالناشئه ويرسخون في عقولهم مقولة أن بدر الدجى وعرعرة المنتدى أصول كنيته نسيوانيه .
على كل حال , نبغي عميد منتدى الحياه الفطريه الشيخ سلام يرفع يده عن هالمواضيع ويقعد عند شجاريه وهشيمه ويترك التراث والتاريخ لأهله , وكما يقولون , يا نحله لا تقرصينا ولا نبغي لك عسل.
وفي نفس الوقت نقترح على على مشرفتنا وكاتبتنا , بنتنا السنافيه أنها تنوب عن بنات جنسها , وتخلي بالها من هالموضوع , وتكتب عنه من ضمن مواضيعها المستقبليه , وليته يكون تحت عنوان من العناوين المناسبه مثل , ملبوس ألأمهات والجدات .
أقول , أقترح عليك يا بنتنا يا سنافيه واقول لك , أن جدك الشايب ابو نقشه يقول الحقوا تراثكم يا بنات حواء , واكتبوا عن الصبيغيات ملبوس البنيات الصغيرات , وعن المسدحات والمبقرات لبس الجدات من النساء الراشدات , أكتبوا عنها بجنوبها المقصبات وتناحيرها وحذاياها واكمامها المقصبه , وعن القنع المركنه بالمقصبات , والمسافع المكثلات , وعن القراقيش المخرزه بمختلف صنوف الودع والرصاص , وعن اللثم والغمد والملقيات المزينه بالحراير والمقصبات , وعن الحزم من جديلها لعجانها لمنثورها وغيرها .
أكتبوا عنها لا هنم , ولا تنسون الحديث فيما تكتبون عن تناحير الصدور والجنوب والظهر , ولا تنسون أنواع وأشكال الخياطه اليدويه المنوعه والجميله اللي كانت تزين ملبوسات أمهاتكم وجداتكم , مثل الكحل(بفتح وتشديد الحاء) والمجازع والجره والمردوفه والعرجه والسلسله وغيرها .
أما علوم وكالة ألأنباء السعوديه فهي مخلوطه بأسماء ما أنزل الله بها من سلطان , ولا لها في التراث أصل ولا فصل , وأولها عنوانها , الثوب أبو نقوش , ولا بقي ألا تكه ويسمونه ابو نقشه .
حسبي الله عليهم , وحسبي الله على الخياط الهندي او الفلبيني اللي لقنهم هالأسامي , وحسبي الله عليكم يا نساء آخر زمن اللي خدمهم أبناء ألأعاجم حتى في خياطة ملابسهم قديمها وجديدها .
والزبده , أنتظروا الساعه بعد خدمكم أبناء ألأعاجم , ومشى رجالكم مشية المطيمطاء , وسلامتكم...