أقصى مساحات الخيال

[الذيب]

المشاركة الأصلية كتبت بواسطة سنا الهجرة

أقصى مساحات الخيال

[poem="font="Tahoma,5,black,bold,normal" bkcolor="transparent" bkimage="images/backgrounds/40.gif" border="none,4,gray" type=2 line=0 align=center use=ex num="0,black""]

يا وردة الروح الربيعيه ربيعك في زوال=ما عاد يربطني به الا ريح رشه من عطر
الشوق ياخذني بها لاقصى مساحات الخيال=ويردني الواقع كسير الخاطر الـ حد الصفر
لا جبر خاطر يثني المشتاق عن شَدْ الرحال=ولا فراق ويستريح الحرف من زَنْ الفكر

يذوب قالب ذكرياتي بين ياس وبين فال=على جبال الهجر والاآمال باتت تحتظر
غلطان ياللي تتبع الفرص وعينك للكمال=والله لتتعب وانت (ابو فرصة) وتبطي تنتظر
مثل الذي يرسم دروب الوصل بخدود الرمال=أو من يبي الرجل الكسيره تطوي الكيلومتر

يمكن نقول احلامنا عاشت على طيش اعتدال=والاعتدال ان طال في ذالحال شايتني ظِفِر

خط القلم لو يعتدل يمشي المسافات الطوال=وان مال مهما طال تبقى خطوته نقطة حبر
حولي هياكل من حلول تقول زودت الجدال=بينك وبين اللي تبي تكسيك جلباب الستر
واليا تحسيت الشراب المر من كاس الحلال=فيها بدالك سكر آلايام امر من الصِّبِر
تشكي لها منها جنوب وتشتكي منها شمال=ساعة وترجع من متاهك لاتجاهك تعتذر
لا يا هياكل. مرتوى قلبي من الجم الزلال=أما الطريق الملتوي لو مد ساقه تنكسر
هي من خذ الورد الطبيعي من برائتها جمال=هي من رواني بالدلال اللي بدمي منتشر
هي من تبي تصريفها في جملتي محل حال=هي من غلاها باقيه لوهي ضمير(ن) مستتر

وان قلت ياشمس العمر باقي على وقت الزوال=يا طيب وقت كان نوره في جبيني منتثر

[/poem]

يا الله يا الله يا الله أنا وين كنت عن هالقصيده
اقسم بالله تستاهل تثبيت والله تستاهل
ياخي مدري كيف أوصل لك اعجابي بهالنص واعجابي فيك كشاعر وكلسان قبيله يكفي عشر قبائل
ماشاء الله تبارك الله
مطلع جميل واسترسال في الفكره كان اجمل
وكأنك تترك بين كل كلمه وأخرى أقوى مناطق الجاذبيه العكسيه وخاتمه رائعه أتحدى شاعر يكمل وراها.
بدون مجامله أجمل قصيده قرأتها منذ أشتركت في المنتدى
أنا لو أنا المشرف والله أثبتها هيا افهم يا ابو عبدالله
أسمح لي بأن أحتفظ بنسخه من هذه الرائعه
طولت عليك
وصح لسانك ملايين