سجل حضورك ببيت من شعر******

[ـآنتقآم ـآلورد]

ابد ماجيت ابارك ولكن جيت باوصيك


على اللي ناوي تدخل بها الليله معذبتي





ترى لولا الظروف اللي عطتك وحدت محاكيك


قسم بالله ماتدخل عليها لو على رقبتي





ولكن النصيب اقوى ولا ادري وش اسوي فيك


نعم صارت معزبتك ولا صارت معزبتي





كذا شاءت بنا الاقدار تحرمني لجل تعطيك


كذا لازم عشان تفوز انت اخسر بتجربتي





تراها غاليه جدا وتكفى والله يخيلك


تدللها تدلعها تنسيها مصاحبتي





انا من كثر ماغليها احس اني بديت اغليك


ولا تسال باية حق ولا وش مناسبتي





لانك لو بتسالني بتسمع شئ مايرضيك


لذا ياخوي لاتسال ولا تسمع لاجووبتي





ابيك تحطها في داخل عيونك وبين ايديك


وهي دلوعه اعتادت على كثر مداعبتي





فداعبها شوي شوي حتى تشتهي طاريك


وشاغبها الين تقول لك .. بطل مشاغبتي





واذا هي مالها خلق لا تضحك ولاتسيلك


واسالها .. ياعمري ليه عصبتي ؟؟





وباللك اسمع انك في يوم تضربها وهي تشكيك


مايحتاج اوريك بفن الضرب موهبتي !!





صحيح انك بتملكها ومعك الصك بالتمليك


وانا عارف حدود الله ومن حقك معاقبتي





ولكن قلها المجنون وصاني وهو يعنيك


يقول انه بينتظرك لو شيب وشيبتي





وانا مجنونها اللي مانساها وانت مايمديك


تغطي ذكرياتي في هواها وربع تجربتي





احس اني تماديت بكلامي والغضب حاديك


لو انك في مكاني ماتفكر في محاسبتي





كفاك اني تركت الليله اشغالي عشان اجيك


دخلت القاعه برجلي ولا ادري ويش عاقبتي





وانا ماجيت اخرب عرسك الليله ولا اذيك


انا جيتك عشان اخاطبك واسمع مخاطبتي





توصى وانتبه واحرص عليها والله يهنيك


ترى كل الكلام اللي طلع من ظيقي وكبتي





ولكن ماقدرت اقوله وانت مايخفيك


اخاف اني اذا قلته تقوم وتقطع رقبتي