ألصرام /الدرس ألثاني من دروس منقاش عن التراث

[منقاش]

ألصرام /الدرس ألثاني من دروس منقاش عن التراث ألصرام /الدرس ألثاني من دروس منقاش عن التراث ألصرام /الدرس ألثاني من دروس منقاش عن التراث ألصرام /الدرس ألثاني من دروس منقاش عن التراث ألصرام /الدرس ألثاني من دروس منقاش عن التراث

بسم الله الرحمن الرحيم
كان درسكم ألأول عن ألدياس , والليله الدرس الثاني عن ألصرام ,,, صحيح كان المفروض تدرسون الصرام قبل الدياس والسواني قبل الصرام والأثاره قبل السواني , لكن أنا حر أديس عليكم كما أبغي وعلى أخشامكم الشحم (شحم سيارات) , وثاني مره تحلون واجباتكم ياللي ما أنا قايل وانتم ما تشوفون الدرب وأحمدوا الله أني صابر عليكم .
فعل صرم في لغة ثماله تعني بتر ألشيء بسرعة بواسطة آلة حاده , وفي الحصاد تعني حش القصيل من مستوى ألأرض (اسفله) بواسطة المحش ,, والصرام بكسر الصاد وفتح الراء هو عملية الحش التي يجمع فيها ملء الكف من القصيل ويبتر دفعة واحده بالمحش, والصرام بفتح الصاد وتشديد الراء مع فتحها أسم الفاعل وجمعها الصرامه , والصريم هو القصيل المصروم ,, والصارم أسم من مترادفات السيف ومن مترادفات صفةالرجل الحازم الحاسم في الأمور مثل الاستاد منقاش أطال الله في عمره ..
وقبل أنغمس في الشرح وأنسى اللي أهم من الدرس أقول لكم : خذوا في حسابكم (واجب) انه كل يوم واحد منكم لا هان يجيب معه شوية ضرمه لحماري ولا تكلفون على أنفسكم واجد , بس في حدود خمس لوايا برسيم والا شعير أو خيشه علف واللي تقدمونه لحمار أستادكم منقاش تبون تلقونه قدامكم في نتايجكم آخر السنه ..
نعود للدرس :
اللي يصرمون (الصرامه) أذا حطوا أيديهم في الصرام يبتدون من صداري الركبان وينتهون عند العقمان في ناقع كل ركيب ,, وأذا كان الركيب مسقوي كل صرام يصرم شطي واذا كان عثري يصرم سوقه ,, والصرامه يبتدون الصرام صف واحد ويتسابقون , ويتحركون وهم يصرمون للأمام وكل صرام منهم قاعد الحفزه أو يحفز رجل ويثني ركبة الرجل الثانيه على ألأرض , ويجي من خلف صف الصرامه صف الحضانه اللي يحضنون القصيل بسنبله على شكل لوايا كبيره (حضن) كل حضن بالكاد تلتقي عليه أيادي الرجال البالغ , ومن خلف الحضانه اللقاطه اللي يلقطون اللي يتساقط من القصيل والسنبل , وفي الغالب يكونون صبيه صغار ثم يجي من وراء الجميع الحماله اللي ينقلون اللوايا (الحضون) على ظهور البهايم وبعضها على روسهم حتى يوصلونها للجرن (جمع جرين) .
أذا كان القصيل بسنبله ناشف (يابس) يكدن على شكل كدن في طرف الجرين, واذا كان لين أو باقي فيه رطوبه يسطر , والتسطير هو فك الحزم وفردها للشمس علو ألأرض جوار الجرن لغرض تنشيفها .
والتكدين يحتاج لمهاره من مكدن راعي خبره يرص القصيل مفرود بسنبله على هيئة دائره يكون السنبل في مركزها (وسطها) وآخر القصيل في محيطها ويستمر في الرص الى أعلا , وكل ما علا الكدن كل ما ضاقت (مالت) للداخل دايرة الكدنه (شي بسيط) حتى تكون بأرتفاع القامه أو أكثر شويه ويكون شكلها أسطواني , ثم يغطى الكدانه أعلا الكدنه بالتبن واللي متيسر من اللبود .
والحب في سنبله مع قصيله في الكدن يبقى فترة طويله ربما تصل لعشر سنين بدون أنه يخرب بسوس والا غيره , لكن الحب يخرب بسرعه بعد سنه الى سنتين أذا كان حب صافي في المخازن وألأكياس .
وفي نهاية يوم الصرام يعطى راعي الصريم الشعاله ( الصرامه والحضانه والحماله والكدانه ) شغالتهم من حضن الى حضنين من القصيل بسنبله , والحضن كما بينته لكم هو حضنة القصيل اللي بالكاد تلتقي عليها يدين الرجال الراشد ,, أما الطرقي المار على مكان الصرام (اللي ما يشتغل) فيعطى فريكه وهي حزمه تقارب نصف الحضن , وأقل عطاء لصبي من اللقاطه أو واحد مر ولاطلب ولا أشتغل هو الحنكوته وهي لويه بالكاد تلتقي عليه أصابع اليدين الثنتين أذا وضعت في الكفين , وفي العاده تكون من القصيل والسنبل ألأخضر المستوي لأن اللي تعطى له يشويها أو يلهلبها على اللهب حتى يتفسخ السفا عن الحب اللين ثم ياكله (يعني وجبه سريعه).
الصرامه لهم غناء يسمونه ردح الصرام أيقاعاته ولحونه تناغم مع حركة الصرامه وهم يصرمون في حركة أهتزازيه الى ألأمام والخلف جيئة وذهابا مثل قصيدة بدايتها:
وانا ما احسب البنت تاكل قضامه ,,,, تحس السفا من تحيت اللثامه
ولا يا عسل سال فوق الرداعه ,,,,, ترى الاجنبي اليوم معكم وداعه
وانا ما معي في المقادير حيله ,,,,,, مسيكين وابصار عيني كليله
وغير ها كثير ..
الدرس الجاي (الثالث) يبي يكون عن الذريه , وابغيكم يا طلاب منقاش تاخذون الدرس بشي من الجديه حتى يستفيد منه من يقراه بعدكم , ونبغي اللي يقدرون منكم يدعمون الدرس بقصايد قديمه من قصايد الصرامه وبصور للجرن والكدن والدياس وغيرها لا يبخلون بها على زملاهم , وسلامتكم....



كلمات من الدرس نبغي من يبين معانيها ؟؟ :
صداري الركبان , ناقع الركيب , العقم , العاقد , شطي , سوقه , الحفزه , يكدن , كدنه , مكدن او كدان, لبود , القامه , الطرقي , يلهلبها , السفا والسفاه , قضامه , الرداعه , مسقوي , عثري .

[أبو عبدالرحمن]

يا سلام عليك يا أستاذ منقاس...

حقيقة بهذا المستوى لا شك أنه دلالة على مدى البراعة والتميز في الشرح والتوضيح..

ولدي اقتراح بسيط:

نفتح للطلاب المهملين فصول تقوية في الفترة المسائية..
عساهم ينجحون...وعسى الراتب يزيد!!!

[admin]

أنا سأحضر لك بعض الصور
وأترك لك الشرح والتفصيل




الصورة الثانية:


الصورة الثالثة:




الصورة الرابعة



وهذه الصورة الأخيرة:


ننتظر شرحك يا أستاذ

[ابو عادل]

يسعدني ياأستاذ منقاش حضور دروسك ولي عليك ملاحظات
الأولى : ابتزاز طلابك النجباء بضرمة الحمار يعني قلبتها دروس خصوصية ماعاد ناقصك
الا الصلعة وتملي جيوبك سندوتشات ..... أيه دا بئا؟
الثانية : ان محشاتك أقوى وأكثر من محشات القصيل.
الثالثة : طلابك معظمهم من الشباب وانت قاعد تروي لهم أهازيج (تستّك) الشباب
الرابعة : ليه ماذكرت العصيف ياأستاذ منقاش وهو ذوصلة بدرس اليوم.
الخامسة : أبحاول اجيب معاني الكلمات وتحط لي درجة المشاركة كاملة وأكون عريف
الفصل واكتب لك اسماء المشاغبين على الكدنة .

صداري الركبان: الجزء المرتفع من الركيب الذي يصله السيل أولا وهو ارتفاع خفيف وغير
ملحوظ الا بواسطة انسياب الماء
ناقع الركيب: الجزء المنخفض (عكس الصدر)
العقم، العاقد : مترادفان ومعناهما البناء الذي يحجز طينة الركيب ويحميها من الانجراف مع مياه السيول.
شطي: قطاع طولي يتراوح بين الثلاثة أمتار الى الأربعة تقريبا وهي تقسيمات تفيد في عملية الري وفلجان الركيب.
الحفزة : جلسة تشبه القرفصاء وتساعد على التأهب للاندفاع الى الأمام أو جهة اليمين والشمال أثناء الصرام.
كدنة : هي الكومة المنظمة للقصيل بعد رصه بالطريقة التي ذكرتها بعد اتمام عملية الرص.
لبود : هروس وخلقان. بالية من الفليج أو الشملة وغيرها تقدر تقلي وش معنى الفليج؟
القامة: طول قامة الرجل ( في حدود ( 160 -170) سم تقريبا.
يلهبها : يشويها على شعلة النار من بعد أي على آخر اللهب من الأعلى
السفا: القشرة الخفيفة التي تغطي الحبة وتغلفها.
قضامة : الحب الذي يؤكل بطريقة (الحسك ) بدون طحن
مسقوي: مايسقى بماء مصدره البئر.
عثري: مااعتمد في ريه على مياه الأمطار.
طرقي : عابر سبيل.
الرداعة : ماأعرفها
سوقة: مااعرفها

أتعبتنا يامنقاش (قصدي الاستاد منقاش) وتراني ماأحب الأسادسة. هيه صحح واعطيني الدرجة.

[بن عواض]

الله يرج يا استاذ منقاش والله درسك ممتاز ولا تنسي أبو عادل من الدرجات الكاملة وياليت يكون درسك مسنود بوسائل تعليمية والافضل لو كان هناك حصص عملية حتي نستفيد أكثر أما حمارك أخاف احد يدسلك السم في ضرمته فأنصحك تخلي ضرمته من عندك وتحت عينك حتي لا يحدث له اغتيال غير محسوب .

[ABO TURKI]

يالربع خلو منقاش يرد المكنسة اللي سرقها احسن
نطرح الموضوع على طاولة النقاش
يجيب المكنسة والا انا لسني مسعول عما سيحدث
والمكنسة لا تقرب من الصرام حقك تخربها

[منقاش]

أبو عبدالرحمن : اعتبر نفسك ناجح حتى لو ما حضرت الدروس لأنك تحترم ألأستاد منقاش ومحتاجك في علوم ثانيه أهم من الدروس منها طرد بعض ألأعضاء .
الطلبه الكسالى يقدرون يعوضون عن كسلهم في الدرس بعكه سمن والا سقاء لبن والا عشرين بيضه, وودي أنبه أن هذي الهدايا مفعولها ينتهي بعد أسبوع والجذع بعد شهر والحسيل بعد ثلاثة أشهر والثور والجمل بعد عام دراسي كامل .
والغايبين اللي ما تشوف لهم مداخله يرعون حماري وبعضهم يسوي شوية مساج للحمار مقابل سكوتي عن غيابهم وفوقها يعيدون العام الدراسي لأن نزاهتي ما تخليني أتغاضى عنهم .

[ABO TURKI]

والله شديد يا منقاش مطنش ما كن اسمي مر عليك
بعد ما تفرعنت واخذت المكنسة مسوي ثقيل
طيب بسيييييطة يامنقاش انت وحمارك

[منقاش]

المشرف الفني على شئوون الطلاب والطالبات : مشكور على جهدك لكن الصور ما ظهرت لي حتى أعلق عليها , أذا ممكن تشوف السبب تكون مشكور .
ابو عادل : أنت أحسن طلابي ويا ليت السيبه ابن عزاب وابن داخل وابو أمجد وابو تركي وابو هاشم ورويعي الغنم يقتدون بك ويبطلون الذياخه .
تعليقي على أجوبتك : ممتاز وتستاهل 110 من 100
اما العقم فهو ظهر العاقد اللي يمشون عليه
الفليج : يوم سعلت كانت أمي الله يطول عمرها نايمه وبعد صحيت جاني ألهام وتذكرت أنه من أجزاء الخدر (بيت الشعر) .
الرداعه : هي الردعه والمقصود منها في بيت الشعر الحجر المستوي الموضوع تحت مدخل ومخرج النحال من وللخليه حتى يسير عليه مدرجات هبوط واقلاع النحل .
السوقه : هي المسافه اللي يقدر يسوق الصرام نفسه لها بسهوله ويتناولها بالمحش ويصرمها وهي حوالي ما يزيد على المتر على يمين ويسار الصرام , والسوقه في العثري تقابل بعرضها الشطي في المسقوي .
أما قيلك أن طلبتي شباب وخايف عليهم من ألأنحراف أحب أطمنك أن أغلبهم من قارح وفوق وقليل منهم اللي سدس , واطمنك أن أكثرهم منحرف للخلف من البروز ألأمامي (الكرش) وبعضهم منحرف للأمام واحدودب ظهره , وقصرها ما فيهم من يصلص طبله ولا طار ولو تنزلهم الحراج ما احد شراهم لو بريال واحسنهم حال الفحل العلامه ألأستاد منقاش اللي يصلح صارم (سيف)..
والزبده مشكور على أثرائك الماضوع .
أبو تركي : المكنسه أرتديناها يوم أبيت لا تردها وما ضاع حق ووراه طلاب . وعلى فكره وشب ولد خالك ابن عزاب عليك , تراه لاقاني يتهدد ويتوعد فيك ,,, بس تراني قلت له في المدرسه ما عندي لكم الا ألجريد واذا روحتم لأهلكم عسى الكلاب تاكلكم ولا نلقى ألا عظامكم أنتم وبن عواض .
ابن عواض : نبغيك تسعفنا بكم كلمه الحيث أنك زراع وولد زراع ( رحمه الله) ...

[abonayf]

مرحبا الف يامنقاش
يعطيك العافيه انا مستمع عيو يقبلوني نضامي معكم مدري ليه لكن ترى عندي لك حصان نهاية السنه اذا نجحنا وقبلوني معكم يسير تستفيد منه احسن من حمارك .