وافضيحتك يا منقاش/ الحلقه ألأوله

[منقاش]

وافضيحتك يا منقاش/ الحلقه ألأوله وافضيحتك يا منقاش/ الحلقه ألأوله وافضيحتك يا منقاش/ الحلقه ألأوله وافضيحتك يا منقاش/ الحلقه ألأوله وافضيحتك يا منقاش/ الحلقه ألأوله

قبل كم سنه أرسل علينا عزيمه واحد من جماعتنا متوظف شيخ على ارامكو وساكن في الظهران , الرجال كان عنده قرى ومجوز أثنين من عياله على مريكانيات من بنات زملاه المريكان في الشركه وقال تكفون يا ربعي مبداكم وميقافكم ترون ارحامي أجناب ومن سد الارواع وابغي الحميه والنورزه والنومسه والعرضه اللي تكسر عين الأجنبي .
ما قصر الجماعه اللي أخذ جمل واللي أخذ ثور واللي أقل منها ومشوا في اللواري مع البر بشعارهم وقداديحهم وبارودهم ومقهاتهم ولا بقي ألا بعض كبار السن والحريمات اللي يبون يسافرون يوم القرى في الطيارات, وانا كنت مع الباقين ومعهم ولا أنا معهم ,,, معهم أني مسافر الظهران أحضر القرى وعنهم أني مسافر لوحدي .
ليش ؟؟, السبب أنه كان فيه قليل خاتمه من الجماعه في مطار العسكر حق الطايف وقال لي الماخوذ يا منقاش: ترى الخل بلاش أحلى من العسل وانا أبغي أركبك على طيارة العسكران بلاش تروح للقرى لكن بشرطين , الاول أنك ما تجيب معك حمارك والثاني أنك ما تجيب طاري والا تعلم أحد من الجماعه حتى لا يحرجوني , وترى الطياره تمشي من الحويه بعد صلاة الظهر . قلت للرجال تم , ويوم حزبوا الرفاقه ماشين بالبر خنست عنهم واعتذرت منهم وقلت أغدوا بالسلامه وانا باقي عند شطوني ومهاملي ولاحقكم والميعاد في القرى .
عاد منقاش ما يعرف الطيارات ولا عمره ركبها ولا أعرف عنها الا أذا حنت في عليات السما ماره من فوق بلاد ثماله .
يوم القرى غبشت وسرحت الماقفه واشتريت هاك النجدي الرباع اللي كما الثور , واستاجرت في الماقفه موقف لحماري مع الضرمه والمويه ثم أستاجرت هاك الحوض التتسن من الماقفه وطلبت راعيه يوديني لرفيقي بعد سميته له, وقال لي أنه ما يعرف رفيقي لكن يعرف مطار العسكر في الحويه واسمه الكاعده ويبي يوصلني ومن سال ما ضاع .
مشينا بالتتسن أنا في الغماره ومعي بندقي وبارودي وعصايه وأغني واردد في القيفان وطليي في الصندوق يخور ويبعر , وعلى أولنا وضحى أول ونحنا عند باب المطار .
وقفونا العسكر البوابين وطفى السواق التتسن وانا بعد أغني في الزههم اللي منها : حلفت لكسر البراد وارمي فناجيله في الابعاد, ما عاد له عندنا مقعاد والشادليه شرب الاجواد .. قال السواق : أصه يا منقاش خلينا نسمع .. سكت عن الانشاد واقترب مني البوابيين وقالوا خير يا طير؟ واسمع واحد منهم يقول لخويه: وجه هالسفله (يقصدني) مثل وجه ابن فهره والظاهر أنه قاطع الرشمه , والثاني يقول لخويه ما سمعته(يقصدني) يقول حلفت لكسر الباب وارمي به في الأبعاد , بلعتها وسويت نفسي كني ما سمعت , ولا بلاكم الله بعسكران على باب الكاعده ,الرجال منهم نفسه في راس خشمه .. بغيت اعلم لهم بعلومي من أولها وسبب مبدايه على رفيقي في الظهران لكن سكتوني وكهموني وتكلموا عليه وقالوا لي أكرمكم الله : أنطم يا مروح وهات علمك من آخره , أنت وش جايبك؟, كلمه مني وكلمه منهم , كنت أعتزي , أنا منقاش أللي ماينحاش قاعدين يالرخوم للناس في السكه السلطانيه ومطولين ألسنتكم ,,, كنت انزل عليهم عادي بالشون ناوي ألتحف منهم وافترش وأهدر ولي لهوانه كما لهوانة الجمل , كانوا يتعاونون عليه ويخبطوني بعصا معهم أثر فيها كهرب دوختني حتى طحت وكتفوني وركبوني مع طليي في هاك الجيب وودوني غرفةالتوقيف في السجن أنا والطلي وصكوا عليه باب واغلاق. أصيح وانادي ويجيني هاك الزابط .
سعلته من يوم قرب: أنا وش ذنبي ؟ قال ذنبك كبير , أنت معتدي على الحكومه والطيارات والمطار وتبي تروح فيها روحه قشراء,, رديت عليه : أنت من أي القبايل يا وجه الخير؟ قال أنا من الحكومه ,, قلت : خذ بندقي معدال وانزل أنت والحكومه معي على الفراش للحق والمستحق , واهمها لا تعطلوني أنا والطلي عن الطياره والمبدى والقرى والا ترون هذا نقص ثاني أنبه عليكم من هالساعه, لا تقولون بعدين منقاش ما نبه علينا.

باقي القصه والاسفار والغروق والشروق في الحلقه الثانيه

[admin]

أفا
يالعلم
لكن أكيد رفيقك اللي شغال في المطار تكون علومه سنعة . ويسنعك

[منقاش]

يا ابن عمي يا فني يا شريف : لا بالله رفيقي اللي في المطار يبي يزفتها وتبي تعرف باقي العلوم في الحلقه الجايه..
يا ابن سلمان وراك ما تبدي أنت وابن عزاب والا خايفين يجيكم من المطر رشاش ...

[أبو عبدالرحمن]

مسكين يا عم منقاش

تكالب عليك هؤلاء السفلة

آما علموا من انت وابن من؟؟!!

لكن اكمل السالفة ؟ونشوف العلم واش حصل فيه

[H Y T H A M]

أخاف أنك (طواز) ماحد عزمك للقرى ولاهم يحزنون ماغير اللقافه موديتك للشرقيه
وإلا الأمريكان ورحيمهم وش يبون فيك أنت وحمارك يابونقشه

[المبرِّد]

يا حسافة عليك يا منقاش
تركت جماعتك وعزوتك وروحت عند قليلي الخاتمة
والله فرحت باللي حصل لك تستاهل اكثر يا مفارق جماعتك

[المشتاق]

سبحان الله هي جلافة البدو وتعجلهم
هذا بن عزاب الله يجزاه بالخير تلفن علي وقال سنايدي يا مشتاق وقلت له ابشر وقال لي عندنا قرى في الشرقيه عند عيال عم لنا وفيه مبدا كبير ولا بيقعد منا احد كلنا بنروح ان شاء الله وعاد قلت عندنا كبار سن وارامل ما يقدرون بر والخطوط مع الحج زحمة وانا اكلم القايد عندنا وقال خلاص ابعطيك طيارة السلاح تطير فيها ريعك ويقول وانا اكلم جماعتي عجزهم وشيبانهم ومنهم العم منقاش والحين ادورة وقالوا لي عيالة انه عند حرمته الجديده يقصدون الصحفية حقت السي ان ان وازهم عليه هناك وترد علي ويالله فهمت من لغوها انه راح الماقفة ويبي مني انا يا مشتاق اعترضه هناك واجيبه
هاثم اطمر على ظهر ددسني والقي للماقفة وادوج بالددسن عليها لفتين والياه على ضعفه يقود له في ذاك الطلي يا رجاجيل طلي وما هو طلي شي تقول حوار ولا هو بحوار شي يبيض الوجه حواري انه من مثامين 1200 والا 1300 ريال ليا بديت به مع ربعك والياه يجمل وما هو كما ابن ابي محمد ما خذ له هريد تستحي تبدي به وما تدفع فيه عشرة ريال وانا اجيه وهو ضعيف شوف ولا عرفني قلت له مشوار يا عم وانا اتقاطع معه على خمسين ريال الين القاعدة و لو عرف انه انا ومرسلني بن عزاب يعي يركب من عزة نفسه .
هاثم وااشد الطلي انا وثلاثة سودانيين ويالله يالله نحطه في ظهر الصندوق ثم احط رجلي عاد البنزين بيرخص الحين ولا يردني الا بوابة القاعده والقى عليها ضباط خفر اثنين واحد تركي ولد حياة بندر بن عواض الله يرحمه والثاني ما اعرفه زين اللي اعرفه انه من المشالحة وفيه من دم مشيلح واسمع تركي يناديه يا عادل ويو شافولك منقاش معي وهم يوم قامو يتمصخرون عليه ويقلون ادبهم عليه وهو يهوشم لكن وين يروح هالشايب من كبر السن وهم يكلفتونه ويشيلونه وجيت اتكلم قالوا عود وراك ديور يالله ودرب الطايف تدله .

علمي وسلامتكم

[الحجاج بن يوسف الثقفي]

ياخي انت كل واحد يلطمك
الهثنفر حاطينك مرمسه لهم خلك معي وانا ابوبوجي
وتشوف كيف تزين علومك

[ابو ملاك]

ترى فيه حقوق . . حيوان
ارفق بالحمار يامنقاش . . . هاهاهاها

[ابن ابي محمد]

فالك وجا لك في ثفالك, وتستاهل ..