الله يعينك يا مخاوي

[منقاش]

الله يعينك يا مخاوي الله يعينك يا مخاوي الله يعينك يا مخاوي الله يعينك يا مخاوي الله يعينك يا مخاوي

الله يعينك يا مخاوي منقاش على نفسك ويكفيك شرها .
ما هي الا سلامتكم . قبل يومين كنت ملقي السوق أتهنفل واتسوق , وكنت حاط غليوني في فمي وعصايه في يمنايه ومتعلق بندقي على جنبي ألا وانا أشوف هاك اللمة من الناس اللي ملتمه واسمع في وسطهم صياح ونياح .
كنت أبدي راسي واطل من فوق رقابهم الا وعيني على طيب الذكرمخاوي منقاش تحت تكروني مبتركه ويصيح وله فحيح ,, كنت أصيح في الحاضرين واقول : جنبوا يا من حضر حتى لا يلحقكم من المطر رشاش , كانوا يجنبون كلهم الا سته من التكارنه مسوينها حميه مع التكروني اللي يضرب في مخاويني , وكانوا محوطين مكان القتال على شكل نجمه سداسيه (نجمة داود) , والتكروني السابع شغال في مخاوي منقاش بالركب واللكمات والمسكات المخلبيه على ألأماكن الحساسه .
كنت أعتزي وارتجز بقصيدة ابو عادل اللي مدحني بها واتقادى وادور حوالي نجمة التكارنه في عرضه مثل عرضة الهنود الحمر , واحيان أنبرم كما يوم يبرم الداب واردد : وين خليتوني عنه يا بني تكرون ؟ , بعدها أنفجرت ولا تسألوني ويش سويت ؟, لأني أذا عديت أغيب عن وعيي الى درجة أني أحيان أشرب من دماء ضحايايه ..
الزبده , يوم أنقشع غبار المعركه والتكارنه السبعه ومخاوي منقاش كلهم مديد في دماهم بين الحياه والموت ,, قد أثري ضربت التكارنه وضربت معهم مخاوي منقاش وانا ما أدري عن نفسي يوم حمي الوطيس .
جات الشرطه وكان شيخهم برتبة مكدم صاحب لي من بعد أهديت عليه هوريتين برشومي ونشبت فيه ولا قدر ينسى الصحبه بعد نشبة البرشومي , وهو (شيخ الشرطه) واحد من أعضاء المنتدى بعدين أعلمكم باسمه ,, ويوم شافني وعرف أن الحال اللي في الملعوطين مني قال لي : أنحش يا منقاش واعط الساق لحقه وغيب عن السوق وانا رايح أسجل الحادثه على مجهول .
عاد أنا سعلت بعدين ويش سبب عدوة التكروني بمخاوي منقاش ؟, وبلغني أن مخاوي جاء يحلق عند التكروني وحلق شنبه بالغلط , وترادوا بالطلبه , واحد يسب الثاني حتى قال مخاوي للتكروني : أقلب وجهك يا تكروني يا ولد### , والتكروني رجال حر ولا هو كما سبه مخاوي , لأجل كذه كتف التكروني مخاوي وزاد حلق لحيته بعد حلق شنبه وفكه وجهه كما وجه المره ,, وبعد خرج من الدكان في الشارع ظن الجبان أنه بعيد , وزاد سب التكروني اللي لحقه وابتركه ولا لحقه منه بركه .
خلاصة الزبده : مخاوي منقاش شوفوه في العنايه المركوزه في المشتشفى , تكفون زوروه وطمنوني عليه , ووصوا التكاتره يخلون بالهم عليه ..

[فتى ثماله]

خخخخخخخخخ

الله يرحمنا برحمته

وماشاف يتهاوش ويحلق الا عند بني تكرون

الله يعينه بس

[منقاش]

بيض الله وجهك يا فتى ثماله
لكن ليه ما حاولت تعرف شيخ الشرطه المكدم اللي نشب فيه البرشومي ..

[مخاوي منقاش]

القصة حقيقية 100% وسبق ان علمت ابن عزاب وابو امجد وزاروني بالمستشفي ولا هي عيب ان الرجل يعيل ويتحمل ماجاه والرجال غوالب والكثرة تغلب الشجاعة وتحصل مع اطيب الرجال ولكن قصتك يالخسيس مع الفلبيني هي اللي تكصم الوجه بس يسمح لي ابو عبد الرحمن بنشرها ويعاهدني مايحذف شي منها---- وللاسف انكم ياهل الطايف وخاصة المسؤلين يشتري ذممكم منقاش بمكتل برشومي////// وابشرك يبن سلمان قبل ماتشمت ان الشعر نبت والمواجع راحت مابقي الاعضة منقاش في فخذي يوم يعضني واحد التكارنة عاضة مع مؤخرتة ولذلك عذرتة لانه مازارني بالمستشفى حيث جاس اسبوع ينام وياكل على بطنة والله يبعدنا واياكم عن اولاد الحرام والتكارنة ومنقاش

[رويعي الغنم]

الحقيقه لو ما شهادتك يا مخاوي منقاش ما كنت أصدق لأن الرجل بهاراته هنديه وكثيره.
أما وقد شهدت أن منقاش أفترش سبعة من الرجال وانت ثامنهم فقد وجب التصديق ويستأهل منقاش وساما عليها.
واقترح أن يكتب على الوسام الكثره لا تغلب الشجاعه .

[ابو عادل]

الرجال صيد الرجال
والتكارين سبعة ماينلام مخاوي واليوم مضروب وبكرة ضارب ويكفيه شجاعة انه جابه التكارنة السبعة وهو واحد .
المهم سلامات يامخاوي ومنقاش ماقصر راعي الفزعة ويستاهل الوسام (أنا اشهد)لكن والله شوقتني لمعرفة القصة البطولية لمنقاش اللي طرفها الثاني فلبيني عجل بالسالفة ودنا نسمعها منك.

[أبو عبدالرحمن]

دخيلك ـ يا مخاوي منقاش ـ تعرف هذا المنتدى يقرأه الكبير والصغير والرجل والمرأة ...

وما أشرت إليه سيسبب لنا مشكلة عند كبار ثمالة...

استرت ما وجهت من منقاش...

[منقاش]

مخاوي منقاش : ليش تزعل من الحق والصدق ؟, وتراني سترت بعض فضايحك لأن المنتدى ما يسمح بالفضايح كما قالك أبو عبدالرحمن .
رويعي الكلاب : يا ملقوف ويش يدخلك في شي ما يخصك , والوسام هو أفعالي اللي سويتها ماهي الخربشه اللي يحطونها قدام أسمي .
ابو عادل : صدقت في بعض علومك , خصوصا شهادتك أني أستحق وسام الشجاعه .
وصدقني أن قصيدتك اللي مدحتني فيها باللي فيه أعطتني زياده في القوه حتى مرمرت التكرن ومعهم مخاوي, وذكرتني مرمرتهم بمرمرتنا لأبو تركي ومجموعته في المعركه اللي على بالك.
أبو عبدالرحمن : صح لسانك , وانا من جانبي ملتزم بالصدق وبقوانين المنتدى .

[abonayf]

الله يخارجنا

هذا خبري فيك يامنقاش رجال بعشره

[الشيهان]

ياجماعة الخير صلوا على النبي

اليله ساقتني الخطوه لشرطة الطايف عند واحد من الزملاء ابغيه في هرجه ويوم اني دخلت عليه من باب المكتب وهو عاير في وجهي من على كرسيه وقال تعال جيت وجابك الله وانا من ضحى ادور لك

قلت بسم الله الرحمن الرحيم ياساتر عسى ماشر
قال انت تعرف واحد من جماعتكم اسمه منقاش قلت ايه ( والطقعه ) قال والطقعتين ونص كمان

قلت يارجال هذا فضايحه اكثر من فضايح بوش فالعراق هات العلم

قال ابد اليوم هذا المخنز طب السوق يتهنفل ومعه عطيف شاريه من عند العباس ويستعرض به في البرحه وعند مسجد الهادي يتميلح للرايح والجاي من الغزلان المهم يوم زادت علومه وان الله يطرحه في يدين ناس من عرب ماترحم

وهم يمتسكونه ويحوفونه حوفة هنيه لعباس ويوم الله يريد له الفرج والا هذا واحد من اهل حايل اللى مايتركون الخوي قد مر له صحبه مع منقاش كان والله ينط في حلوق الرياجيل ومرغه له ومرغه لهم ويوم وصلوا عسكرنا الموقع الا والعرب كلهم مخلطين في دميهم الا مقطوع النما منقاش حط رجله ولا عينوا الا غباره مع خان الليطاني وحماره وراه له نهيق وكب خويه في يدين الرجال

المهم العرب في المستشفى ومنقاش علق بالفرعه واحتجى له في غار واحنا نبغى طياره من الدفاع المدني تروح تجيبه وعلمي وسلامتك

قلت الله يعظم اجرك والله لابنرسل طياره واصلا حرام فيه جراده تطير له تبغى نحرك له هلكبتر لاتستعجل تراه خبل يومين والا ثلاثه يجيك يتهنفل في السوق يحسب العلم انتهى ترى ماعنده عقل واقبصوه