منقاش الرياضي / الحلقة الثانيه

[منقاش]

منقاش الرياضي / الحلقة الثانيه منقاش الرياضي / الحلقة الثانيه منقاش الرياضي / الحلقة الثانيه منقاش الرياضي / الحلقة الثانيه منقاش الرياضي / الحلقة الثانيه

الله يعينك يا منقاش على هالقصه حتى تكملها,,, يا كم ثورت عليك من ثيران ما يحبون الصدق ولا علوم الرجال...
على كل حال عرفتم من الحلقه الماضيه قبول منقاش لعزيمة صاحبه العمده اللي منها رحلتهم لجده وحضور مبارات كورة الرجلين في ملعب الصبان, وهالحين أبغي أعلم لكم عن باقي الرحله بس أياكم تنكرون الحقايق والا تشرهون عليه , والا ينغزكم الشيطان وتبربسون أوتخنبقون ..
بدون أطاله أخذ العمده حماري ووداه ضيافة الحمير ,,وويش من ضيافه ؟؟ يتمناها الواحد لبعض الناس ,,, كرم حاتمي , فيها المذاود المليانه بالضرمه من برسيم وتبن وشعيروغيره , وفيها زريبة الغسيل ومختصين في مساج الحمير والحنى والحلاقه وتنظيف ألأسنان وحشوها وأشياء أعرف أولها ولا أعرف تاليها ,,,, ثم بعدها قال العمده : ياواد منقاش يا سربوت , هادي تياب مكاويه لا بد تلبسها حتى يسير اللي يشوفنا يقول عيال حاره وحده ..
سويت اللي طلب العمده من عمامه الى بقشه ألخ ... بس ضايقني منها الطاقيه كانت طويله وممتده فوق راسي متر والسروال كان يسحب في ألأرض والشون كانت أطول مني,,, توكلنا ومشينا قبل أذان الظهر في بقس أبلكاش مع طريق اليمانيه قبل يتسفلت (كله بطناج) وقبل يسوون جبل كرى , وكان معنا السواق واربعه من جماعة العمده , يعني كلنا سبعه على عدد أيام ألأسبوع..
مشينا على أولنا حتى وصلنا مكان مزحوم ويعج بالخلايق واللجه واللجبه في جده ,,, هاثم قال لنا العمده : هيا أنزلوا ### ,هدا الملعب قدامكم .. رديت على العمده : وين البحر اللي تقول يا عمده؟؟, ياللحيه الغانمه والراي مشترك للجميع - خلوا الكوره بكره , وخلونا أول نروح للبوابير والبحر ... رد العمده وخوياه بفم واحد : أتلملم يا واد منقاش وسكر فمك وأمشي بسرعه , المباره رايحه تبدى دحين وتفوتنا...
نزلنا وجلسنا في وسط المنصه وبدت المباراه , وشفت خويايه والعمده يصيحون ويصفقون ما عاد يدرون عن أحد , قلت في نفسي مع القوم يا شقرا ,, وكل ما رفس الكوره واحد من اللعابه صعقت وصفرت وصفقت ,,, أثري وانا ما أدري أحيان أشجع الفريق اللي ما يبغيه العمده وكل القشران اللي معنا في المنصه , وكانوا العفنى يطالعون فيه أحيان طلعه ماهي زينه يبون يقصوني نصفين ,,,, لكن وش دراك يا منقاش عن السالفه وما في قلوب الهتول واللي مقبل عليك؟ ..
المهم أستمرت المباراه ,,, ولا طولنا حتى جاء أول هدف من فريق في الثاني , واقوم واقف على روس أصابعي الجلج بأعلى صوتي وأصفق لوحدي من بين كل اللي معي في المنصه, واثر الهدف من الفريق اللي خصم لفريق العمده وكل اللي معي في المنصه , واثري بطيت كبودهم ,,, وعلى غفله مني الا وهاك الشون اللي موقعه على ظهري من الكتف الى الكتف , والتفت ورايه الا وهو العمده يبي يثني عليه من شونه بضربه ثانيه ,, كنا نتخام بالحلوق نتقاتل, ثم قبس كل اللي في المنصه وأخذوني رمي من يد نشيط في يد أنشط حتى هبطت بحفظ الله ورعايته على مقفايه مع نهاية المدرج في وسط المضمار ...
قمت وجلست في طرف المضمار أفكر ولا أنا مصدق واقول : وامصيبتك يا منقاش مصيبتاه ,, ويش جريرتك وويش ذنبك؟؟ وويش جابك مع هالرمه اللي ما يعرف حق الخوي على خويه ولا الضيف على مضيفه ,,, وأنا جالس جاء في راسي فكره , وقلت ليه يا منقاش ما تلقط الكوره وتشرد بها وتعطل المباراه وتنكد عليهم كما نكدوا عليك ..
واتنظر حتى خرجت الكوره جهتي وصفر الحكم , كنت أزرقها والتقطها وانحاش بها أسعى كما الغزال ,,, وأنا أسعى والناس والعمده ومعهم الحكومه يسعون ورايه يبون يرتدون مني الكوره ,, ويوم شفت أنه يمكن يدركني أحد منهم وانا أتعرقش عمدان الصندقه أللي فوق المدرج وروس المشجعين واطلع بالكوره فوقها .. تجمعت الجماهير الغفيره واحاطت بالصندقه أحاطة السوار بالمعصم, وانتقل البث التلفزوني الحي من وسط الملعب لمنقاش والكوره على ظهر الصندقه ..
المهم ما تشوفني الا لي دكمه على الصندقه من ركن للثاني فوق روسهم , واللي حاولوا يلحقوني على الصندقه عجزوا لا يمسكوني وهبدتهم بالشون حتى تطايحو من عليها ودميهم شلال ,, أما انا تشجعت وظنيت أني تمكنت ,, عودت الحكومه تمنع المطارده ويحولونها مفاوضات معي بعد رموا عليه مكبر صوت على الصندقه .. وفعلا بدت المفاوضات بمكبرات الصوت حية على الهواء يشاهدها الملايين من بدو وحضار من ملعب الصبان , وتوقف لعب الكوره وبدت لعبة عض ألأصابع وسياسة العصى والجزره والمفاوضات الدبلوماسيه الشاقه ...
الحلقه الجايه (الثالثه) تبي تشوفون كل العجب في شهررجب (تاريخ الحادثه) , وتبي تجري فيها مصايب على بعض ألأعضاء الثملان في منتدانا بما كسبت أيديهم ,,, خلوكم معي وتبون ترون أفراح واتراح ما تنسونها باقي أعماركم ,, لا تفوتكم , وتصبحون على خير...

[ABO TURKI]

حلال فيك الشون اللي جاك في ظهرك
وبعدين فضحتنا مع قبايل جده
واخربت المباراة

[حسن عابد]

غزال وحمار كيف تجمعت

[@ بن سلمان @]

منقاش
احس انك تزحمنا شوي بالهرجة.
في حاجات اقبلها وحاجات امشيها وحاجات اوقف عندها ما اقدر امشيها زي يوم تقول تسعى زي الغزال , طيب والسروال كيف سويت فيه يا غزال , لا تقول شمرته وتجيب لنا خنبقة .

[حسن عابد]

يامنقاش لا لعبت وقلنا لعب مع خوياه ولا تركت الخنبقة ضد خوياك وهاذي مشكلة لا يقبل علينا العمدة ولا يحبسك في الغرفة المذكورة

[منقاش]

رفاقتي ابو تركي وحسن عابد : لو تدرون وش مقبل عليكم من العمده كان طلبتوني أوقف الكتابه ,,, لكن موعدنا الحلقه الجايه ألا أذا رجعتم المكانس وحبيتم على خنفرة حماري , وقتها يمكن تخفيف بعض البلاوي عليكم...
رفيقي ابن سلمان : وهو أنا أول غزال تسرول ؟؟,, أما مصير السروال فهو أنفكت تكته وسقط مني مثل البرشوت وانا معطي الساق لحقه في المضمار وطارت به الرياح ونزل على وجيه بعض المشجعات في المدرج ففقدن وعيهن .. وبلغني أنه حاليا في متحف شبره بأعتباره أثرا من آثار أهل الطائف ...

[أبو عبدالرحمن]

يعطيك العافية يا مناقش على هذه الحركات

صدق...بيض الله وجهك..

[النتيف]

ما شاء الله على عمدتك هذا يا منقاش أشوفه أكرم حمارك وقدره أما انت أكرمك بالشون على ظهرك
أتوقع وصلته علوم عنك من أبو تركي والمشيلحي وأبوخالد

بعدين انتبه ترد الكوره لهم في الملعب قبل ما تلعب معهم مباراة فوق الصندقه وإذا غلبوك فيها ردها لهم والله يعينك تتحمل اللي يجري عليك وإلا إن كان غلبتهم فهذا منقاش اللي أعرفه يشوت الحصى بأضلافه قصدي بقدمه في الديره إلين تروح طشيش

[منقاش]

أبو عبدالرحمن : ووجهك أبيض ,, لكن فهموا اللي ما يفهمون في المنتدى .
وترانى سويت فيهم النون وما يعلمون بس ما ودي أحزنكم عليهم واجد ...
النتيف : العمده ما هو سهل وتبي تعرف عنه علوم كثيره في الحلقه الجايه ,, بس ما له خوي ..
بقية ألأخوان : أشوف ألأقبال قليل وأظن القاف شاب ,, وأعتقد أنكم تبغوني أوقف الكتابه ولا أرويلكم بقية الحلقات ..

[abonayf]

الله عليك يامنقاش
اولها سروال يسحب ومربوطة تكته ويوم سرت غزال طاح واخرها متحف شبرا .
الله يخارجنا اقول :
اطلب لجوء عند عمده ثاني لا تعود مع عمدتك الاول قليل الخاتمه .
بس تب الصدق
بيض الله وجهك وقفت المباراة واجبرتهم على التفاوض .