وافضيحتك يا منقاش/ الحلقه ألثانيه

[منقاش]

وافضيحتك يا منقاش/ الحلقه ألثانيه وافضيحتك يا منقاش/ الحلقه ألثانيه وافضيحتك يا منقاش/ الحلقه ألثانيه وافضيحتك يا منقاش/ الحلقه ألثانيه وافضيحتك يا منقاش/ الحلقه ألثانيه

يا رفاقتي الزابط اللي قلت لكم في الحلقه الاوله أنه جاني وبغيته يزبطني أثر ما عنده علم ولا هو مسعول عني , قد الرجال بس مار من عندي رايح الحمام , الحيث أني شفته يتحمصك وتركني أهرج ووراني مقفاه .
برهه ألا وزابط ثاني جاي ومعه ثلاثه من العسكران أشنابهم متعديه أذانيهم وبطونهم تقول قرب منفخه . فتحوا عليه الغرفه ودخلوا ,, حييت بهم لكن لا ردوا عليه سلام ولا كلام ,, كان معهم كرسي وسواطير ومناشير وشنيور وليور وزراديات ومسامير ومطارق وفواقيش وعتل وبواكير وفلكه وافياش كهرب موصله بسلوك وحبال مشنقه ودرلات وبرشومي وحريق .
هاثم مرمسوا رجيلاتي ويدياتي بالحريق وشوك البرشومي حتى ولع جلدي من الحرقان وسرت أعترط عرطه,, قلت يالجواد لا تنقدون معي تحسبوني صنبور رقبه, ترون معي ثماله اللي ضافيه ومتعافيه ومن وراهم ثقيف ...
ويا منادي عند أصنج ,,ما أحد يرد عليه وما كني أكلمهم ,, هاثم كسروا على قديماتي خمسه بواكير وانا أتعزوي في البدايه أني منقاش أني منقاش, لكن عودت أصيح في النهايه من الوجع واقول يا عرب خذوا اللي تبون واعتقوني .
قالوا نبيك تعترف أنك جاي تستولي على المطار وتختطف طياره ,, قلت موافق ,, قالوا طيب وين كنت رايح بها ؟؟ قلت يا جماعه خافوا الله منقاش ما يخطف حمار ,,, أنا يا ناس حمار حمار من حمير ثماله اللي جيت لها المكان واللي جابني فلان اللي يشتغل عندكم وعلمني بكذه وقال لي سوي كذه وقال يبي يركبني الطياره أروح لقرى رفيقنا شيخ ارامكو, وتروني اعزمكم للقرى في ظهران ومتوجه عليكم أنكم تقولون تم .
خصروني ما ردوا عليه وراحوا عني في غرفه جنبي , وبعد قليل ورفيقي سويد الوجه اللي ورطني داخل عليه , ثرمد بكلام ناسيه , وختم كلامه أن الماضوع يترقع أن كان أتنازل عن الطلي والبندق للبوابين ,, تميت ووقعت وتنازلت وتعهدت وخرج بي الرجال على عربيه ما أقدر أمشي من الحال اللي حصل لي , واخذني لي زفيرالى عند الطياره وقال : هيه تراني متعسف على اللي جاك , وما جاك مقسوم لك ونصيبك واحمد ربك أن الماضوع تلملم والا كان وكان ... لكن حمد وشكر اللي نفذت بجلدك, وأركب مع الركاب واياك تنزل الا في ظهران مع ركاب الظهران .
طلعوني الطياره متعضديني حتى حطوني في وسط الركاب ,, التفت على اللي يميني واللي يساري وقلت يا اللحى الغانمه وش أسم قبايلكم ؟؟ , قالوا من قحطان .. قلت وين رايحين ؟؟ قالوا رايحين ديرتنا ظهران ,, قلت هاااا جابكم الله وخلوني على بالكم تروني رجال غشيم في الطيارات وابغي أنزل معكم توروني الدروب ,, قالوا والله الحزه المباركه نخدمك بعيوننا وحتى نستضيفك في بيوتنا ,,, قلت عساها حلال عامره بأهلها, بس عسى في ظهران مكان بيع غنم أشتري لي منه خيال مبدى ؟؟ , قالوا فيه اللي تبي وابشر نوديك له ..
شكرت الرجاجيل الا وهم يصككون في الطياره علينا بعد طلعوا معنا فيها سيارتين ,, ثم حنت وزرقت على السفلت وطارت لكن من صجتها ما تقدر تحاكي اللي جنبك ,, أوصفها لكم كما لو تقعد ويجي عشره ورعان يمينك وعشره يسارك ومعهم تنك فاضي وعصي يصرقعون بها مع بعضها سوى فوق راسك وعند أذانيك ..
بعد يجي ساعه وقعت الطياره ولا كودت أنهم يطفونها ,, فتحوا بيبانها واذانيه مسدده من صوتها وانزل مع رجال قحطان اللي كانوا جنبي ونخرج من سقيفة المطار على السياح اللي قدامه وكان فيها تكاسي بعضهم ينادي ظهران ظهران .. ركبت مع خويايه ونقعد في الدرب قريب ساعتين وعصير ونحنا داخلين ظهران ,, قلت لخويايه الاثنين ,, يا خويا الرحمن لا تتركوني حتى تدلوني على حراج الغنم أشتري لي طلي أبدي به على رفيقي .. نزلنا في هاك المكان اللي فيه حيشان للغنم واشتريت نجدي مثل الاول اللي راح عليه ...
كنا وقتها عصير وكنت رسفان وعسفان وتعبان لو تدفل في وجهي ما مسحتها من التعب .. طلعت ورقه لخويايه فيها مكتوب تلفون رفيقي راعي القرى , وقلت تروني الزم عليكم تخاوني للقرى والهرجه والدرجه والطرب والقصيد لكن أتصلوا أول برفيقي على تلفونه يوصف لكم ولراعي التكس الدرب..
تشبحوا فيها قليل وقالوا يا منقاش هذا التلفون ما هو في ظهران ,, قلت لهم التلفون صحيح ولبيت رفيقي في شركة المريكان ,, راحوا بالورقه عني قليل ودخلوا صندقة تلفونات جنبنا وعودوا عليه يتضاحكون ويقولون يا منقاش أنت في ظهران الجنوب ورقم رفيقك في ظهران الشرقيه .. رديت وعساه قريب ؟؟ قالوا لا بالله أبعد من الطايف اللي جيت منه ,,,,أرد, طيب يالجواد وش جابني هنه ؟ قالوا جابك الله ثم رجيلاتك ,, أنت نزلت في أبها ورحت ظهران الجنوب ولو قعدت في الطياره كان راحت بك مع باقي الركاب ولا نزلتك ألا في الظهران عند رفيقك..
هم قالوا هالكلام الا ويغمى عليه ولا أصحي ألا بعد ثلاثه أيام في المشتشفى وبعض الجماعه اللي راحوا القرى عند راسي ومنهم كم واحد من الشمات مثل أبن عزاب وابن سلمان والمبرد ومشتاق يقولون: أي والله سويتها يا منقاش كابنا وخانس ورانا ولا تعلمنا تبي تركب السما بلاش وتحسب كل غراء شحمه,, قد أتصلوا من المشتشفى بهم وعلموهم وبعد القرى جاني بعضهم واشتدوني للطايف واكلوا طليي في الدرب عساه صدقه عني ,, وسلامتكم ...

[منقاش]

نسيت أقول لكم أنه بعد وصلنا الطايف لقينا أيجار موقف وضرمة الحمار تجيب حمارين ,, والحمار مسروق قبل نجي بليله ..
ولا كان من الرفاقه ألا فرقوا ألأيجار ودفعوه عني , والحمار لقيناه بعد هلالين مبيوع على هذيل في مكه وارتديناه , ولقينا اللي سرقه وباعه العفن الغدار الهلامه رويعي الغنم ...

[admin]

هههههههههههههههه

والله مسكين عم منقاش
اش اللي حصل لك .
قليلي الخاتمة عساك تأخذ درس ولا تطاوعهم مرة ثانية

( رحم الله الشيخ الطنطاوي : لو شاهد فضائحك لكتبها في مؤلفاته)

[الحجاج بن يوسف الثقفي]

يامنقاش انت وش قصتك الكل يلطمك
شوف لك حل في عمرك
وعندي هرجه ابقولها لك
بس لاتعلم احد بس اصبر ايلين بن سلمان يرد وبعدين اقولك
عشان لايروح ينقل الهرجه لرويعي وبن داخل

[@ بن سلمان @]

والله اني دريت يوم هي ساعة في الجو
انك راعي دجة

[أبو عبدالرحمن]

يا عم منقاش ـ عطني عقالك ـ تراني خامس للجميع

وإن كنت صادق ـ وأظنك صادق ـ

ما أحد يجلس في المنتدى منهم ولا واحد...

[منقاش]

الثملان الكمال , الشريف الفني , القزاز المنسم , بن سلمان , ابو عبد الرحمن : بيض الله وجيهكم يوم بديتم عليه وهرجتوني .
ابو عبدالرحمن : عقالي حماري أعز ما عندي , وان كان تستحي مني تطرد من المنتدى بن عزاب وبن سلمان وابو هاشم ورويعي الكلاب وابو عادل وبن داخل ومشتاق والمنسم وتكون ممنون ومشكور وبالخير مذكور ..

[ابو عادل]

يامنقاش انته مسكين وعلى نياتك أنا عارف السالفة كلها من رفيقك اللي في المطار علمني
وتراه يقول أنا اللي مدبر الخطة وداز الزباط على الهبيلة منقاش لأن المسكين ضحكوا عليه
في ماقفة الغنم وباعوه طلي روماني يفشّل هريان وشكله أقشر قلت أعطل الرجال ونصادر عليه الطلي عساه أما ياخذ طلي يبيض الوجه والا يبطل ولا يفتضح ويفضحنا لأنه غشيم مايعرف يشتري وزياده نظره تعبان مايشوف وهو لوكان يفهم كان أخذ الطلي من عند رويعي الغنم أقلتها يعطيه واحد حري بس الكلام خليه سر بيني وبينك وثاني مرة اذا بغيت تروح مكان
ومعك نوب علمني وانا أدبرك ونسيت اقلك ترى رفيقك اللي في المطار قلي البندق صادرناه
لأنه جايب كرسوعة مصدّية وبانية فيها العنكبوت والبارود دايل مايثور وزرد ماعنده ماغير يحط المادة المشتعلة اللي في راس عود الكبريت يدحس بها في مامة الكرسوعة القشرا
الله لايفشلنا
يابوعبدالرحمن تكفى تراني طالبك تطرد الشايب أبوحمير من المنتدى والاترى ماعاد أحد يدخل المنتدى أفففففففه.

[admin]

تستاهل الختم المميز
يا عم منقاش

[abonayf]

والله يامنقاش ياهي حوايس
بس تذكر ( الله مايعطي الا مستحق )

ولا وش رايك